भजन संहिता 39

अक्ल ते मैफरे लेई प्राथना

यदूतून प्रधान बज़ानेबालेरे लेई दाऊदेरू भजन

1 मीं अपने आपे सेइं ज़ोवं, "अवं रोड़ी चाल च़लेलो,

ताके मेरी ज़िभी सेइं पाप न भोए;

ज़ांतगर दुष्ट मेरे सामने,

तांतगर अवं लगाम लेइतां अपनु आशी बंद केरतां रेखेलो।"✝39:1 याक. 1:26.

2 अवं च़ुप भोइतां लट्टो बेनि जेव,

भलैइयरे पासे भी च़ुप रेइलो;

ते मेरी तकलीफ बेधी जेई,

3 मेरो दिल अन्तरे अन्ते फुकोने लगोरो थियो।

सोचते-सोचते अग भेड़की जेई;

तैखन मीं अपने ज़बाना सेइं ज़ोवं;

4 "हे यहोवा, एरू केर कि मेरो अन्त,

मीं पतो लग्गे, ते इन भी

कि मेरी उमरारे दिहाड़े केत्रेन;

ज़ैस सेइं मीं पतो च़ले मेरी ज़िन्दगी केत्री बंच़ोरीए!

5 हेर, तीं मेरी उमर पल भरेरी रख्खोरी,

ते मेरी ज़िन्दगी तेरी नज़री मां किछ अथ्थी नईं,

सच़्च़े सब मैन्हु केरहे कायम

किजो न भोन फिरी भी बेकार ठहरतन।

6 सच़्च़े मैन्हु छावरो ज़ेरो च़लते;

सच़्च़े तैना बेकार घबरातन;

तै धन अकोट्ठू त केरते

पन न ज़ाने कि तैस कौन नेलो!

7 हुनी हे प्रभु, अवं कोस गल्‍लरो इंतज़ार केरि?

ते उमीद त तेरे तरफां आहे।

8 मेरे सारे पापन करां मीं छुटकारो दे,

बेवकूफ मेरी निन्दा न केरि सके।

9 अवं च़ुप भोवरोईं, ते मीं आशी न खोल्‍लू;

किजोकि इन कम तींए कियोरूए।

10 तीं ज़ै मुसीबत मीं पुड़ छ़डोरीए

तैस मीं करां दूर केर,

किजोकि तेरे हथ्थां केरि मारी सेइं

अवं भस्म भोइ गाताईं।

11 ज़ैखन तू इन्साने तैसेरे पापेरे वजाई सेइं

झ़िड़कतां सज़ाह देतस;

तैखन तू तैसेरी शेक्ति कीड़ेरे ज़ेरे नाश केरतस;

सच़्च़े सब मैन्हु बेबसन।

12 हे यहोवा, मेरी प्राथना शुन, ते मेरी मद्दतरे लेई बिनती पुड़ ध्यान दे;

मेरी लेरां शुन्तां च़ुप न रा!

किजोकि अवं तीं सेइं साथी अक परदेशी मुसाफरेरो ज़ेरो रहताईं,

ते अपने सब सियांनां केरो ज़ेरो परदेशी आईं।✝39:12 इब्रा. 11:13.

13 ओ! इस करां पेइले अवं इट्ठां च़ेलि गेईं

ते न रेईं गेईं,

मीं बच़ा ज़ैस सेइं अवं खुशहाल ज़िन्दगी हासिल केरि सेकी!"