1 यहोवा राज़ केरते, धरती मघन भोए;

ते जज़ीरे ज़ैना बड़े आन, तैना भी आनन्द मनान!

2 बिदलार ते आंधरू तैसेरे च़ेवरे पासने

तैसेरे तखतेरी बुनीयाद धार्मिकता ते न्याये।

3 अग तैसेरे अग्री-अग्री च़लती

तैसेरे दुश्मन्न च़ेवरे पासना भस्म केरतीए।

4 तैसेरे अम्बर झ़पने सेइं दुनिया रौशन भोइ,

धरती हेरतां थेरकी जेई!

5 पहाड़ यहोवारे सामने,

मोमेरे ज़ेरे गेली जे,

मतलब सारे धेरतरे परमेशरेरे सामने।

6 अम्बरे तैसेरे धर्मेरू एलान कियूं;

ते मुल्खां-मुल्खां केरे सारे लोकेईं तैसेरी महिमा लाहोरीए।

7 ज़ेत्रे बनेवरी मूरती केरि पूज़ा केरतन

ते मूरतन पुड़ घमण्ड केरतन, तैना शरमिन्दा भोन;

हे सब देबतव तुस तैस्से कां मथ्थो टेका।

8 सिय्योन शुन्तां खुशी भोए,

हे यहूदारी कुइयां मघन भोइ;

हे यहोवा, इन तेरे नियमां केरे वजाई सेइं भोवं।

9 किजोकि हे यहोवा, तू सारी धेरती पुड़ परमप्रधानस;

तू सारे देबतन करां जादे महान ठहरोरोस।✝

10 हे यहोवा सेइं प्यार केरनेबालव, बुरैई सेइं नफरत केरा;

तै अपने भक्तां केरे प्राणां केरि हिफाज़त केरते,

ते तैन दुष्टां केरे हथ्थे करां बच़ाते।

11 धेर्मेरे लेई लौ,

ते सिद्धे मने बालां केरे लेई आनन्द बेव गाते।

12 हे धर्मी लोकव, यहोवारे वजाई सेइं आनन्द केरा;

ते ज़ैस पवित्र नंव्वे सेइं तैसेरी याद भोतीए, तैसेरू शुक्र केरा!