1 एन गल्‍लन पत्ती यीशु गलील इलाके मां फिरतो राव, किजोकि यहूदी लीडर तैस मारनेरी कोशिश केरि राओरे थिये, एल्हेरेलेइ तै यहूदिया इलाके मां फिरनू न थियो चातो। 2 यहूदी केरू झोफड़ी केरू तिहार* (तेम्बु) नेड़ू थियूं। 3 एल्हेरेलेइ तैसेरे ढ्लाएईं तैस ज़ोवं, "इड़ी न रा। यहूदिया इलाके मां गा ज़ैड़ी तिहार मनाने लगोरेन, कि ज़ैना चमत्कार तू केरतस तैना तेरे चेले भी हेरन, ज़ैना यहूदिया इलाके मां रहतन। 4 किजोकि एरो कोई न भोल्हो कि ज़ै मुशूर भोनू चाए, ते छ़ेपतां कम केरे। अगर तू कम केरतस, त अपनो आप दुनियाई पुड़ हिरा।" 5 किजोकि तैसेरे ढ्ला भी तैसेरो विश्वास न थिये केरते। 6 तैखन यीशुए तैन सेइं ज़ोवं, "मेरो लेई ठीक वक्त हेजू नईं एवरो, पन तुस केन्ची वक्ते मां भी गेइ सकतथ। 7 इस दुनियारे लोक तुसन सेइं बैर न केरि सकन, पन मीं सेइं बैर रखतन किजोकि अवं तैन केरे खलाफ इन ज़ोताईं कि तैना बुरां कम्मां केरतन। 8 तुस तिहारे मां गाथ, मीं हुना एस तिहारे मां नईं एजनू, किजोकि मेरो हेजू ठीक वक्त नईं एवरो।" 9 ते तै तैन सेइं एना गल्‍लां केरतां गलीले मां राव।

10 पन ज़ैखन तैसेरे ढ्ला तिहारे मां च़ले जे त तै बांदो न पन छ़ेपतां जेव। 11 यहूदी लीडर तिहारे मां यीशु तोपने लाए। तैना लोकन पुछ़ी राओरे थिये, "तै मैन्हु कोड़ि आहे?" 12 ते लोकन मां तैसेरे बारे मां बल्हे-बल्हे बेड़ि गल्‍लां भोइ, किछ ज़ोते थी, "तै रोड़ो मैन्हुए।" ते किछ ज़ोते थी, "नईं तै मैन्हन गुमरा केरते।" 13 फिरी भी यहूदी लोकां केरे प्रधानां केरे डरे सेइं केन्ची भी मैन्हु खुलतां तैसेरे बारे मां गल केरनेरी हिम्मत न भोइ।

14 ज़ैखन तिहारेरे अध्धे दिहाड़े बीते, त यीशु मन्दरेरे अंगने मां गेइतां शिक्षा देने लगो। 15 तैखन यहूदी लीडरेईं हैरान भोइतां ज़ोवं, "एनी त पवित्रशास्त्रेरी शिक्षा केन्ची करां नईं पढ़ोरीए, फिरी एस केन्च़रे एना गल्‍लां एई?" 16 यीशुए तैन जुवाब दित्तो, "मेरी शिक्षा मेरी अपनि नईं, बल्के परमेशरेरे तरफां आहे, ज़ैने अवं भेज़ोरोईं। 17 अगर कोई तैसेरी मेर्ज़ी पुड़ च़लनू चाए, त तै इस शिक्षारे बार मां ज़ानेलो कि ऐह परमेशरेरे तरफांए या अवं अपने तरफां ज़ोताईं। 18 ज़ै अपने तरफां किछ ज़ोते तै अपनि बडीयाई चाते, पन ज़ै अपने भेज़ने बालेरी बडीयाई चाते तै ईमानदार आहे, ते तैस मां कोई बेइमानी नईं। 19 तुसन मूसे कानून दित्तो, पन तुसन मरां कोई भी तैस पुड़ न च़ले! पन तुस लोक मीं मारनेरी कोशिश केरतथ।" 20 लोकेईं जुवाब दित्तो, "तीं पुड़ भूतेरो सैयोए! कौन तीं मारनेरी कोशिश केरते?" 21 यीशुए जुवाब दित्तो, "मीं अक चमत्कार कियो, ते तुस हैरान भोए। 22 एल्हेरेलेइ मूसा तुसन खतनेरो हुक्म दित्तो (एना नईं कि मूसेरे तरफांए बल्के दादे-पड़दादन करां च़लतो एवरोए) ते तुस आरामेरे दिहाड़े मैन्हेरो खतनो केरतथ। 23 एल्हेरेलेइ आरामेरे दिहाड़े मैन्हेरो खतनो कियो गाते ताके मूसेरे कानूनेरो हुक्म न टले, त तुस मीं पुड़ किजो क्रोध केरतथ, कि मीं आरामेरे दिहाड़े अक मैन्हु रोड़ेच़ारे ठीक केरो। 24 तुत्तर हेरतां न्याय न केरा बल्के ठीक-ठीक आदालत केरा।"

