1 हे यहोवा अवं पूरे दिले सेइं तेरू शुक्र केरेलो;

ते अवं तेरे सब चमत्कारेरे कम्मां केरे बारे मां ज़ोइलो।

2 अवं तेरे वजाई सेइं खुश ते मघन भोल्हो,

हे परमप्रधान परमेशर, अवं तेरे नंव्वेरू भजन ज़ोइलो।

3 मेरे दुश्मन हैरतां पत्रोवं बेदलोले,

तैना तेरे सामनेरां ठोकर खेइतां नाश भोतन।

4 किजोकि तीं मेरे मुकदमेरो फैसलो मेरे हक्‍के मां कियोरोए;

ते अपने तखते पुड़ बिशतां धार्मिकतारे मुताबिक मेरो न्याय कियोरोए।

5 तीं अक-अक कौम* झ़िड़की ते बुरे लोक नाश कियोरेन;

तीं तैन केरू नवं हमेशारे लेई मिटेइतां छ़डेरूए।

6 दुश्मन हमेशारे लेई बरबाद भोए;

ते तैन केरां नगरां तीं बुछ़ोड़ां,

ते तैन केरू नवं ते निशान मिटी जेवरूए।

7 पन यहोवा हमेशारे लेई अपनो तखत तियार कियोरोए,

तैनी अपनो तखत न्यायेरे लेई तियार कियोरोए;

8 ते तै सच़्च़ैई सेइं दुनियारो न्याय केरेलो,

ते सच़्च़ैई सेइं मुल्खां-मुल्खां केरे लोकां केरो न्याय केरेलो।

9 यहोवा तैन लोकां केरे लेई अक उच्‍चो क़िलो ठहरेलो ज़ैन पुड़ ज़ुलम भोते,

तै मुसीबतरे वक्ते मां उच्‍चो क़िलो ठहरेलो।

10 ते ज़ैना तेरू नवं ज़ानतन, तीं पुड़ भरोसो रखेले,

किजोकि हे यहोवा, तीं एप्पु कां एजने बाले कधी नईं शारोरे।

11 यहोवा ज़ै सिय्योने मां तखते पुड़ बिशोरोए, तैसेरू भजन ज़ोथ!

कौमां-कौमां केरे लोकन मां तैसेरे बड्डे-बड्डे कम्मां केरो प्रचार केरा।

12 किजोकि खूनेरो बदलो नेनेबालो तैस याद रखते;

तै गरीबां केरि बिनती कधे न बिसरे।

13 हे यहोवा, मीं पुड़ दया केर। हेर, मेरे दुश्मन मीं पुड़ ज़ुलम केरने लगोरेन,

तूए मौतरे फाटकन मरां मीं बच़ेइ सकतस।

14 ताके अवं सिय्योनेरे फाटके* कां तेरे गुणा केरू बियान केरीं,

ते तेरे दित्तोरे छुटकारे सेइं मघन भोईं।

15 गैर कौमेईं ज़ै खड्डो घड़ोरो थियो, तैस्से मां तैना एप्पु बिछ़ड़न;

ज़ैन ज़ाल तैनेईं लेवरू थियूं, तैस मां तैन्ना केरो पव फेसी जेव।

16 यहोवा अपनो आप बांदो कियो, तैने न्याय कियो;

दुष्ट अपने कियोरे कम्मन मां फेसी गाते। (हिग्गायोन * सेला)

17 दुष्ट पाताले मां वापस गालो,

ते कने तैना सब कौमां भी ज़ैना परमेशरे बिसरी गैतिन।

18 किजोकि ज़रूरतमन्द लोक हमेशा तगर बिसरोरोए न राले,

ते न त हलीम लोकां केरि उमीद हमेशारे लेई नाश भोए।

19 हे यहोवा उठ, मैन्हु प्रबल न भोइ सके!

कौमां केरो न्याय तेरे सामने कियो गाए।

20 हे यहोवा, तैन डरा!

कौमां अपने आपे सिर्फ मैन्हु समझ़न। (सेला)