1 हे यहोवा, मीं मेरे दुश्मन करां बच़ा;

ज़ुलम केरनेबाले मैन्हु करां मेरी हिफाज़त केर।✝

2 किजोकि तैनेईं मने मां बुरे खियाल कियोरेन।

तैना लगातार लड़ैई मच़ातन।

3 तैन केरू ज़ोनू सप्पेरे टक देनेरू ज़ेरूए,

तैन केरे ज़बानरां ज़ेन्च़रे सप्पेरू ज़ेहर रहते, (सेला)

4 हे यहोवा मीं दुष्टेरे हथ्थे करां बच़ा;

ज़ालम मैन्हु करां मेरी हिफाज़त केर,

किजोकि तैनेईं मेरे पव्वन घिशकानेरी योजना कियोरीए।

5 घमण्डी लोकेईं मेरे लेई फंदो ते रेस्सी लेवरिन,

ते बत्तरे बन्ने जाल बछ़ावरूए;

तैनेईं मेरे लेई फंदे लेवरेन। (सेला)

6 हे यहोवा, मीं तीं सेइं ज़ोवं कि तू मेरो परमेशरस;

हे यहोवा, मेरी बिनतरे पासे ध्यान दे!

7 हे यहोवा प्रभु, हे मेरे सामर्थी मुक्ति देनेबाला,

तीं जंगरे दिहाड़े मेरे क्रोड़री हिफाज़त कियोरीए।*

8 हे यहोवा तू दुष्टेरी इच्छा पूरी भोने न दे,

तैसेरी बुरी योजना कामयाब भोने न दे, नईं त तै घमण्ड केरेलो। (सेला)

9 तैन दुश्मनेईं अवं घेरी छ़डोरोइं, ज़ैन तैनेईं सोचोरू तैन केरे अपने दोग्गे पुड़ एज्जे।

10 तैन केरे दोग्गे पुड़ मूरां छ़डां गान!

ते अग्गी मां बिछ़ोड़े गान!

ते एरे गत्तन मां बिछ़ड़न, कि तैना फिरी उठी न सकन!

11 बकबक केरनेबालो धेरती पुड़ कायम न भोइ बटेलो;

ज़ालम मैन्हु बिछ़ोड़नेरे लेई बुराई तैसेरो पीछो केरेली।

12 हे यहोवा, मीं याकीने कि तू गरीब मैन्हु

ते ज़रूरतमन्दन न्याय देलो।

13 इस मां शक नईं धर्मी तेरे नंव्वेरू शुक्र केरि बटेले;

सिद्धे लोक तेरे सामने बास केरेले।