1 हे सेनां केरे यहोवा, तेरी रानेरी ठार केत्री रोड़ीए।

2 मेरे प्राण यहोवारे अंगना केरि तलाश केरते-केरते बेहोश भोइ गातन,

मेरो तन ते मन दूईये परमेशरे पुकारते रहतन।

3 हे सेना केरे यहोवा, हे मेरे राज़ा, ते परमेशर, तेरी वेदी कां च़ुड़ोली अपनो ठिकानो,

ते शूपाबेना आल्हो बनेवरोए ज़ैस मां तै अपने बच्‍चे रख्खे।

4 केत्रे धन आन तैना, ज़ैना तेरे घरे* मां रहतन;

ते तैना हमेशा तेरी तारीफ़ केरते राले। (सेला)

5 केत्रो धने तै मैन्हु, ज़ै तीं करां ताकत हासिल केरते,

ते तैना ज़ैन सिय्योनेरी सड़करी खबर रहतीए।

6 तैना लेरां केरि तरैई मां गातन ते तैस पैनेरे नागां केरि ठार बनातन;

फिरी एग्री बरसांत तैस मां बरकते बरकत उगातीए।

7 तैना ज़ोरे पुड़ ज़ोर हासिल केरते रहतन;

ते तैन मरां हर अक मैन्हु सिय्योने मां परमेशरे अपनु तुत्तर हिरालो।

8 हे सेना केरे परमेशर यहोवा, मेरी प्राथना शुन,

हे याकूबेरे परमेशर, ध्यान दे! (सेला)

9 हे परमेशर, हे इश्शी ढाल, नज़र केर;

ते अपने च़ुनोरे राज़ेरू तुत्तरे हेर!

10 किजोकि तेरे अंगन्न मां अक दिहाड़ी कही हज़ार दिहैड़ी करां जादे रोड़ीए।

दुष्टां केरे डेरन मां राने करां रोड़ूए।

अपने परमेशरेरे भवनेरे दारे पुड़ खड़ू रानू मीं जादे पसंद एइते।

11 किजोकि परमेशर दिहाड़ेरो ज़ेरो ते ढालरो ज़ेरोए;

यहोवा अनुग्रह केरेलो, ते महिमा देलो;

ते ज़ैना लोक सही चाल च़लतन;

तैन करां तै कोई रोड़ी चीज़ दूर न रखेलो।

12 हे सेना केरे यहोवा,

केत्रो धने तै मैन्हु, ज़ै तीं पुड़ भरोसो रखते!