1 फिरी यीशुए अपने चेलन सेइं साथी च़लोरो थियो, ते तैनेईं अक मैन्हु लाव, ज़ै ज़र्मनेरो कानो थियो। 2 तैसेरे चेलेईं तैस पुछ़ू, "हे गुरू, केने पाप कियो कि ऐह कानो ज़र्मो, एने मैन्हे या एसेरे अम्मा बाजे?" 3 यीशुए जुवाब दित्तो, "न एने पाप कियो, न एसेरे अम्मा-बाजेईं, पन तै एल्हेरेलेइ कानो ज़र्मो ताके परमेशरेरे चमत्कार एसमां लेइहोन। 4 ज़ैने अवं भेज़ोरोईं, असेईं तैसेरू कम लूशी केरनू ज़रूरीए, ज़ैन कम तैनी असन दित्तोरूए, तै रात एजने बालीए ज़ैस मां कोई भी कम न केरि सके। 5 ज़ांतगर अवं दुनियाई मां आई, अवं दुनियारी लौ आई।" 6 एन ज़ोइतां तैनी ज़मीनी पुड़ थुकू, ते तैस थुक्‍के सेइं मित्ती सन्नी, ते तै मित्ती कानेरे एछ़्छ़न पुड़ लाई। 7 ते तैस सेइं ज़ोवं, "गा शीलोह नंव्वेरे हावदे मां अपनु तुत्तर धो" (शीलोह मतलब भेज़ोरो) तैनी गेइतां धोवं, ते लहंतो वापस अव। 8 तैखन तैस मैन्हेरे पड़ोसेईं त ज़ैनेईं तै भीख मगतो लावरो थियो, एक्‍की होरि सेइं ज़ोने लग्गे, "कुन ई तैए मैन्हु नईं ज़ै पेइलो बिशतां भीख मगतो थियो?" 9 किछ मैन्हु ज़ोने लगे, "ई तैए," होरेईं ज़ोवं, "नईं तैसेरो ज़ेरो कोई होरो भोनोए," तैनी ज़ोवं, "अवं तैए आईं।" 10 तैखन तैना तैस पुछ़ने लग्गे, "तेरी एछ़्छ़न केन्च़रां लौ आई?" 11 तैनी जुवाब दित्तो, "यीशु नंव्वेरे एक्‍की मैन्हे मित्ती सन्नी, ते मेरी एछ़्छ़न पुड़ लेइतां मीं सेइं ज़ोवं, गा शीलोह हावदे मां गेइतां अपनु तुत्तर धो, ते अवं जेव ते मीं तुत्तर धोवं, ते लहंने लव।" 12 तैनेईं तैस पुछ़ू, "तै मैन्हु कोड़िए?" तैनी ज़ोवं, "मीं नईं पतो।"

13 लोकेईं तै ज़ै पेइलो कानो थियो फरीसी लोकन कां नेव। 14 ज़ैस दिहाड़े यीशुए मित्ती सेनतां तैसेरी एछ़्छ़न लौ दित्तोरी थी, तै आरामेरी दिहाड़ी थी। 15 फिरी फरीसी लोकेईं भी तैस पुछ़ू, "तैसेरी एछ़्छ़न लौ केन्च़रे आई?" तैनी तैन सेइं ज़ोवं, "तैनी मेरी एछ़्छ़न पुड़ मित्ती लाई, फिरी मीं तुत्तर धोवं, ते अवं हुनी लहताईं।" 16 एस पुड़ किछ फरीसी लोक ज़ोने लगे, "ऐह मैन्हु परमेशरेरे तरफां नईं, किजोकि ऐह आरामेरी दिहाड़ी न मन्ने।" होरेईं ज़ोवं, "एरो ज़ेरो पापी मैन्हु एरे चमत्कार केन्च़रे हिरेई बटते?" ते तैन एप्पू मांमेइं अनबन भोइ। 17 तैनेईं काने फिरी पुछ़ू, "ज़ैने तेरी एछ़्छ़ी खोलोरिन, तू तैसेरे बारे मां कुन ज़ोतस?" तैनी ज़ोवं, "तै नबी आहे।"

