1 फिरी ज़ैखन प्रभु पतो लगो कि फरीसी लोकेईं शुनोरूए, यीशु, यूहन्ना करां जादे चेले बनाते ते बपतिस्मो देते। 2 (हालांकी सच़ एन थियूं यीशु एप्पू नईं बल्के तैसेरे चेले बपतिस्मो देते थिये), 3 तैखन तैना यहूदिया इलाके शैरतां गलील इलाके जो च़ले जे। 4 ते तैसेरू सामरिया इलाके मांमेइं भोइतां गानू ज़रूरी थियूं। 5 एल्हेरेलेइ तै सामरिया इलाकेरे सूखार नगरे मां अव, तै ठार तैस ज़मीनरे नेड़े थी ज़ै याकूबे अपने मट्ठे यूसुफे दित्तोरी थी। 6 याकूबे ज़ैन खुह बनेवरू थियूं तैन तैड़ी थियूं, ते यीशु सफर केरतां थकोरो थियो, ते तैस खुहे पुड़ बिश्शो। तैखन दुपहरां केरो मौको थियो।

7 एत्रे मां अक सामरी कुआन्श तैड़ी पानी भरने आई। यीशुए तैस जो ज़ोवं, "मीं पानी पीया।" 8 किजोकि तैसेरे चेले रोट्टी आन्नेरे लेई नगरे मां जेवरे थिये। 9 तैस सैमरी कुआन्शां तैस जो ज़ोवं, "तू यहूदिस ते अवं त सामरी, तू मीं पानी पीयानेरे लेई किजो ज़ोतस?" किजोकि यहूदी सैमरन सेइं मिलनू जुलनु न थिये सुखाते। 10 यीशुए तैस जुवाब दित्तो, "अगर तू ज़ानेथी कि परमेशर तीं कुन देनू चाते, त एन भी ज़ानेथी कि, तीं करां कौन पानी मगने लगोरोए, त तू तैस करां मगेथी, ते तै तीं ज़िन्दगरू पानी देथो।" 11 तैस कुआन्शां ज़ोवं, "हे प्रभु, तीं कां पानी भरनेरे लेई कोई भांड नईं, ते खुह बड़ू डुग्घू आहे, ते तीं ज़िन्दगरू पानी कोट्ठां मैल्हू? 12 कुन तू इश्शे पूर्वज याकूबे करां भी बड्डोस, ज़ैनी एन खुह असन दित्तेरूए, ते तैनी एप्पू भी ते तैसेरी औलादां ते तैसेरे गोरू गब्बेइं भी एस्से मरां पीव?" 13 यीशुए तैस जुवाब दित्तो, "ज़ै कोई एस खुहे मरां पियेलो तैस फिर भी ट्लिश रहनीए। 14 पन ज़ै कोई तैन पानी पीते ज़ैन अवं देताईं तै हमेशारे लेई ट्लिशोरो न रालो, बल्के ज़ैन पानी अवं तैस देलो तैन तैस मां अक नाग बनेलू ज़ै पानी देतो रालो, ज़ैस सेइं तैस हमेशारी ज़िन्दगी मैल्हेली।" 15 तैस कुआन्शां यीशु जो ज़ोवं, "हे प्रभु, मीं भी तैन पानी दे ताके मीं ट्लिश न लग्गे ते मीं बार-बार पानी भरने इस खुहे पुड़ न एजनू पे।"

