भजन संहिता 65

परमेशरेरी बडीयाई ते शुक्र केरनू

बज़ानेबालां केरे लेई दाऊदेरू भजन

1 हे परमेशर, सिय्योने*65:1 सिय्योने यरूशलेमे क़िले बालू पहाड़ मां बडीयाई तीं बलगतीए;

ते तेरे लेई मिन्नतां पूरी की गैली।✝65:1 प्रेरित. 10:34-35;यशा. 66:23.

2 हे प्राथनारे शुन्ने बाले!

सारे मैन्हु तीं कां एज्जेले।

3 बुरां कम्मां मीं पुड़ बड़ां भारी भेवरन;

तूए इश्शे पाप माफ़ केरेलो।

4 केत्रो धने तै, ज़ैस तू च़ुनतां अपने नेड़े एजने देतस,

कि तै तेरे भवनेरे अंगन्न मां राए!

अस तेरे भवनेरे, मतलब तेरे पवित्र मन्दरेरी रोड़ी-रोड़ी चीज़न सेइं रज़्ज़म।

5 हे इश्शे मुक्ति देनेबाले परमेशर,

हे दुनियारे सब दूर-दूरेरे मुल्खां केरे ते दूर समुन्दरे पुड़ रानेबालां केरे आधार,

तू धार्मिकता सेइं कियोरे बड्डे कम्मन सेइं असन जुवाब देलो;

6 तू एपनी शेक्ति सेइं पहाड़ां केरि पक्‍की मुनीयाद बनातस,

ते एपनी ताकती सेइं तड़बज़ रहतस।

7 तू ज़ै समुन्दरां केरि भारी शोर, तैसेरे छ़ेल्ही केरि भारी शोर,

ते मुल्खे-मुल्खेरे लोकां केरि शोर शराबो खतम केरतस।✝65:7 मत. 8:26;यशा. 17:12-13.

8 एल्हेरेलेइ दूर-दूर मुल्खां केरे रानेबाले तेरे निशान देइतां डेरि जेवरेन;

ते तू झ़ेझ़ां दिहाड़ो निसने करां देइतां दिहाड़ो डुबने तगर खुशी मनाने देतस।

9 तू ज़मीनरी हेरगेश केरतां तैस पैनी सेइं सगतस,

तू तैस बड़ी फलदार केरतस;

परमेशरेरो दरिया पैनी सेइं भरोरो रहते,

तू ज़मीन तियार केरतां मैन्हु केरे लेई अन्न तियार केरतस।

10 तू उडारेरी सींथन रोड़ेच़ारे सगतस,

ते तैन केरि मझ़ेटीं मित्ती बिशालतस,

तू ज़मीन झ़ेड़ी सेइं नर्म केरतस,

ते तैसेरी फसली पुड़ बरकत देतस।

11 तेरी भलैइयन सेइं, तू बिरै ताजे लुवातस;

ते तेरी बत्ती मां रोड़ी-रोड़ी फसल मैलचे।

12 तैना जंगलेरे चरागान मां ते ड्लबड़ां नीले-नीले घासे सेइं भेरतां भोतन;

ते पहाड़ां रंगबरंगां लिगड़ां लातन।

13 सरसब्ज़ पहाड़ां भैड्डां छ़ेल्‍लेईं सेइं भोतन,

ते वैदी अन्ने सेइं ढेक्‍की गैतिन,

सब जयजयकार केरती ते गीतां ज़ोतन।