18 पन यहूदी लीडरन विश्वास न भोव, कि तै कानो थियो ते हुनी लहते, ज़ांतगर तैनेईं, तैसेरे अम्मा-बाजी न कुजाए। 19 तैन पुछ़ू, कुन एन तुश्शू मट्ठूए, "ज़ैस तुस ज़ोतथ कि कानो ज़र्मोरू थियूं? फिरी हुना केन्च़रां लहते?" 20 तैसेरे अम्मा बाजीए जुवाब दित्तो, "असां त ज़ानतम कि एन इश्शू मट्ठूए, ते कानो ज़र्मोरू थियूं। 21 पन अस इन न ज़ानतम कि अज़ केन्च़रे लहते, ते न इन ज़ानतम कि केने एसेरी एछ़्छ़न लौ दित्ती, एन हुनी बड्डूए एस पुछ़ा, ऐह अपने बारे मां एप्पू ज़ोलो।" 22 एना गल्‍लां तैसेरे अम्मा बाजे एल्हेरेलेइ ज़ोई तैना यहूदी लीडरन करां डरते थिये, किजोकि यहूदी लीडर सारे अक भोवरे थी, कि अगर कोई ज़ोए, कि ऐह मसीहे त तै प्राथना घरे मरां कढो गाए। 23 एल्हेरेलेइ तैसेरे अम्मा बाजे ज़ोवं, "एन बड्डूए, एस्से पुछ़ा।"

24 तैखन तैस मैन्हु ज़ै कानो थियो, दूइयोवं बार कुजेइतां ज़ोवं, "सच़ ज़ोइतां परमेशरेरी बडीयाई केर, अस ज़ानतम तै मैन्हु पापीए।" 25 तैनी जुवाब दित्तो, "अवं न ज़ैनी कि ऐह पापी कि नईं, अवं अक गल ज़ानताईं, कि अवं कानो थियो हुनी लाताईं।" 26 तैनेईं तैस पुछ़ू, "तैने तीं सेइं कुन कियूं? तैनी केन्च़रे तेरी एछ़्छ़न लौ दित्ती?" 27 तैनी तैन सेइं ज़ोवं, "मीं त तुसन सेइं ज़ोवरूए, ते तुसेईं न शुनू, हुनी दूइयोवं बार किजो शुनू चातथ? कुन तुस भी तैसेरे चेले बन्ने चातथ?" 28 तैखन तैना तैस बुरू भलू ज़ोने लगे, "तूए तैसेरो चेलोस, अस त मूसेरे चेलेम।" 29 अस ज़ानतम परमेशरे मूसा सेइं गल्‍लां की, पन एस न ज़ानम कि ऐह कोट्ठां एवरोए। 30 तैनी तैन जुवाब दित्तो, "ऐह त बड़ी बड्डी गल्‍ले कि तुस न ज़ानथ कि ऐह कोट्ठां एवरोए, फिरी भी तैनी मेरी एछ़्छ़न लौ दित्ती। 31 अस ज़ानतम की परमेशर पापी केरि न शुने, पन कोई परमेशरेरो भक्त भोए त तैसेरे मेर्ज़ी पुड़ च़लतो भोए, त परमेशर तै तैसेरी शुनते। 32 दुनिया रच़नेरे वक्ते करां कधे शुन्ने मां नईं एवरोए कि केन्चे ज़र्मनेरे कानेरी एछ़्छ़न लौ दित्तोरी, 33 अगर ऐह मैन्हु परमेशरेरे तरफां न भोथो त किछ न केरि सकेथो।" 34 तैनेईं तैस ज़ोवं, "तू त बिलकुल पापन मां ज़र्मोरोस, तू असन शिखालतस?" ते तैनेईं तै प्राथना घरे मरां बेइरोवं कढो।

35 यीशुए शुनू कि तै बेइरोवं कड्डोरोए, ते ज़ैखन तैसेरी तैस सेइं मुलाकात भोइ, त तैस सेइं ज़ोवं, "कुन तू मैन्हेरे मट्ठे पुड़ विश्वास केरतस?" 36 तैनी तैस जुवाब दित्तो, "हे प्रभु, मीं सेइं ज़ो कि तै कौने, ताके अवं तैस पुड़ विश्वास केरि?" 37 यीशुए तैस सेइं ज़ोवं, "अव्वें आईं, तीं अवं पेइलो लाहोरोईं, ज़ै तीं सेइं गल्‍लां केरि राओरोए।" 38 तैनी ज़ोवं, "हे प्रभु, अवं तीं पुड़ विश्वास केरताईं।" ते तैस कां मथ्थो टेको। 39 तैखन यीशुए ज़ोवं, "अवं इस दुनियाई मां ई न्याय केरने एवरोईं, ज़ैना न लहन तैना लहन, ते ज़ैना लातन तैना काने भोन।" 40 ज़ैना फरीसी लोक तैस सेइं साथी थिये तैनेईं ज़ोवं, "कुन तू असन जो भी काने ज़ोतस?" 41 यीशुए तैन सेइं ज़ोवं, "अगर तुस काने भोथे त पापी न भोथे, पन हुनी ज़ोतथ कि अस लहतम, एल्हेरेलेइ तुश्शे पाप माफ़ न भोल्हे।"