सृष्टि बनाने बालेरी तारीफ़
1 हे मेरे मन, तू यहोवा ज़ो धन ज़ो!
हे मेरे परमेशर यहोवा,
तू बड़ो महानस,
तीं महिमा ते आदरारां लिगड़ां लेवरन।
2 तू लौई च़ादरारो ज़ेरो पलेटतां रखतस,
ते अम्बरे एन्च़रे फैलातस ज़ेन्च़रे मैन्हु तेम्बु लाते,
3 तू अपनु घर पैनी मां बनातस,
ते बिदलारी अपनु रथ बनातस,
ते हवारे फंघन पुड़ च़लतस।
4 तू हवाई अपने दूत,
ते अग्गरी लप्पी अपने सेवक बनातस।
5 तीं ज़मीन मज़बूत मुनीयादी पुड़ रखी,
ताके तै कधे न हिल्ले।
6 तीं तै डुग्घे समुन्दरेरे पैनी सेइं छ़ुपाई ज़ेन्च़रे लिगड़े सेइं;
पानी पहाड़न पुड़ रुकी जेवं।
7 पन तेरी झ़िड़की सेइं पानी नेश्शी जेवं;
तेरे गरज़नेरी आवाज़ शुन्तां तैन अकदम रुड़ी जेवं।
8 पानी पहाड़न पुड़ च़ेढ़ी जेवं, ते तरैई केरि बत्ती मरां तैस ठैरी मां उतरी जेवं
ज़ै तीं तैसेरे लेई तियार कियोरी थी।
9 तीं अक हद रख्खी ज़ैस करां अग्रोवं पानी न गेइ सके,
ते वापस एइतां ज़मीनी ढेक्की न सके।
10 तू वैदन मां पैनेरे नाग बगने देतस;
ते तैना पहाड़न मांमेइं बगतन,
11 तैस पैनी मरां सब जंगली जानबर पानी पीतन;
जंगली गधे भी अपनि ट्लिश मिटातन।
12 तैन कां अम्बरेरां च़ुड़ोलू तैन केरे बन्ने एइतां बिशतन,
ते तैन केरि आवाज़ डैलड़न मरां शुनोतीए।
13 तू अपने घरे मरां ज़ैन बह आहे पहाड़न सगतस,
ते कम्मां केरे फले सेइं धरती रेज़्ज़ी गातीए।
14 तू जानबरां केरे लेई घास,
ते इन्सानां केरे कम्मेरे लेई अन्नेरी पैदावार तियार केरतस,
ते एस्से तरीके सेइं ज़मीनी मरां तैना खानेरी चीज़ां पैदा केरतस।
15 तेरी दाछ़रो रस ज़ैस सेइं मैन्हेरो मन खुशी भोते,
ते तेरो तेल ज़ैस सेइं तैसेरू तुत्तर चमकते,
तेरी रोट्टी तैसेरो दिल मज़बूत केरचे।
16 यहोवारे बुट रज़ोरे रहतन,
मतलब कि लबानोनेरे गैइड़ ज़ैना तैनी लेवरेन।
17 च़ुड़ोलू तैन मां अपने आल्हे बनातन;
ते सारस च़ुड़ोलोवं सनोवर बुट्टन मां रहते।
18 उच्चां पहाड़ां जंगलेरे थाव्वां केरे लेई आन;
ते शफड़न मां शापानां केरे छ़पनेरी ठारे।
19 तीं महीने ते वक्तेरे निशानेरे लेई चाँदनी बनाई;
ते दिहाड़ो अपने डुबनेरो मौको ज़ानते।
20 तू आंधरू बनातस, तैखन रात भोचे;
ज़ैस मां जंगली जीप जन्तू हंठतन फिरतन।
21 जुवान शेर शिकारेरे लेई गरज़ते,
ते परमेशरे करां अपनो शिकार मगते।
22 फिरी दिहाड़ो निसते तैना च़ले गातन
ते अपने कुढी मां आराम केरतन।
23 तैखन इन्सान अपने कम्मेरे लेई
ते ड्लवझ़ी तगर मेहनत केरनेरे लेई निसतन।
24 हे यहोवा तेरां कम्मां बेशुमारन!
एना सब चीज़ां तीं एपनी अक्ली सेइं बनेवरिन;
ते ज़मीन तेरे बनेवरे जीप जन्तून सेइं भेरतांए।
25 एन्च़रे सेइं समुन्दर बड़ोए ते बिल्लोए,
ते तैस मां बड़े पैनेरे जीप जन्तू
बड्डे भी ते निक्के सब आन।
26 तैस पुड़ ज़िहाज़ां भी इरां उरां सफर केरतन,
ते लिव्यातान भी ज़ै तीं खेडनेरे लेई बनेवरोए।
27 इन सेभन सिर्फ तेरो सहारोए,
कि तू तैन वक्ते पुड़ खाने जो देस।
28 तू तैन मां खाने जो देतस, त तैना तैस अकोट्ठू केरतन;
ते तू अपनि मुठड़ी खोलतस त तैना रोड़ी चीज़न सेइं रेज़्ज़ी गातन।
29 ज़ैखन तू अपनु तुत्तर छ़ुपातस, त तैन केरे होश उड़ी गातन,
ज़ैखन तू तैन केरो दम केढी देतस, त तैना मेरि गातन
त तैना दुबारे मित्ती मां मिली गातन।
30 तू अपने तरफां सांस104:30 सांस आत्मा भेज़तस, त तैना पैदा भोइ गातन;
त तू धेरती नंव्वी बनातस।
31 यहोवारी महिमा सदा तगर बनोरी राए,
यहोवा अपने कम्मन सेइं खुश भोए!
32 तै ज़मीनी पुड़ नज़र देते, त तै हिल्ली गाचे,
तै पहाड़न सेइं हुरते त तैन मरां तू निसते।
33 अवं सैरी उमरी यहोवारू गीत ज़ोतो रेइलो,
ज़ांतगर अवं ज़ींतोईं अपने परमेशरेरी शुक्रगुज़ारी केरतो रालो।
34 मेरू ध्यान केरनू तैस खुशी एज्जे,
किजोकि अवं त यहोवारे वजाई सेइं खुशी भोल्हो।
35 पापी लोकां केरो धेरती पुड़ां अन्त भोए,
ते दुष्ट लोक अग्रोवं जो न रान!
हे मेरे मन यहोवा जो धन ज़ो!
यहोवारी तारीफ़ केरा।