भजन संहिता 63

ट्लिशरो मन परमेशरे मां रज़्ज़ते

दाऊदेरू भजन; ज़ैखन यहूदारे जंगले मां थियो।

1 हे परमेशर, तू मेरो परमेशर आस,

अवं तीं दिले सेइं तोपेलो;

शुकोरी ते ट्लिशोरी ज़मीनी मां ज़ैड़ी पानी नईं,

मेरे मने तेरी ट्लिशे, मेरो जिसम तेरी बड़ी इच्छा केरते।

2 एन्च़रे सेइं मीं पवित्र ठारी मां तीं पुड़ नज़र की,

कि तेरी शक्ति ते महिमा हेरी।

3 किजोकि तेरी दया ज़िन्दगी भर बड़ी रोड़ीए,

अवं तेरी तारीफ़ केरेलो।

4 एन्च़रे सेइं अवं ज़िन्दगी भर तीं धन ज़ोतो रेइलो;

ते तेरू नवं घिन्तां अपने प्राथनाई मां हथ खड़े केरेलो।

5 मेरी जान ज़ेन्च़रे चर्भी ते खूब रोड़ी रोट्टी सेइं रज़्ज़ेली,

ते अवं जयजयकार केरतां तेरी बडीयाई केरेलो।

6 ज़ैखन अवं खट्टी पुड़ भोल्हो तीं याद केरेलो,

तैखन रातरे एक्‍की-एक्‍की पहरे मां अवं तीं पुड़ ध्यान केरेलो;

7 किजोकि तू हमेशा मेरी मद्दत केरनेबालो बनोरोस,

एल्हेरेलेइ अवं तेरे फंघां केरि छावी मां जयजयकार केरेलो।

8 मेरो मन तीं पत्ती-पत्ती लगोरो रहते;

ते तेरो देइनो हथ मीं सुमैलतां रखते।

9 पन ज़ैना मीं मारनेरे लेई तियारन;

तैना ज़मीनी मां उन्ढे गाले।*63:9 ज़मीनी मां उन्ढे गाले मरोरे लोकां केरे जहाने मां

10 तैना तलवारारे हवाले किये गाले,

ते तैना गिद्दां केरि खूराक बेनि गाले।

11 पन राज़ो परमेशरेरे वजाई सेइं खुशी रालो;

ज़ै भी परमेशरेरी कसम केरेलो, तै घमण्ड केरेलो;

किजोकि झूठ ज़ोने बालां केरां आशी बन्द कियां गालां।