भजन संहिता 58

अन्यायेरे लेई प्राथना

बज़ानेबालां केरे प्रधानेरे लेई अल-तशहेतेरे रागे मां दाऊदेरो मिक्ताम

1 हे मैन्हव,*58:1 हे मैन्हव शेक्तिबाले लोक या शेक्ति बालो ईश्वर कुन तुस सच़्च़े धार्मिकतारी गल ज़ोतथ?

हे मैन्हव कुन तुस ठीक न्याय केरतथ?

2 नईं, तुस अपने मने मां उलटा कम्मां केरतथ;

तुस सैरी मुल्खे मां ज़ुलम केरतथ।

3 दुष्ट ज़र्मनेरे देंते सही बत्ती करां दूर भोइ गातन,

तैना एपनी अम्मरे पेटे मरां झूठ ज़ोइतां भेटकी गातन।

4 तैन मां सप्पेरू ज़ेरू ज़ेरहे;

तैस टोंवने सप्पेरे ज़ेरेन ज़ै अपने कन्न बन्द केरतां रखते;

5 ते सप्पेरू केत्रो भी रोड़ेच़ारे मन्ट्ल पढ़े,

फिरी भी तैसेरी न शुने।

6 हे परमेशर, तैन केरे दंत ट्लोड़ी दे;

हे यहोवा, तैन जुवान शेरां केरे दंत ट्लोड़ी दे!

7 तैना धोइयोइतां पैनेरे ज़ेरे भोइ गान;

ज़ैखन तै अपने तीर च़ाढ़े, तैखन तीर ज़ेन्च़रे दूई टुक्ड़े भोइ गान।

8 तैना जिषड़ावलरे ज़ेरे गेलतां नाश भोइ गातन,

ते कौन्शरे ज़ैया भोवरे बच्‍चेरे ज़ेरे ज़ैनी दिहाड़ो नईं लहनो।

9 इस करां पेइले कि तुश्शे पतिलन कंटां केरि लप लग्गे,

नीले ते फुकोरे, तैना दूईये तै बाते सेइं उडारेलो।

10 परमेशरेरो एरहो बदलो लेइतां खुश भोल्हो;

तै अपने पव दुष्टेरे खूने सेइं धोलो।

11 तैखन लोक ज़ोले, सच़्च़े धर्मी मैन्हेरे लेई फले;

सच़्च़े परमेशरे, ज़ै दुनियाई मां न्याय केरते।