1 हे यहोवा, राज़ो तेरी सामर्थी सेइं खुशी भोल्हो;

ते तेरे दित्तोरे ज़ींती सेइं बड़ो मघन भोल्हो।

2 तीं तैसेरे दिलेरी इच्छा पूरी कियोरीए;

ते तीं तैसेरे ज़बानरी बिनती कबूल नईं कियोरीए। (सेला)

3 किजोकि तू रोड़ी-रोड़ी बरकतां देतो तैस सेइं मिलतस

ते तीं तैस शुद्ध सोन्नेरू ताज लुवाव।

4 तैनी तीं करां ज़िन्दगी मैल्हनेरी उमीद रख्खी; ते तीं तैस लम्मी उमर दित्ती;

तीं तैस हमेशारी ज़िन्दगी दित्तोरिए।

5 तेरी मुक्ति सेइं तैस बड़ी आदर हासिल भोइ;

ते तीं तै वैभव ते ऐश्वर्य सेइं भरपूर कियो।

6 किजोकि तीं तैस हमेशारे लेई बरकत दित्तोरिए;

तू अपने सामने तैस खुशी ते आनन्दे सेइं भेरि देतस।

7 किजोकि राज़ेरो भरोसो यहोवा पुड़े;

ते परमप्रधान परमेशरेरी दया तैस कधे बिछ़ड़ने न दे।

8 तेरो हथ तेरे सब दुश्मन्न तोपतां कढेलो,

तेरो देइनो हथ तेरे सब बैर केरनेबालां केरो पतो कढेलो;

9 तू अपने सामने तैन दुश्मन्न बेलति भेट्ठरो

ज़ेरो फुकेलो।

यहोवा तैन अपने क्रोधे मां तैन निगली छ़डेलो;

ते अग तैन फुकतां भस्म केरेली।

10 तू तैन केरि औलाद धेरती पुड़ेरां,

ते तैन केरे खानदाने मैन्हन मरां नाश केरेलो।

11 किजोकि तैना तेरे खलाफ साज़िश केरतन

तैनेईं एरहो इरादो कियोरोए

ज़ै तैना पूरो न केरि सकेले।

12 किजोकि तू अपने धनुषे पुड़ तीर च़ाढ़ेलो,

ते दुश्मन पिठ हिरेइतां नेश्शी गाले।

13 हे यहोवा, एपनी सामर्थी मां महान भो;

ते असां तेरां भजना खूब रोड़ेच़ारे ज़ोमेले।