1 फ़सह तिहारेरे पेइले दिहाड़े यीशुए समझ़ू, कि मेरो दुनियाई मरां बाजी कां वापस गानेरो वक्त एवरोए। तै अपने लोकन सेइं ज़ैना दुनियाई मां थिये ज़ेरो प्यार केरतो थियो, तेरहो प्यार आखरी तगर केरतो राव। 2 शैताने शमौनेरे मट्ठे यहूदा इस्करियोतेरे दिले मां पेइले यीशु ट्लुवानेरो खियाल छ़डोरो थियो। यीशु त कने तैसेरे चेले ड्लाई खानेरो लगोरे थिये। 3 यीशु पतो थियो कि बाजे सैरी चीज़ां तैसेरे हथ्थे मां दित्तोरिन, ते कने तै परमेशरेरी तरफां एवरोए ते परमेशरे कांजो वापस च़लरोए। 4 एल्हेरेलेइ तै रोट्टी छ़ेडतां खड़ो उठो ते अपनु कोट खोल्‍लू, ते अक तोलियो अपने लखे सेइं पलैट्टो। 5 तैखन तैनी अक भांड ट्लाव ते तैस मां पानी छ़ड्डू ते अपने चेलां केरे पव धोइतां लखे बन्धोरे तोलिये सेइं पोंछ़े। 6 ज़ैखन तै शमौन पतरस कां अव त पतरसे ज़ोवं, "हे प्रभु, कुन तू मेरे पव धोने लगोरोस?" 7 यीशुए जुवाब दित्तो, "ज़ैन अवं केरने लगोरोईं तू हुन्ना न बुझ़स, पन पत्ती तू बुझ़ेलो।" 8 पतरसे तैस सेइं ज़ोवं, "तू मेरे पव कधे न धोई सकस!" यीशुए तैस सेइं ज़ोवं, "अगर अवं तेरे पव न धोई, त तू मेरो चेलो नईं।" 9 शमौन पतरस यीशु सेइं ज़ोने लगो, "हे प्रभु, तू मेरे पव नईं बल्के हथ ते दोग भी धो।" 10 यीशुए तैस सेइं ज़ोवं, "ज़ैनी निहावरूए, तैस पव्वां केरे अलावा होरू किछ धोनेरू किछ ज़रूरत नईं। तै बिलकुल शुद्धे, ते तुस शुद्धथ, पन सारे नईं।" 11 तै त ट्लुवांने बाले ज़ानतो थियो एल्हेरेलेइ तैनी ज़ोवं, "तुस सब शुद्ध नईं।"

12 ज़ैखन यीशुए सेब्भी केरे पव धोए त अपनु कोट लेइतां अपनि ठैरी बिश्शो तैखन तैनी तैन पुछ़ू, "कुन तुस समझ़तथ कि मीं तुसन सेइं कुन कियूं? 13 तुस मींजो गुरू, ते प्रभु ज़ोतथ, तुश्शू ज़ोनू ठीके, किजोकि अवं आईं। 14 अगर मीं तुश्शो गुरू त कने प्रभु भोइतां तुश्शे पव धोए, त तुश्शो भी फर्ज़े कि एक्‍की होरेरे पव धोथ। 15 किजोकि मीं तुसन अक नमूनो हिराव, कि ज़ेन्च़रे मीं पव धोए तुस भी एरू केरथ। 16 अवं तुसन सेइं सच़-सच़ ज़ोताईं, कि नौकर अपने मालिके करां बड्डो न भोए, ते न भेज़ोरो भेज़ने बाले करां। 17 तुस त एना गल्‍लां ज़ानतथ, ते अगर तैन पुड़ अमल केरतथ त तुस धन आथ। 18 अवं तुसन सेब्भी केरे बारे मां न ज़ोईं, ज़ैना मीं च़ुनोरेन अवं तैन ज़ानताईं, पन इन एल्हेरेलेइ आहे, कि पवित्रशास्त्रेरू एन वचन पूरू भोए, ज़ैने मेरी रोट्टी खाइ, तैए मेरे खलाफ भोव। 19 अवं तैन भोने करां पेइले तुसन ज़ोताईं कि ज़ैखन भोए त विश्वास केरथ कि अवं तैए आईं। 20 अवं तुसन सेइं सच़-सच़ ज़ोताईं कि, ज़ै मेरे भेज़ोरे कबूल केरते तै मीं कबूल केरते, ते ज़ै मीं कबूल केरते तै मेरे भेज़ने बाले कबूल केरते।"