16 यीशुए तैस जो ज़ोवं, "गा, अपनो मुन्श कुजा।" 17 तैसां कुआन्शां जुवाब दित्तो, "मेरो कोई मुन्श नईं।" यीशुए तैस जो ज़ोवं, "तीं सच़ ज़ोवं, ‘कि मेरो कोई मुन्श नईं।’ 18 किजोकि तीं पंच़ मुन्श बनेवरेन ते ज़ैस सेइं साथी तू हुन्ना आस, तै तेरो मुन्श नईं, तीं ज़ैन किछ ज़ोवं तैन सच़्च़े ज़ोवरूए।" 19 तैस कुआन्शां ज़ोवं, "हे प्रभु, मीं लगते तू कोई नबी आस। 20 इश्शे दादे-पड़दादेईं इस पहाड़े पुड़ आराधना की, पन तुस यहूदी लोक ज़ोतथ कि ज़ैड़ी आराधना कियोरी लोड़चे, तै ठार सिर्फ यरूशलेम आहे।" 21 यीशुए तैस कुआन्शी जो ज़ोवं, "हे कुआन्श, मेरी गल्‍लरो विश्वास केर, कि तै मौको भी एज्जी राहोरोए, कि तुस लोक बाजी केरि आराधना न त इस पहाड़े पुड़ केरेले ते न यरूशलेमे मां केरेले। 22 तुस सामरी लोक ज़ेसेरी आराधना केरतथ तैस न ज़ानथ, पन अस यहूदी लोक ज़ेसेरी आराधना केरतम तैस ज़ानतम, किजोकि मुक्ति यहूदन मरां आहे। 23 पन तै मौको एज्जी राहोरोए बल्के एवरोए, ज़ैखन सच़्च़े भक्त बाजेरी आराधना आत्मा ते सच़्च़ैई सेइं केरेले, किजोकि बाजी एरे ज़ेरे सच़्च़े भक्त तोपते। 24 परमेशर आत्मा आहे, एल्हेरेलेइ तैसेरे भक्त तैसेरी आराधना आत्मा ते सच़्च़ैई सेइं केरन।" 25 कुआन्शां तैस सेइं ज़ोवं, "अवं ज़ानती कि मसीह, ज़ैस जो ख्रिस्त ज़ोतन एजनेबालोए, ज़ैखन तै एज्जेलो तै सब किछ समझ़ालो।" 26 तैखन यीशुए ज़ोवं, "अवं ज़ै तीं सेइं गल्‍लां लगोरोइं केरने तैए मसीह आईं।"

27 एत्रे मां तैसेरे चेले आए ते तैनेईं तै एक्‍की कुआन्शी सेइं गल्‍लां केरतो लेहितां हैरान राए, पन केन्चे तैस एन न पुछ़ू, "तू कुन चातस?" या "एस कुआन्शी सेइं किजो गल्‍लां लगोरोस केरने?" 28 तै कुआन्श पैनेरो घड़ो तैड़ी छ़ेडतां वापस नगरे मां जेई ते मैन्हन सेइं ज़ोने लगी, 29 "एज्जा, एक्‍की मैन्हु सेइं मिला तैनी मीं सेइं सब किछ ज़ोवं ज़ैन मीं अज़ तगर कियेरू थियूं, कुन ऐह तै मसीह त नईं?" 30 तैना मैन्हु नगरे मरां निस्तां यीशु हेरनेरे लेई तैसेरे पासे च़लने लगे। 31 यीशुएरे चेले तैस कां मिन्नत केरने लग्गे, "हे गुरू, रोट्टी खा।" 32 पन यीशुए तैन सेइं ज़ोवं, "मीं कां खानेरे लेई अक एरी रोट्टी आहे, पन तुसन तैसेरे बारे मां कोई पतो नईं।" 33 तैखन चेले एप्पू मांमेइं ज़ोने लगे, "कुन केन्चे पेइलू एसेरे लेई किछ खाने जो आनोरूए?" 34 यीशुए तैन सेइं ज़ोवं, "मेरी रोट्टी ईए कि, परमेशरेरी मर्ज़ी पूरी केरि ज़ैनी अवं भेज़ोरोईं ते तैन कम पूरू केरि ज़ैन तैनी दित्तोरूए। 35 कुन तुस न ज़ोथ कि, फसल पकने हेजू च़ेवरे महीन्न बाकिन? अवं तुसन जो ज़ोताईं कि, अपनि एछ़्छ़ी घाड़ा! ते एजने बाले मैन्हन हेरा, ज़ैना पकोरे ऊडारां केरि फसलरे ज़ेरे आन। 36 फसल कटने बालन कम केरतां मज़दूरी मैल्ही राओरीए, यानी तैना लोकन अकोट्ठे केरि राओरेन ज़ैना लोकन हमेशारी ज़िन्दगी हासिल केरेले, ताके ज़ै बेते ते कटते साथी खुशी मनान। 37 एल्हेरेलेइ अक कहावते कि बेनेबालो कोईए ते कटने बालो होरो कोईए, तैन सच़्च़े। 38 मीं तुस भेज़े कि गाथ तैस फसली कट्टा ज़ै तुसेईं नईं बेवरी, होरेईं मेहनती सेइं कम कियूं ते तुसन तैन केरि मेहनतरो फल मैल्हो।"