25 तैखन किछ यरूशलेम नगरेरे रानेबाले एप्पू मांमेइं एक्‍की होरि पुछ़ने लगे, "कुन ऐह तै नईं, ज़ैस मारनेरी कोशिश च़लोरीए? 26 पन तक्‍का, तै त खुले आम गल्‍लां केरते, ते कोई एस किछ न ज़ोए। कुन लीडरेईं सच़्च़े, सच़ ज़ानू कि ऐह मसीहे? 27 पन ऐह मैन्हु मसीह केन्च़रे भोइ सकते? एस त अस ज़ानतम कि ऐह कोट्ठां एवरोए, पन ज़ेइस मसीह एज्जेलो त कोई न ज़ानेलो कि तै कोट्ठां एज्जेलो।" 28 तैखन यीशुए मन्दरे अंगने मां शिक्षा देते बारे ज़ोरे सेइं ज़ोवं, "तुस मीं ज़ानतथ ते इन भी कि अवं कोट्ठां एवरोईं। अवं एप्पू नईं एवरो, पन मेरो भेज़ने बालो सच़्च़ोए, तैस तुस न ज़ानथ। 29 पन अवं तैस ज़ानताईं, किजोकि अवं तैसेरे तरफां एवरोईं, ते तैनी अवं भेज़ोरोईं।" 30 एस पुड़ लीडरेईं तै ट्लानो चाव, फिरी भी केन्चे तैस सेइं हथ न लव, किजोकि तैसेरो मरनेरो वक्त हेजू न थियो एवरो। 31 फिरी भी भीड़ी मरां बड़े लोकेईं तैस पुड़ विश्वास कियो, ते ज़ोने लगे, "मसीह ज़ैखन एज्जेलो ते एट्ठां जादे चमत्कार हिरालो ज़ैना एने हीराए?"

32 फरीसी लोकेईं, लोक तैसेरे बारे मां बल्हे-बल्हे एना गल्‍लां केरते शुने, ते प्रधान याजकेईं ते फरीसी लोकेईं तैस ट्लानेरे लेई मन्दरेरे पहरदार भेज़े। 33 एस पुड़ यीशुए ज़ोवं, "अवं थोड़े च़िरे तगर हेजू तुसन साथी आईं, फिरी अवं अपने भेज़ने बाले कां वापस गानोईं। 34 तुस मीं तोपेले, पन अवं नईं मैल्हनो, ते ज़ैड़ी अवं आईं, तैड़ी तुस न एज्जी बटथ।" 35 एस पुड़ यहूदी लीडर एप्पू मांमेइं ज़ोने लगे, "ऐह कोरहां च़लोरे, ज़ेरां अस न गेइ बटम? कुन ऐह तैन कां गालो ज़ैना यूनान नगरे मां तितर-बितर भोइतां रहतन, ते यूनानेरे लोकन भी शिक्षा देलो?" 36 एस गल्‍लरो कुन मतलबे ज़ै एनी ज़ोई, कि तुस मीं तोपेले, पन अवं तुसन न मैल्हेलो, ते ज़ैड़ी अवं आईं तैड़ी तुस न एज्जी बटतथ?

37 तिहारेरे आखरी दिहाड़े, ज़ै खास दिहाड़ी भोतीए, तेइस यीशु खड़ो भोइतां ज़ोने लगो, "अगर कोई ट्लिशोरो भोए त मीं कां एज्जे ते पीये। 38 ज़ै मीं पुड़ विश्वास केरे, ज़ेन्च़रे पवित्रशास्त्रे मां लिखेरूए, तैसेरे दिले मरां तै पैनेरे दरिया निस्सेले ज़ैना ज़िन्दगी देतन।" 39 यीशुए एना गल्‍लां पवित्र आत्मारे बारे मां ज़ोई, ज़ै विश्वास केरनेबालन पुड़ एजनेबालो थियो, किजोकि पवित्र आत्मा हेजू तगर न थियो दित्तोरो, किजोकि यीशु हेजू तगर अपनि महिमा मां वापस न थियो जेवरोए।

40 तैखन भीड़ी मरां किछेईं एना गल्‍लां शुन्तां ज़ोवं, "सच़्च़े ई तै नबी आहे, ज़ेसेरे एजनेरी अस उमीदी मां आम।" 41 किछ लोकेईं ज़ोवं, "ई मसीहे," पन किछेईं ज़ोवं, "कुन मसीह गलील इलाकेरां एजनोए? 42 पवित्रशास्त्र मां लिखोरू कि मसीह दाऊदेरे खानदाने ते बैतलहम ड्लाव्वें मरां एज्जेलो, ज़ैड़ी दाऊद राज़ो रहतो थियो।" 43 यीशुएरे बारे मां लोकां केरो अलग-अलग खियाल थियो, एल्हेरेलेइ तैन एप्पू मांमेइं अनबन भोइ। 44 किछ तैन मरां तैस ट्लाने चाते थिये, पन केन्चे तैस सेइं हथ न लव।

45 तैखन मन्दरेरे पहरदार, प्रधान याजकन ते फरीसन कां आए, तैन सेइं ज़ोवं, "तुसेईं तै किजो न आनो?" 46 पहरदारेईं जुवाब दित्तो, "केन्चे मैन्हे कधी एत्री रोड़ी गल्‍लां न कियोरी, ज़ेरि गल्‍लां ऐह मैन्हु केरते।" 47 फरीसी लोकेईं तैन जुवाब दित्तो, "कुन तुस भी टेपलोरेथ? 48 कुन प्रधान्न ते फरीसन मरां केन्चे तैस पुड़ विश्वास कियोरोए? 49 पन एन लोक ज़ैना मूसेरे कानूने न ज़ानन तैन पुड़ परमेशरेरो फिटकार भोते।" 50 नीकुदेमुसे ज़ै पेइलो तैस कां राती एवरो थियो, ते तैना मरां अक थियो, तैनी ज़ोवं, 51 "कुन इश्शो कानून केन्ची मैन्हु सज़ाह देनेरी अज़ाज़त देते, ज़ांतगर तैसेरी गल शुन्तां इन न ज़ानम कि तै कुन केरते?" 52 तैनेईं तैस जुवाब दित्तो, "कुन तू भी गलील इलाकेरो आस! पवित्रशास्त्रे मां तोप ते ज़ान, कि गलीलेरां कोई नबी त नईं निसने बालो!" 53 (तैखन सब अपने-अपने घरे च़ले जे)।