1 अवं परमेशरे सेइं प्यार केरताईं, एल्हेरेलेइ कि यहोवा मेरी बिनती शुनोरीए।

2 तैनी अपनो कन मेरे पासे लेवरोए,

ते एल्हेरेलेइ अवं सैरी उमरी तैस्से पुकारतो रेइलो।

3 मौतरी रेस्सी मेरे च़ेवरे पासन थी;

ते पातालेरी परेशैनी मीं पुड़ एवरी थी;

मीं मुसीबत ते दुख झ़ैलनो पेव।

4 तैखन मीं यहोवा कां प्राथना की,

"हे यहोवा, मेरी बिनती शुन्तां मेरे प्राण बच़ा!"

5 यहोवा महरबान ते धर्मीए;

ते इश्शो परमेशर दया केरनेबालोए।

6 यहोवा सिद्धे सादे लोकां केरि हिफाज़त केरते;

ज़ैखन अवं पस्त भोवरो थियो, त तैनी अवं बच़वरोईं।

7 हे मेरे प्राण, तू आरामेरी ठैरी वापस एई;

किजोकि यहोवा तीं सेइं भलियाई कियोरीए।

8 तीं त मेरी जान मौती करां,

ते मेरी एछ़्छ़ी लेरां देने करां

ते मेरे पव ठोकर खाने करां बच़ावरेन।

9 अवं ज़ींतो रहते,

अपने आपे यहोवारे सामने ज़ैनतां च़लतो रेइलो।

10 मीं ज़ैन एरू ज़ोवरूए, इस यहोवारे विश्वासेरे कसौटी पुड़ केस्तां ज़ोवरूए।

"अवं त बड़ो दुखी आईं;"

11 मीं बड़े जल्दी ज़ोवं,

"सब मैन्हु झूठे आन।"

12 यहोवा मीं सेइं ज़ेत्री भलियाई कियोरीए,

तैन केरे बदले अवं तैस कुन देईं?

13 अवं मुक्तरो कुटोरो छ़ुइतां

यहोवा कां प्राथना केरेलो,

14 अवं यहोवारे लेई अपनि मिन्नतां, सेभी केरे नज़री मां बांदे मां, तैसेरे सारे लोकां केरे सामने पूरी केरेलो।

15 यहोवारे भक्तां केरि मौत

तैसेरी नज़री मां बड़ी कीमतीए।

16 हे यहोवा, शुन अवं त तेरो दास आईं;

अवं तेरो दास आईं, ते तेरी दैसरू मट्ठू आईं।

तीं मेरे बन्धन खोलोरेन।

17 अवं तीं कां शुक्रेरी बलि च़ैढ़ेलो,

ते यहोवा कां प्राथना केरेलो।

18 अवं यहोवारे लेई अपनि मिन्नतां,

बांदे मां तैसेरे सारे लोकां केरे सामने

19 यहोवारे भवनेरे अंगने मां,

हे यरूशलेम, तेरे मझ़ाटे तैना पूरी केरेलो,

यहोवारी तारीफ़ केरा!