39 नगरेरे बड़े लोकेईं तैस सैमरी कुआन्शरी गल शुन्तां यीशु पुड़ विश्वास कियो, किजोकि तैसां तैन लोकन सेइं ज़ोवं कि तैनी मीं सेइं सब किछ ज़ोवं, ज़ैन मीं कियेरू थियूं। 40 ज़ैस नगरेरे सामरी लोक यीशु कां एवरे थिये, मिन्नत केरतां ज़ोने लगे, असन कां बिश फिरी तै दूई दिहाड़े तैड़ी राव। 41 होरे भी बड़े लोक थिये ज़ैनेईं तैसेरी गल्‍लां शुन्तां तैस पुड़ विश्वास कियो। 42 तैनेईं तैस कुआन्शी जो ज़ोवं, "असेईं तेरी गल्‍लां शुन्तां विश्वास नईं कियोरो, बल्के असेईं अपने कन्नेईं शुनेरूए ते असेईं एन हुनी बुझ़ू कि ऐह मैन्हु सच़्च़े दुनियाई मुक्ति देनेबालोए।" 43 दूई दिहैड़ना बाद यीशु फिरी गलीलेरे पासे च़लो जेव। 44 ते यीशुए एप्पू ज़ोवरू थियूं, कि कोई नबी अपने मुल्खे मां इज़्ज़तरे काबल न समझ़ो गाए। 45 ज़ैखन तै गलीले मां अव त गलीली लोक तैस सेइं खुशी सेइं मिले, एल्हेरेलेइ कि तैनेईं तैन सब किछ ज़ैन तैनी फ़सहरे मौके यरूशलेम नगरे मां कियेरू थियूं, तैनेईं अपनि एछ़्छ़ेईं सेइं लाहेरू थियूं तैखन तैना एप्पू भी तैड़ी थिये।

46 दूइयोवं बार ज़ैखन तै गलील इलाकेरे काना ड्लाव्वें मां एवरो थियो ज़ैड़ी तैनी पानी दाछ़रो रस बनेवरू थियूं। तैड़ी अक बड़ो बड्डो राज़ेरो अफसर थियो तैसेरू मट्ठू कफरनहूम नगरे मां बिमार भोवरू थियूं। 47 ज़ैखन तैनी अफसरे शुनू कि यीशु यहूदिया इलाकेरां गलील इलाके मां एवरोए त तै यीशु कां पुज़्ज़ो ते मिन्नत केरतां ज़ोने लगो मेरू मट्ठू मरने बालूए तू च़ल ते तैस बज़्झ़ा, किजोकि तैन मरने बालू थियूं। 48 यीशुए तैस सेइं ज़ोवं, "ज़ांतगर तुस लोक निशान ते चमत्कार न लाहेले कधे विश्वास न केरेले कि, अवं मसीह आईं।" 49 तैनी बड्डे अफसरे ज़ोवं, "प्रभु लूश केर एरू न भोए कि मेरू मट्ठू मेरि गाए।" 50 यीशुए जुवाब दित्तो, "च़ल तेरू मट्ठू ज़ींतू भोनूए।" तैनी तैसेरी गल्‍लरो विश्वास कियो ते तैट्ठां च़लो जेव। 51 तै हेजू बत्तां थियो त तैसेरे नौकर तैस मैल्हे ते ज़ोने लगे, "तेरू मट्ठू ज़ींतूए।" 52 तैखन तै पुछ़ने लगो, "मेरू मट्ठू कैखन ज़ेरे बेझ़ोने लग्गोरू थियूं?" ते तैनेईं ज़ोवं "तैसेरो भुखार हीज दीसां एक्‍की बज़े उतरी जेवरो थियो।" 53 तैखन तैसेरे बाजी याद अवं कि, तैए मौको थियो, ज़ैखन यीशुए ज़ोवरू थियूं, "गा तेरू मट्ठू ज़ींतूए" तैखन तैनी भी ते तैसेरे पूरे टब्बरे यीशु पुड़ विश्वास कियो। 54 ई दूइयोवं चमत्कारेरो निशान थियो ज़ै यीशुए यहूदिया इलाकेरां वापस एजनेरां बाद गलील इलाके मां कियोरो थियो।