21 एना गल्‍लां ज़ोइतां यीशु आत्माई मां उदास भोइतां बड़ो दुखी भोव, ते अपने चेलन सेइं ज़ोने लगो, "अवं तुसन सेइं सच़-सच़ ज़ोताईं, कि तुसन मरां एक्‍के अवं ट्लुवानोईं।" 22 चेले एक्‍की होरेरे पासे तकने लगे, किजोकि तैन पतो न थियो कि ऐह केसेरे बारे मां ज़ोने लगोरोए। 23 तैसेरे चेलन मरां अक चेलो ज़ैस सेइं यीशु प्यार केरतो थियो, यीशुएरे नेड़े बिशोरो थियो। 24 तैखन शमौन पतरसे तैसेरे पासे इशारे सेइं पुछ़ू, "ज़ो केसेरे बारे मां ज़ोने लगोरोए?" 25 तैखन तेन्च़रे यीशुएरे छैतरे पासे लिकतां पुछ़ू, "हे प्रभु, तै कौने?" 26 यीशुए जुवाब दित्तो, "ज़ैस अवं ई रोट्टरो टुक्ड़ो डोबतां देइलो तैए।" ते यीशुए टुक्ड़ो डोबतां शमौनेरे मट्ठे यहूदा इस्करियोती दित्तो। 27 ते टुक्ड़ो नेनेरे पत्ती तै शैतानेरे बस्से मां भोइ जेव, तैखन यीशुए तैस ज़ोवं, "तीं ज़ैन किछ केरनूए, लूशी केर।" 28 पन होरि केन्ची ऐह पतो न लगो कि ऐह गल यीशुए केसेरे बारे मां की। 29 यहूदा कां पेइंसां केरि थेलड़ी भोती थी, ते किछेईं समझ़ू, कि यीशु तैस सेइं ज़ोते, कि ज़ैन किछ असन तिहारेरे लेई लोड़ते तैन घिन्ने, या गरीबन किछ दे। 30 तैखन यहूदा टुक्ड़ो खेइतां बेइर च़लो जेव, तै रातरो वक्त थियो।

31 ज़ैखन तै बेइर जेव त यीशु ज़ोने लगो, "हुनी मैन्हेरे मट्ठे यानी मेरी महिमा भोइ, ते मेरे ज़िरिये परमेशरेरी महिमा भोइ, 32 ते परमेशर भी मीं एप्पू महिमा बालो केरेलो, बल्के जल्दी केरेलो। 33 हे मेरे दोस्तव, अवं किछ च़िरेरे लेई हेजू तुसन सेइं साथी आई, फिरी तुस मीं तोपेले, ते ज़ेन्च़रे मीं यहूदन भी ज़ोवं, ज़ैड़ी अवं गाताईं तैड़ी तुस न एज्जी बटथ, तेन्च़रे अवं तुसन सेइं भी ज़ोताईं। 34 अवं तुसन अक नंव्वो हुक्म देताईं कि, एक्‍की होरि सेइं प्यार केरा, ज़ेन्च़रे मीं तुसन सेइं प्यार कियो तुस भी एक्‍के होरि सेइं प्यार केरा। 35 अगर तुस एक्‍के होरि सेइं प्यार केरेले त सेब्भी लोकन पतो लग्गेलो, कि तुस मेरे चेलेथ।"

36 शमौन पतरसे तैस पुछ़ू, "हे प्रभु तू कोरहां च़लोरोस?" यीशुए जुवाब दित्तो, "ज़ेरां अवं च़लोरोईं तू हुना मीं सेइं साथी न एज्जी सकस, पन बादे मां एज्जी सकतस।" 37 पतरसे ज़ोवं, "हे प्रभु अवं हुना तीं सेइं साथी किना एज्जी सेखी? अवं त तेरे लेई अपनि जान भी देनेरे लेई तियार आईं।" 38 यीशुए जुवाब दित्तो, "कुन तू मेरे लेई अपनि जान देलो, अवं तीं सेइं सच़-सच़ ज़ोताईं कि कुकड़ बांग देने करां पेइले तू मेरो ट्लेइ बार इन्कार केरेलो।"