भजन संहिता 52

दुष्ट मैन्हेरो अन्त ते धर्मी मैन्हेरी तसल्‍ली

साज़ बज़ानेबालां केरे प्रधानेरे लेई मश्कीले पुड़ दाऊदेरू भजन ज़ैखन दोएग एदोमे शाऊले ज़ोवं कि दाऊद अहीमेलेकेरे घरे जेवरो थियो।

1 हे बहादर, तू बुराई केरने पुड़ किजो घमण्ड केरतस?

परमेशरेरी दया त हमेशारीए।

2 तेरी ज़िभ सिर्फ दुष्ट बनातीए।

शानी पुड़ रखोरोए उस्तरेरे ज़ेरे तै धोखेरू

कम केरतीए।

3 तू भलियाई करां बेद्धतां बुराई मां,

ते धार्मिकतारी गल्‍ली करां बेद्धतां झूठे सेइं प्यार केरतस। (सेला)

4 हे धोखो देनेबाली ज़बान,

तू सब नाश केरनेबैली गल्‍लन सेइं खुश भोतिस।

5 पक्‍को परमेशर तीं हमेशारे लेई नाश केरेलो;

तै तीं ट्लेइतां तेरे डेरे मरां कढेलो;

ते ज़ींतां केरे दुनियाई मरां तीं ढ्लूड़ेलो। (सेला)

6 तैखन धर्मी लोक इस बीतना हेरतां डेरि गाले,

ते इन ज़ोइतां तैस पुड़ हस्सेले,

7 "हेरा, ई तैए मैन्हुए ज़ैनी परमेशरे मां

शरण नईं घिन्नोरीए,

पन अपने बड़े धने पुड़ भरोसो रखतो थियो

ते अपने आपे दुष्टे मज़बूत केरतो राव!"

8 पन अवं परमेशरेरे घरे मां ज़ैतूनेरे

नीले बुट्टेरो ज़ेरो आईं।

मीं हमेशारे लेई परमेशरेरी दयाई

पुड़ भरोसो रखोरोए।

9 अवं तेरू शुक्र हमेशारे लेई केरेलो,

किजोकि तींए इन कम कियूं।

अवं तेरे नंव्वे पुड़ उमीद रखताईं, किजोकि

इन तेरे पवित्र भक्तां केरे सामने बड़ू रोड़ूए।