1 परमेशर यहूदा मां पशानो जेवरोए,

तैसेरू नवं इस्राएले मां महाने।

2 तैसेरो तेम्बु शालेमे* मां,

ते तैसेरू धाम सिय्योने मांए।

3 तैड़ी तैनी तीरन,

ढाल, तलवारी ते जंगरे बाकी हथियार चकनाचूर किये। (सेला)

4 हे परमेशर, तू महिमा सेइं भरपूरस:

ते तैन पहाड़न करां भी जादे महान आस, ज़ैना शिकार भोनेबाले जानबरन सेइं भेरतांए।

5 बहादर मड़द त लुट्टोई जेवरेन, तैना बड़े निड्ली मां झ़ुल्‍ली जेवरेन;

बहादर सिपेहिन मरां केन्चेरो भी हथ कम न केरे।

6 हे याकूबेरे परमेशर, तेरी झ़िड़की सेइं,

ते रथ्थन समेत घोड़े भारी निड्ली मां झ़ुलोरेन।

7 सिर्फ तींए करां डरेरू लोड़ते;

ते ज़ैखन तू सेरकोस, तैखन तेरे सामने कौन खड़ो रेइ सकते?

8 तींए सुर्गे मरां फैसलो शुनेवरोए;

ते तैस वक्ते ज़मीन डेरतां च़ुप भोइ जेवरीए,

9 ज़ैखन परमेशर न्याय केरनेरे लेई

ते धेरतरे सब हलीम लोकां केरि मुक्ति केरने जो खड़ो भोव। (सेला)

10 सच़्च़े मैन्हेरी जलजलाहट तेरी तारीफ़री वजा भोल्ही,

ते ज़ै जलजलाहट बाकी राए, तैस तू रोकेलो।

11 अपने परमेशर यहोवारे हज़ूरी मां मिन्नतां मन्ना, ते तैना पूरी केरा;

तै ज़ै डरेरे काबले, तैसेरे आसे पासे लोक तैसेरे लेई च़ढ़तल आन्न।

12 परमेशर प्रधानां केरू अभिमान मिटेई देलो;

ते दुनियारे राज़े तैसेरो डर मनतन।