1 यहोवारी तारीफ़ केरा!

किजोकि अपने परमेशरेरू भजन ज़ोनू रोड़ूए;

किजोकि तैन मन पसंदे, तैसेरी तारीफ़ केरनी जाइज़े।

2 यहोवा यरूशलेमे बसेई राहोरोए;

तै तितर-बितर कियोरे इस्राएली लोकन अकोट्ठे केरि राहोरोए।

3 यहोवा दुखी दिलेरे बिमारन बझ़ाते,

ते तैन केरे ज़खमन पुड़ पट्टी बन्धते।

4 तै तारन गन्ते,

ते तैन मरां हर एक्‍केरू नवं रखते।

5 इश्शो प्रभु महान ते बड़ो शेक्ति बालोए;

तैसेरी अक्लरी कोई हद नईं।

6 यहोवा हलीम लोकन सम्भालते,

ते दुष्ट लोकन ज़मीनी पुड़ बुछ़ोड़ते।

7 शुक्र केरते यहोवारू गीत ज़ोथ;

सैन्गी बज़ेइतां इश्शे परमेशरेरू भजन ज़ोथ।

8 तै अम्बर बिदलारी सेइं भरते,

ते ज़मीनरे लेई झ़ड़ी तियार केरते; ते पहाड़न पुड़ घास उगाते।

9 तै जानबरन ते कंव्वेरे बच्‍चन ज़ैना पुकारतन

तैन खुवाते

10 न तै घोड़ां केरि ताकती सेइं खुशी भोए,

ते न तै सिपेहेरे मज़बूत पव्वन सेइं खुशी भोते।

11 यहोवा तैन्ने पुड़ खुश भोते, ज़ैना तैसेरो डर मनतन,

मतलब तैन सेइं ज़ैना तैसेरी प्यारे पुड़ उमीद रखतन।

12 हे यरूशलेम, यहोवारी तारीफ़ केर!

हे सिय्योन, अपने परमेशरेरी तारीफ़ केर!

13 किजोकि तैनी तेरे फाटकां केरे खम्भे पक्‍के कियोरेन,

ते तेरे औलादी बरकत दित्तोरिए।

14 तै तेरे सरहद्दी मां शान्ति देते,

ते तीं रोड़े करां रोड़े गेहुंन सेइं रज़ानते।

15 तै ज़मीनी पुड़ अपने हुक्मेरो प्रचार केरते,

ते तैसेरू वचन बड़े लूशी पुज़ते।

16 तै उन्ना केरो ज़ेरो हिंवे बखाते,

ते मांज़नरो ज़ेरो पालो खिलारते।

17 तै आण बखाते,

तैसेरी कियोरी ठंड कौन झ़ेल्‍ली सकते?

18 तै हुक्म देइतां तैन गालते;

तै बात च़लाते, तैखन पानी बगने लगते।

19 तैनी याकूबे अपनु वचन,

ते तै इस्राएली लोकन एपनी विधि ते नियम ज़ोते।

20 कोन्ची होरि राष्ट्रन सेइं तैनी एरहो बर्ताव नईं कियोरो;

ते तैसेरे नियम होरेईं न ज़ाने।

यहोवारी तारीफ़ भोए।