भजन संहिता 6

दयारे लेई प्राथना

प्रधान बज़ानेबालेरे लेई: तारीबाले बाज़े सेइं। खर्ज रागे मां, दाऊदेरू भजन

1 हे यहोवा, तू मीं अपने क्रोधे मां न डांट,

ते न बड़े सरकी मां मीं सज़ाह दे।

2 हे यहोवा, मीं पुड़ दया केर, किजोकि अवं अधमरो भोइ जेवरोईं,

हे यहोवा, मीं बज़्झ़ा, किजोकि मेरी हेड्डन मां चैन नईं।

3 मेरो प्राण भी बड़ो दुखी आहे,

ते हे यहोवा, केइस तगर अवं मद्दतरे लेई इंतज़ार केरि?*6:3 यूह. 12:27.

4 वापस एई, हे यहोवा, मेरे प्राण बच़ा;

अपने दयारे खातर मीं छुटकारो दे।

5 किजोकि मरनेरे बाद कोन्ची भी तेरी याद न भोए,

कब्री मां कौन तेरी शुक्रगुज़ारी केरेलो?

6 अवं करलाते-करलाते थेकी जेव;

अवं अपनि खट ऐंखरेईं सेइं सेलताईं;

हर राती मेरू बिछ़ान सिज़ते।

7 मेरी एछ़्छ़ी दुखेरे मारे बिश्शी गेइचन,

ते मेरे सब सताने बालां केरे वजाई सेइं कमज़ोर भोइ जेई।

8 हे सब अनर्थ केरने बालाव, मीं करां दूर भोथ;

किजोकि यहोवा मेरी लेरां केरि आवाज़ शुनोरीए।✝6:8 मत. 7:23;लूक. 13:27.

9 यहोवाए मेरी बिनती शुनोरीए,

यहोवा मेरी प्राथना कबूल भी केरेलो।

10 मेरे सब दुश्मन सते बड़े जादे घबराले;

तैना हारेले ते वापस गाले, ते अचानक शरमिन्दा भोल्हे।