1 यहोवारी तारीफ़ केरा!

परमेशरेरी पवित्र ठैरी मां तैसेरी तारीफ़ केरा।

तैसेरी शेक्ति सेइं भेरतां अम्बरे मां

तैसेरी तारीफ़ केरा।

2 यहोवारे महान कम्मां केरे वजाई सेइं,

तैसेरी तारीफ़ केरा;

तै बड़ो महाने एल्हेरेलेइ तैसेरी तारीफ़ केरा।

3 नरशिंगे बज़ेइतां तैसेरी तारीफ़ केरा,

सैन्गी बज़ेइतां तैसेरी तारीफ़ केरा।

4 डफली बज़ेइतां ते नेच़तां तैसेरी तारीफ़ केरा;

तारदार साज़ बज़ेइतां ते बेंशोई बज़ेइतां

तैसेरी तारीफ़ केरा।

5 झ़ेल्‍ली केरे उच्‍चे आवाज़ी सेइं

तैसेरी तारीफ़ केरा;

आनन्देरे बड़े उच्‍ची आवाज़ी बाले झ़ेल्‍ली बज़ाते

परमेशरेरी तारीफ़ केरा!

6 ज़ेत्रे ज़ींते प्राणी आन

सब यहोवारी तारीफ़ केरन!

यहोवारी तारीफ़ केरा!