भजन संहिता 114

फ़सह तिहारेरू गीत

1 ज़ैखन इस्राएली लोक मिस्र मुल्खे मरां, मतलब याकूबेरू टब्बर होरि भाषा केरनेबालन मरां निस्सू।

2 तैखन यहूदा यहोवारी पवित्र ठार,

ते इस्राएल तैसेरे राज़्ज़ेरे लोक भोइ जे।

3 एन हेरतां लाल समुन्दर नेश्शी जेव,

ते यरदन दरिया उलटे पासे बगने लगो। *114:3 इस वचने मां भजन लिखने बालो कादेशेरे बीतनारे बारे मां ज़ोते। निर्ग. 17:1-7; गिन. 20:1-13; भज. 78:13-16,20

4 पहाड़ां हुड़ां केरां ज़ेरां उछ़ड़ने लगां,

ते पहैड़ी भैड्डां-छ़ेल्‍ली केरे बच्‍चां केरि ज़ेरि उछ़ड़ने लेग्गी।

5 हे समुन्दर तीं कुन भोवं, कि तू नेश्शी जेव?

हे यरदन दरिया कुन भोवं कि तू नेश्शी जेव?

6 हे पहाड़व, तुसन कुन भोवं, कि भैड्डां केरे ज़ेरे,

ते पहैड़व तुसन कुन भोवं, कि तुस भैड्डां-छ़ेल्‍ली केरे बच्‍चां केरि ज़ेरि उछ़ड़ी?

7 हे ज़मीन प्रभुएरे सामने,

हाँ, याकूबेरे परमेशरेरे सामने थर्क।

8 तै चट्टानी पैनेरे तालाब,

चकमकेरे घोड़ पैनेरो नाग बनाते।