1 हे यहोवा, दाऊदेरे खातर तैसेरी सैरी मुसीबतन याद केर।

2 तैनी यहोवा सेइं कसम खाइ,

ते याकूबेरे सर्वशक्तिमान परमेशरेरी सारी मिन्नत मन्नी।

3 तैनी ज़ोवं, "पक्‍को अवं तैस वक्ते तगर अपने घरे न गेइलो,

ते न अपने बिछ़ाने पुड़ गेइलो;

4 न अवं एपनी एछ़्छ़न निड्ल,

ते न अपने पुंठन जपकी एजने देइलो।

5 ज़ांतगर यहोवारे लेई, अक ठार,

मतलब याकूबेरे सर्वशक्तिमान परमेशरेरे लेई घर न बनेई।"

6 असेईं एप्राता* मां तैसेरी चर्चा शुनोरीए,

असन ई जंगलेरे मैइदाने मां मैल्ही।

7 एज्जा असां तैसेरे घरे मां गाम,

अस तैसेरे पव्वां केरि चौकी कां मथ्थो टेकम!

8 हे यहोवा, उठतां अपने मन्दरे मां

अपने शेक्तरे करारेरे सन्दूखे समेत आरामेरी ठारी मां एई।

9 तेरे याजक धार्मिकतारां लिगड़ां लेइतां रान,

ते तेरे भक्त लोक जयजयकार केरन।

10 अपने दास दाऊदेरे लेई,

ते ज़ै तीं च़ुनोरोए तैसेरी प्राथना अनशुनी न केर।

11 यहोवा दाऊदे सेइं वाधो कियोरो थियो ते तै तैस करां न मुकरेलो:

"अवं तेरे तखते पुड़ तेरे एक्‍की अपने मट्ठे बिशैलेलो।

12 अगर तेरे खानदानेरे लोक मेरे करारे मन्न

ते ज़ैना हदायतां तैन शिखालेलो, तैस पुड़ च़लन,

त तैन केरे खानदानेरे लोक भी तेरे तखते पुड़ जुग-जुगे बिशते च़ले गान।"

13 पक्‍को यहोवा सिय्योने च़ुनेलो,

ते तैस अपने घरेरे लेई चाहे।

14 तीं ज़ोवं, "ई त जुगे-जुगेरे लेई मेरे आरामेरी ठारे;

इड़ी अवं रेइलो, किजोकि मीं इन चाऊ।

15 अवं सिय्योनेरी खानेरी चीज़न पुड़ बड़ी बरकत देलो;

ते इसेरे गरीबन रोट्टी सेइं रज़ानेलो।

16 इसेरे याजकन अवं मुक्तरां लिगड़ां लुवेइलो,

ते इसेरे भक्त लोक उच्‍ची आवाज़ी सेइं जयजयकार केरेले,

17 तैड़ी अवं दाऊदेरू अक शिंग कढेलो,

मीं अपने अभिषिक्त राज़ेरे लेई अक दीयो तियार केरतां रखोरोए।

18 अवं तैसेरे दुश्मन बेइज़्ज़तरां लिगड़ां लुवेइलो,

पन तैसेरे दोग्गे पुड़ तैसेरू ताज शोभने बालू रालू।"