भजन संहिता 11

परमेशरे पुड़ भरोसो

प्रधान बज़ानेबालेरे लेई दाऊदेरू भजन

1 मीं सुरक्षारे लेई यहोवा पुड़ भरोसोए;

तुस किजो मीं सेइं ज़ोतथ, कि

"च़ुड़ोलोवेरो ज़ेरो अपने पहाड़े पुड़ जो उडरी गा;"

2 किजोकि हेरा, दुष्ट धनुषे पुड़ तीर च़ाढ़तन,

ते तैना तीर धनुषेरे डोरी पुड़ रखतन,

ताके आंधरे मां सच़्च़े लोकन पुड़ च़लान।

3 अगर मुनीयादां पुट्टी*11:3 मुनीयादां पुट्टी समाजे मां कानूनेरी बुनीयाद गान

त धर्मी कुन केरि सकते?

4 यहोवा अपने पवित्र भवने मांए;

यहोवारो तखत सुर्गे मांए;

तै हर एक्‍की मैन्हु लगातार तकते

ते तैसेरी एछ़्छ़ी तैन पेरखितन।

5 यहोवा धर्मी ते दुष्टे दूईयन परखते,

पन ज़ैना ज़ुलमे सेइं प्यार रखतन

तैन सेइं तै नफरत केरते।

6 तै दुष्टन पुड़ अग ते गन्धक बखालो;

ते बड़ी लूह तैन केरे कुटोरे मां बंटी गाली।

7 किजोकि यहोवा धर्मीए,

तै धार्मिकतारे कम्मन पसंद केरते;

ते धर्मी मैन्हु तैसेरू दर्शन केरेले।