1 हे परमेशर, मीं बच़ा, अवं हड़ेरे पैनी मां डुबी राहोरोईं।

2 अवं बड़े च़िकरी मां डुबने लगोरोईं, ते मेरे पव कोन्ची न रुकन;

अवं डुग्घे पैनी मां एज्जी जेव, ते पैनी मां डुब्बी गाताईं।

3 अवं पुकारते-पुकारते थेकी जेव, मेरू गल बन्द भोइ जेवरूए;

अपने परमेशरेरो इंतज़ार केरते-केरते मेरी एछ़्छ़ी केनोई जेवरिन।

4 ज़ैना बिलावजह मीं सेइं बैर रखतन, तैना गिनती मां मेरे दोग्गेरे बालन करां भी जादेन;

मेरे नाश केरनेबाले ज़ैना बेकार मेरे दुश्मन आन, तैना ताकतबरन,

एल्हेरेलेइ ज़ैन मीं लुटोरू नईं तैन भी मीं देनू पेव।✝

5 हे परमेशर, तू त मेरी बेवकूफी ज़ानतस,

ते मेरे दोष तीं करां छ़पोरे नईं।

6 हे प्रभु, हे सेना केरे यहोवा, ज़ैना तेरे इंतज़ारे मां आन, तैना मेरे ज़िरिये सेइं शरमिन्दे न भोन;

हे इस्राएलेरे परमेशर, ज़ैना तीं तोपतन, तैना मेरे वजाई सेइं बेइज़्ज़त न भोन।

7 तेरे वजाई सेइं मेरी निन्दा भोवरीए,

मेरू तुत्तर शरमी सेइं ढेक्‍की जेवरूए।

8 अवं अपने इस्राएली ढ्लां केरे सामने बखलो भोव,

ते अपने सक्‍के ढ्लां केरे नज़री मां परदेशी भोवरोईं।

9 किजोकि, अवं तेरे भवनेरे लेई फुकोते-फुकोते भस्म भोइ जेव,

ते ज़ैना तुहीन तैना तेरी केरतन, तैए तुहीन मीं बरदाश केरनी पेतीए।✝

10 ते ज़ेइस अवं लेरां देतो ते बरत रेखतां दुख झ़ैलतो थियो,

तैखन तैस सेइं भी मेरी बदनामी भोइ।

11 ते ज़ैखन अवं मातमेरां लिगड़ां लेइतां थियो,

तैखन मेरी मसाल तैन मां च़लती थी।

12 ज़ैना बुज़ुर्ग नगरेरे दारे पुड़ बिशोरेन, तैना मेरे बारे मां गलबात केरतन,

ते शराब पीनेबाले मेरां गीतां बनेइतां ज़ोंते रहतन।

13 पन हे यहोवा, मेरी प्राथना त तेरी खुशरे वक्ते मां भोइ राहोरीए;

हे परमेशर अपने बड़े दयाई सेइं,

ते बच़ानेरे अपने सच़्च़ो वाधेरे मुताबिक मेरी शुनी।

14 मीं च़िकरी मरां कढ, कि अवं डुब्बी न गेईं;

अवं अपने दुश्मन्न सेइं, ते डुग्घे पैनी मरां बेच़ी।

15 हड़ाई मां डुब्बी न गेईं,

ते अवं डुग्घे पैनी मां डुबतां न मेरि,

ते न पातालेरू आशी मीं पुड़ बन्द भोए।

16 हे यहोवा, मेरी प्राथना शुन, किजोकि तेरी दया बड़ी रोड़ीए;

एपनी बड़े दयारे मुताबिक मेरे पासे ध्यान दे।

17 अपने दासे करां अपनु तुत्तर न फिरा;

किजोकि अवं मुसीबती मां आईं, जल्दी मेरी प्राथना शुन।

18 मेरे नेड़े एइतां मीं छुटा,

ते मेरे दुश्मन्न करां मीं छुटकारो दे।

19 तू मेरी बदनामी ते मेरी शर्मिन्दगी ते मेरी बेइज़्ज़ी ज़ानतस:

मेरे सब दुश्मन तेरे सामनेन।

20 तैन केरे बदनैमरे वजाई सेइं मेरो दिल फेटी जेव, ते अवं बड़ो उदास आईं।

मीं कोन्ची तरस खाने बालेरी उमीद त की,

पन कोई न मैल्हो,

ते तसल्‍ली देनेबाले त तोपतो राव, पन कोई न मैल्हो।

21 लोकेईं मीं खाने जो ज़ेहर दित्तू,

ते मेरी ट्लिश मुकानेरे लेई सिरको पियाव।✝

22 तैन केरि रोट्टी तैन केरे लेई फंदो;

ते तैन केरे सुखेरे वक्ते जाल बेनि गाए।

23 तैन केरि एछ़्छ़ी कैनी भोन, ताके तैना लेही न बटन;

ते तू तैन केरि पिठ हमेशा हिलातो रास।✝

24 अपनि सरक तैन पुड़ कढ,

ते तेरे क्रोधेरी लप तैन लग्गे।✝

25 तैन केरे तेम्बु उज़ड़ी गान,

ते तैन केरे घरन मां कोई न राए।✝

26 किजोकि ज़ैस तीं सज़ाह दित्ती तैस्से तैना सतातन,

ते ज़ैना तीं ज़खमी किये, तैना तैन केरि तकलीफरी चर्चा केरतन।✝

27 तैन केरे अधर्मे पुड़ अधर्म बधो;

ते तैना तेरे धर्मे हासिल न केरन।

28 तैन केरू नवं ज़िन्दगरे किताबी मरां कट्टू गाए,

ते धर्मी लोकन सेइं साथी लिखू न गाए।✝

29 पन अवं त दुखी आईं ते तकलीफी मां आईं,

एल्हेरेलेइ हे परमेशर, तू मेरी मुक्ति केरतां मीं उच्‍चे ठैरी पुड़ बिशाल।

30 अवं, परमेशरेरे नव्वेंरी तारीफ़ केरेलो, ते गीत ज़ोइतां तेरे नंव्वेरी बडीयाई केरेलो,

ते शुक्र केरतां तेरी तारीफ़ केरेलो।

31 इन यहोवा दांतेरे बलिदाने करां जादे,

बल्के शिंगां ते रौन्ने बाले दांतेरे बलिदाने करां जादे पसंद एज्जेलू।

32 हलीम लोक इन हेरतां खुश भोल्हे,

हे परमेशरेरी तलाश केरनेबालव तुश्शे मन हरे भरे भोन।

33 किजोकि यहोवारी ज़ैन ज़रूरते तैन केरे पासे मन लाते,

ते अपने लोकन ज़ैना कैदी आन तैन घटिया न समझ़े।

34 ज़मीन ते अम्बर तैसेरी तारीफ़ केरन,

ते समुन्दर ते ज़ैन किछ तैस मांए तैस समेत तैसेरी तारीफ़ केरन।

35 किजोकि परमेशर सिय्योने* मुक्ति देलो,

यहूदारे प्रदेशेरे नगरन फिरी बसालो;

ते लोक फिरी तैड़ी बेसतां तैसेरे अधिकारी भोइ गाले।

36 परमेशरेरे दासां केरि औलाद तैस अपने हिस्से मां हेरेली,

ते तैसेरे नंव्वे सेइं प्यार केरनेबाले तैस मां बास केरेले।