परमेशरेरे लेई इच्छा केरनी
साज़ बज़ानेबालेरे प्रधानेरे लेई कोरह खानदानेरे लोकां केरो मश्कील
1 ज़ेन्च़रे हिरनी नालेरे रोड़े पैनेरे लेई तरसतीए;
तेन्च़रे, हे मेरे परमेशर, अवं तेरे लेई तरसताईं।
2 ज़ींते परमेशर, हाँ अवं परमेशरेरो ट्लिशोरो आईं,
अवं किताली गेइतां परमेशरे कां तुत्तर हरेइलो।42:2 भज. 63:1;प्रका. 22:4.
3 रात दिहैड़ी मेरां ऐंखरू मेरी खूराक भोतन;
ते मेरे दुश्मन सारे दिहैड़ी मीं सेइं ज़ोते रहतन,
तेरो परमेशर कोड़िए?
4 अवं केरही भीड़ी सेइं साथी गेइयां केरतो थियो,
अवं जयजयकार ते शुक्र केरतां
खुशी मनाने बाले भीड़रे दरमियान परमेशरेरे भवने जो
बल्हे-बल्हे गातो थियो; इन याद केरतां मेरे प्राण दुखी भोइ गातन।
5 हे मेरी जान, तू किजो परेशान भोने लगोरिस?
ते किजो अन्तरे-अन्तर बेचैन आस?
परमेशरे पुड़ उमीद लेइतां रख;
किजोकि अवं तैसेरे दर्शने सेइं मुक्ति हासिल केरतां फिरी तैसेरू शुक्र केरेलो।42:5 मत. 26:38;मरक. 14:34;यूह. 12:27.
6 हे मेरे परमेशर; मेरो प्राण मेरे अन्त बेचैने
एल्हेरेलेइ अवं यरदनेरे नेड़ेरे मुल्खे करां
ते हेर्मोनेरे पहाड़न ते मिसगारेरे पहाड़न पुड़ेरां
तीं याद केरताईं।
7 तेरे पैनेरे धारां केरो शब्द शुन्तां पानी,
पैनी जो हक देते; तेरी सब लहरन
ते छ़ेलहन मां अवं डुब्बी जेवरोईं।
8 फिरी भी दीसां यहोवा अपनि शक्ति
ते दया बांदी केरेलो;
ते राती भी अवं तैसेरू गीत ज़ोइलो,
ते अवं अपने ज़िन्दगी देनेबाले परमेशरे कां प्राथना केरेलो।
9 अवं परमेशरे सेइं ज़ै मेरी चट्टाने ज़ोइलो,
"तीं अवं किजो बिसरो?
अवं दुश्मनेरे ज़ुलमेरे मारे किजो शोगेरां
लिगड़ां लेइतां च़लताईं फिरताईं?"
10 मेरे सतानेबाले ज़ैना मेरी निन्दा केरतन,
ज़ेन्च़रे तैस सेइं मेरी हेड्डी चूर-चूर भोतिन,
ज़ेन्च़रे तलवारी सेइं छ़िन्दी गैतिन,
किजोकि तैना सारे दिहैड़ी मीं सेइं ज़ोते रहतन, तेरो परमेशर कोड़िए?
11 हे मेरी जान तू किजो बेचैन भोतिस?
तू अन्तरे अन्तर किजो परेशानस?
परमेशरे पुड़ भरोसो रख;
किजोकि तै मेरे तुत्तरेरी चमक ते मेरो परमेशरे,
अवं फिरी तैसेरू शुक्र केरेलो।