भजन संहिता 25

प्रभु पुड़ भरोसो रखनो

दाऊदेरू भजन

1 हे यहोवा, अवं तीं

पुड़ भरोसो रखताई।

2 हे मेरे परमेशर, मीं तींए पुड़ भरोसो रखोरोए,

मीं शरमिन्दा न भोने दे,

मेरे दुश्मन मीं पुड़ जयजयकार न केरि बटन।*25:2 मेरे दुश्मन्न मीं पुड़ ज़ींतने न दे

3 बल्के ज़ेत्रे तीं पुड़ उमीद रखतन

तैना कोई शरमिन्दा न भोल्हे;

पन ज़ैना बगैर वजां धोखेबाज़न

तैन्ना शरमिन्दा भोल्हे।

4 हे यहोवा, एपनी बत्तां मीं हिरा;

मीं एपनी बत्तां केरि शिक्षा दे।

5 अपने सच़्च़ैई पुड़ च़ला ते शिक्षा दे;

किजोकि तूए मीं मुक्ति देनेबालो परमेशरस;

सैरी दिहैड़ी अवं तेरे इंतज़ारे मां रहताईं।

6 हे यहोवा, अपनि दया ते करुणारे कम्मन याद केर;

किजोकि तैना त हमेशा करां भोतां एवरेन।

7 हे यहोवा, अपने भलैइयरे वजाई सेइं

मेरे जुवैनरे पापन ते मेरे बुरे कम्मन याद न केर;

अपनि करुणारे मुताबिक तू मीं याद केर।

8 यहोवा भलो ते सच़्च़ोए;

एल्हेरेलेइ तै पापी लोकन अपनि बत हिरालो।

9 तै हलीम लोकन न्यायेरी शिक्षा देलो,

हाँ, तै हलीम लोकन अपनि बत हिरालो।

10 ज़ैना यहोवारे करारे ते कानूने मनतन,

तैन केरे लेई तैसेरी सब बत्तां करुणा ते सच़्च़ेरी आन।✝25:10 यूह. 1:17.

11 हे यहोवा, अपने नंव्वेरे खातर

मेरे पापन माफ़ केर ज़ैना बड़ेन।

12 तै कौने ज़ै यहोवारो डर मन्ते?

प्रभु तैस तैस्से बत्ती पुड़ च़लालो

ज़ैस सेइं तै खुश भोते।

13 तै सुखे सेइं टिकोरो रालो,

ते तैसेरी औलाद धेरती अधिकारी भोल्ही।

14 यहोवारो भेद तैन्ना ज़ानतन ज़ैना तैस करां डरतन,

ते तैए अपनो करार तैन पुड़ बांदो केरेलो।✝25:14 इफि. 1:9;1:18.

15 मेरी एछ़्छ़ी हमेशा यहोवा तेकती रैतिन,

किजोकि तैए मेरे पव जाले मरां छुटालो।✝25:15 भज. 141:8.

16 हे यहोवा, मेरे पासे फिरतां मीं पुड़ दया केर;

किजोकि अवं अकैल्‍लो ते मुसीबतरो मारोरोईं।

17 मेरे दिलेरी परेशानी बधोरीए,

तू मीं मेरी तकलीफी करां छुटा।

18 तू मेरे दुखे ते तकलीफी पुड़ नज़र केर,

ते मेरे सब पापन माफ़ केर।

19 मेरे दुश्मन हेर कि तैना केत्रे बधोरेन,

ते मीं सेइं बड़ो बैर रखतन।

20 मेरी जानरी हिफाज़त केर, ते मीं छुटा;

मीं शरमिन्दा न भोने दे,

किजोकि मेरो भरोसो तीं पुड़े।

21 हे प्रभु, ईमानदारी ते सच़्च़ाई मेरी रक्षा केर,

किजोकि मीं सिर्फ तेरी उमीदे।

22 हे यहोवा इस्राएले तैसेरे सारे मुसीबतन करां छुटकारो दे।