भजन संहिता 146

मुक्ति देनेबाले परमेशरेरी तारीफ़

1 यहोवारी तारीफ़*146:1 तारीफ़ हालेलुय्याह भोए।

हे मेरी जान यहोवारी तारीफ़ केर।

2 अवं ज़िन्दगी भर यहोवारी तारीफ़ केरतो रेइलो;

ज़ांतगर अवं बनोरो रेइलो, तैखन तगर अवं अपने परमेशरेरू भजन ज़ोतो रेइलो।

3 तुस प्रधान्न पुड़ भरोसो न रेखथ,

ते न कोन्ची मैन्हु पुड़, किजोकि तैस मां मुक्ति देनेरी कोई शक्ति नईं।

4 तैसेरे प्राण निस्सी गातन, तै भी मित्ती मां मिली गालो;

तैस्से दिहैड़ी तैसेरे सारे खियाल नाश भोइ गाले।

5 केत्रो धने तै,

ज़ेसेरो मद्दत केरनेबालो याकूबेरो परमेशरे,

ज़ै अपने यहोवा पुड़ भरोसो रखते।

6 परमेशर अम्बर ते धरती ते समुन्दर

ते तैन मां ज़ैन किछे, सब किछ बनानेबालोए;

ते तै अपनु वचन हमेशारे लेई पूरू केरतो रालो।

7 ते ज़ैन पुड़ ज़ुलम भोते तैन न्याय देते;

ते नियन्न रोट्टी खुवाते।

ते यहोवा कैदन आज़ाद केरते।

8 यहोवा कान्न एछ़्छ़ी देते।

ते झुकोरे लोकन तै खड़ो केरते;

यहोवा धर्मी लोकन सेइं प्यार केरते।

9 यहोवा परदेशी केरि हिफाज़त केरते,

ते अनाथन ते विधवान सम्भालते;

पन दुष्टां केरि बत टारी टिन्ची केरते।

10 हे सिय्योन, यहोवा सदारे लेई,

तेरो परमेशर पीढ़ी-पीढ़ी तगर हुकूमत केरेलो।

यहोवारी तारीफ़ केरा!