1 हे परमेशर, मेरी प्राथना शुन;

ते मेरी बिनती करां तुत्तर न फिरा!

2 मेरे पासे ध्यान दे, ते मीं जुवाब दे;

अवं मुसीबतां केरे वजाई सेइं बेचैन भोताईं।

3 किजोकि मेरे दुश्मन शोर

ते दुष्ट ज़ुलम केरि राहोरेन;

तैना मीं पुड़ इलज़ाम लातन,

ते सेरकोइतां सतातन।

4 मेरे अन्तर मेरो दिल तेड़फती राहोरोए,

मौतरो डर मीं मां पेवरोए।

5 डर ते थरकां अवं ट्लेइ छ़डो,

ते डरे अवं दबेईं छ़डो।

6 तैखन मीं ज़ोवं, "रोड़ू भोथू कि कबूतरेरां ज़ेरां मेरां फंघां भोथां

त अवं उडरी गाथो ते मीं आराम मैलेथो!

7 तैखन अवं दूर तगर नेशतां गेइयेथो

ते सुनसान ठैरी मां राथो।

8 अवं बड़े आँधी तूफाने

करां बेच़तां कोन्ची छ़पनेरी ठैरी जो नशेथो।"

9 हे प्रभु, तैन उलझा,

तैन केरि भाषाई मां गड़बड़ी छ़ड;

किजोकि मीं नगरे मां हर पासे ज़ुलम ते लड़ाई लाहोरीए।

10 रात-दिहैड़ी तैना तैस शहरपनाही पुड़ गुस्तां चक्‍कर लातन;

ते तैन केरे अन्तर धोखो ते बुराई पैदा भोचे।

11 तैस मां बुरैइयां डेरो लेवरोए;

ते ज़ुलम ते फरेब तैन केरे चौके करां दूर न भोन।

12 ज़ै मेरी बदनामी केरते तै दुश्मन नईं,

अगर भोथो अवं बरदाशत केरेथो;

ज़ै मेरे खलाफ बड़कां मारते तै मेरो दुश्मन नईं,

नईं त अवं तैस करां छ़ेप्पी गाथो।

13 पन तै त तूए थियो ज़ै मेरे बराबर मैन्हु

मेरो पक्‍को दोस्त ते मेरी ज़ान पिशानरो थियो।

14 अस एप्पु मांमेइं केरही-केरही मिट्ठी गल्‍लां केरते थिये;

अस बड़े लोकन सेइं साथी परमेशरेरे घरे मां गाते थिये।

15 मौत अचानक तैन पुड़ एइतां ट्लेइ छ़डे; तैना ज़ींते पाताले मां उतरी गान;

किजोकि बुराई तैन केरे घरन मां ते अन्तरे।

16 पन अवं त मद्दतरे लेई परमेशरे कां प्राथना केरेलो;

ते यहोवा मीं बच़ालो।

17 ड्लवझ़ी, झ़ेझ़ां, दुपहरेईं, ट्लेइ पहर

अवं बिनती केरेलो ते करलातो रेइलो

ते परमेशर मेरो शब्द शुनेलो।

18 ज़ै लड़ाई मेरे खलाफ मच़ोरी थी, तैस करां अवं तैनी आरामे सेइं छुटेवरोइं।

तैनेईं त बड़े लोक साथी नेइतां मेरो सामनो कियोरो थियो।

19 परमेशर ज़ै शुरू करां देंतो अपने तखते पुड़े, इन शुन्तां तैन जुवाब देलो। (सेला)

इना तैना आन ज़ैन मां कोई बदलाव नईं, ते तैन मां परमेशरेरो डर अथ्थी नईं।

20 तैनी अपने मेल रखनेबालन पुड़ भी अपनो हथ खड़ो कियोरोए;

तैनी अपनो करार ट्लोड़ोरोए।

21 तैन केरि ज़बानरी गल्‍लां मखनी करां जादे मुलायम थी;

पन तैसेरे मने मां लड़ैइअरी गल्‍लां थी;

तैसेरी गल्‍लां तेले करां भी जादे नर्म त थी

पन नग्गी तलवारां थी।

22 अपनो बोझ यहोवा पुड़ छ़ड तै तीं सम्भालेलो;

तै धेर्मी कधे हिलने न देलो।✝

23 पन हे परमेशर, तू तैन लोकन मौतरे गत्ते मां छ़डेलो;

खूनी ते धोखेबाज़ अध्धी उमरी तगर भी ज़ींते न राले।

पन अवं तीं पुड़ भरोसो रखेलो।