भजन संहिता 45

ड्लाहेरू गीत

साज़ बज़ानेबालेरे प्रधानेरे लेई शोशन्नीमे मां कोरह खानदानेरे लोकां केरो मश्कील। प्यारेरू गीत

1 मेरो दिल एक्‍की खूबसूरत विषयरे उमंगी सेइं

छ़लकने लगोरोए,

ज़ै गल मीं राज़ेरे बारे मां रच़ी तैस शुनताईं;

मेरी ज़िभ माहिर लिखने बाली बनोरीए।

2 तू मैन्हन मां सेभन करां खूबसूरत;

तेरे ओठन मां अनुग्रह भरोरोए;

एल्हेरेलेइ परमेशरे तीं हमेशारे लेई

बरकत दित्तोरीए।✝45:2 लूक. 4:22;इब्रा. 1:3-4.

3 हे बहादर, अपनि तलवारी अपने लख्खे सेइं बन्ध ते अपनि महिमा

ते प्रतापे लिगड़ां केरो ज़ेरो ला।

4 सच़्च़ाई, नम्रता ते धार्मिकतारे खातर

अपनि शान-ओ-शोकती पुड़ सुवार भो;

तेरो देइनो हथ तीं भयानक कम्मां शिखाले!

5 तेरे तीर त तेज़न,

तेरे सामने मुल्खे-मुल्खेरे लोक बिछ़ड़ेले;

राज़ेरे दुश्मना केरे दिल तैन सेइं कोशेलो।

6 हे परमेशर, तेरो तखत हमेशारे लेई बनोरो रालो;

ते राज़दण्ड न्यायेरो आहे।

7 तीं धार्मिकताई सेइं प्यार ते दुष्टे सेइं नफरत कियोरीए,

एल्हेरेलेइ परमेशरे हाँ, तेरे परमेशरे

खुशरे तेले सेइं अभिषेक केरतां तेरू तेरे सैथन करां

कही जादे अभिषेक कियोरूए।✝45:7 इब्रा. 1:8-9.

8 तेरां सारां लिगड़ां गन्धरस, अगर, ते तेजे सेइं

खुशबूदार आन,

तू हाथी दंतेरे भवनन मां तारीबाले बाज़ां केरे

वजाई सेइं खुशी भोवरोस।

9 राजकुमैरी तेरो गेहनो लेइतां च़ेलचन;

तेरे देइने पासे पटरानी, ओपीरेरे कुन्दने

सेइं सज़ोरीए।

10 हे राजकुमारी, शुन मेरी गल्‍ली पुड़ ध्यान दे;

अपने लोकन ते अपने बाजेरे घरे बिस्सरी गा;

11 ते राज़ो तेरे रूपेरी इच्छा केरेलो।

किजोकि तै त तेरो प्रभुए, तू तैसेरी आदर केर।

12 सोर नगरेरी राजकुमारी भी मुलाकात केरनेरे लेई

हाज़र भोल्ही,

ते कौमां केरे अमीर लोक तीं खुश केरनेरी

कोशिश केरेले।

13 राजकुमारी मेहले मां बड़ी खूबसूरते;

तैसारां लिगड़ां सोन्नेरे धैगेईं सेइं बुनोरन।

14 तै कढ़ाई कियोरां लिगड़ां लुवेइतां राज़े कां

पुज़ाई गाली।

ज़ैना कुइयां तैसेरी सहेलिन,

तैना तैस पत्ती-पत्ती च़ेलती तीं कां पुज़ेई गैली।

15 तैना खुशी ते मघन भोइतां पुज़ेई गैली,

ते तैना राज़ेरे मेहले मां दाखल भोल्ही।

16 तेरे बुज़ुर्गां केरि ठैरी तेरी औलाद भोल्ही;

ज़ैन्न तू सारी ज़मीनी पुड़ हाकिम ठहरालो।

17 अवं एरू केरेलो, कि तेरे नंव्वेरी चर्चा

पीढ़ी करां पीढ़ी तगर भोती राली;

इस वजाई सेइं मुल्ख-मुल्खेरे लोक सदा तेरू

शुक्र केरते राले।