भजन संहिता 67

शुक्रेरू भजन

बज़ानेबालां केरे प्रधानेरे लेई तारीबाले बाज़न सेइं भजन

1 परमेशर असन पुड़ अनुग्रह केरे ते असन बरकत दे;

तै अपने तुत्तरेरी लौ असन पुड़ चमकाए, (सेला)

2 ज़ैस सेइं तेरी बत ज़मीनी पुड़,

ते तेरी कियोरी मुक्ति सारे कौमन मां ज़ानी गाए।✝67:2 लूक. 2:30-31;तीत. 2:11.

3 हे परमेशर, मुल्ख-मुल्खेरे लोक तेरू शुक्र केरन,

मुल्ख-मुल्खेरे सब लोक तेरू शुक्र केरेले।

4 रियासतां-रियासतां केरे लोक आनन्द केरन,

ते जयजयकार केरन,

किजोकि तू मुल्ख-मुल्खेरे लोकां केरो धार्मिकताई सेइं न्याय केरेलो,

ते दुनियारे रियासतां-रियासतां केरे लोकां केरि अगवाई केरेलो। (सेला)

5 हे परमेशर, मुल्ख-मुल्खां केरे लोक तेरू शुक्र केरन;

मुल्ख-मुल्खेरे सब लोक तेरू शुक्र केरन।

6 ज़मीन अपनि फसल देचे,

परमेशर ज़ै इश्शो परमेशरे, तैने असन बरकत दित्ती।

7 परमेशर असन बरकत देलो;

ते दुनियारे दूर-दूर मुल्खां केरे सब लोक तैसेरो डर मन्नेले।