1 हे सब धेरती पुड़ रानेबाले लोकव, परमेशरेरे लेई जयजयकार केरा;

2 तैसेरे नंव्वेरे महिमारू भजन ज़ोथ;

तैसेरी बडीयाई केरतां, तैसेरी महिमा केरा।

3 परमेशरे सेइं ज़ोथ, "तेरां कम्मां केत्रां भयानक आन!

तेरी बड़ी शेक्तरे वजाई सेइं दुश्मन तेरे सामने झुकेले।

4 सारे दुनियारे लोक तीं कां झुकेले,

ते तेरू भजन ज़ोले;

तैना तेरे नंव्वेरू भजन ज़ोले।" (सेला)

5 एज्जा, परमेशरेरां कम्मां हेरा।

तै अपने कम्मां केरे वजाई सेइं मैन्हन डरेरे काबल लेइहोते।

6 यहोवा लाल समुन्दर खुशक ज़मीनी मां बेदली दित्तो।

इश्शे पूर्वज समुन्दरे मांमेइं पैदल पार जे।

तैड़ी अस तैसेरे वजाई सेइं खुशी भोए,

7 तै एपनी कुदरती सेइं हमेशा हुकूमत केरते;

तैसेरी एछ़्छ़ी कौमन पुड़ लेगोरी रेइचन,

बगावत केरनेबालो क्रोड़ी खड़ी न केरे। (सेला)

8 हे मुल्ख-मुल्खेरे लोकव इश्शे परमेशरे जो धन ज़ोथ,

ते तैसेरी तारीफ़रे लेई आवाज़ उच्‍ची केरा।

9 ज़ै असन ज़ींतो रखते;

ते इश्शे पव घिश्कने न दे।

10 किजोकि हे परमेशर, तीं अस अज़माए;

ज़ेन्च़रे चाँदी शुद्ध केरतन तेन्च़रे तीं असां शुद्ध किये।✝

11 तीं असां जाले मां फसाए;

ते इश्शे टेन्टू पुड़ भारी बोझ रखोरो थियो।

12 तीं दुश्मन इश्शे दोग्गे पुड़ च़लावाए,

असां अग्गी ते पैनी मांमेइं जे;

पन फिरी तीं असां तैट्ठां केढतां सुखे सेइं भरोरेम।

13 अवं होमबलि एन्हतां तेरे घरे मां एज्जेलो;

ते तेरी हज़ूरी मां एपनी मिन्नतां पूरी केरेलो;

14 तैना मिन्नतां ज़ैना मीं अपने ऐशी सेइं मेन्नी,

ते मुसीबतरे मौके मेन्नोरी थी।

15 होमबेलरे तौरे पुड़ अवं बड्डे-बड्डे जानबर,

हुड़ां केरि चर्भी धूपे समेत च़ैढ़ेलो;

अवं थाव्वन समेत दांतन च़ैढ़ेलो। (सेला)

16 हे सब परमेशरेरो डर मन्ने बालाव, एइतां शुना,

अवं ज़ोइलो कि तैने मेरे लेई कुन-कुन कियूं।

17 मीं तै पुकारो,

ते तैसेरी तारीफ़ मीं करां भोइ।

18 अगर अवं अपने मने मां पापेरी गल्‍लां सोचेथो,

त प्रभु मेरी प्राथना न शुनेथो।✝

19 पन सच़्च़े परमेशरे मेरी पुकार शुनी;

तैनी मेरी प्राथनाई पुड़ ध्यान दित्तू।

20 धने परमेशर,

ज़ैने न त मेरी प्राथना अनशुनी की,

ते न अपनि दया मीं करां दूर कियोरीए!