भजन संहिता 72

धर्मी राज़ेरे हुकूमतरे दौरान महिमा

सुलैमानेरू गीत

1 हे परमेशर, राज़े अपने नियम ज़ो,

राज़ेरे मट्ठे अपनि धार्मिकता हिरा।✝72:1 मत. 25:31-34;प्रेरित. 17:31;रोम. 14:10;2 कुरि. 5:10.

2 ताके तै धार्मिकता तेरे लोकां केरो न्याय,

ते तेरे हलीम लोकां केरो न्याय सही सेइं केरि सके।

3 पहाड़न ते पहैड़न मरां इन लोकां केरे लेई,

धार्मिकताई सेइं शान्ति मैलती राए।

4 तै इन लोकां केरे गरीबां केरो न्याय केरेलो, ते ज़रूरतमन्द लोकन बच़ालो;

ते ज़ुलम केरनेबालां केरे टुक्ड़े-टुक्ड़े केरेलो।✝72:4 यशा. 11:4.

5 ज़ांतगर दिहाड़ो ते चाँदनी राली

तांतगर तेरे लोक पीढ़ी-पीढ़ी तेरो डर मन्ते राले।

6 राज़ो कट्टोरे घासे पुड़ झ़ेड़रो ज़ेरो,

ज़मीनी बट्ल देने बैली झ़ेड़रो ज़ेरो भोल्हो।

7 तैसेरे दिहाड़न मां धर्मी फुलेले फलेले,

ज़ांतगर चाँदनी राए, तांतगर शान्ति बड़ी राली।

8 तै एक्‍की समुन्दरे करां देंतो होरि समुन्दरे तगर,

ते फरात दरियाए करां दुनियारे आखरी तगर हुकूमत केरेलो।

9 तैसेरे सामने जंगले मां रानेबाले झुकेले,

ते तैसेरे दुश्मन तल च़टेले।

10 तर्शीश*72:10 तर्शीश समझ़ू गाते मतलब सपेन। ते जज़ीरे-जज़ीरेरे राज़े तैस जो भेंट आनेले,

शेबा ते सबा दूईयां रियासतां केरे राज़े तोफे आनेले।

11 सारे राज़े तैस कां झुकेले,

कौमां-कौमां केरे लोक तैसेरे अधीन भोइ गाले।✝72:11 प्रका. 21:26;मत. 2:11.

12 किजोकि राज़ो फुकारने बाले ज़रूरतमन्देरो,

तै दुखी ते बेसाहरे मैन्हु मुक्ति देलो।

13 तै गरीब ते ज़रूरतमन्दन पुड़ तरस खालो,

ते ज़रूरतमन्दां केरे प्राण बच़ालो।

14 तै तैन केरे प्राणन ज़ुलमे ते फसादे करां छुटालो;

ते तैन केरि ज़िन्दगी तैसेरी नज़री मां कीमती ठहरेली।

15 तै त ज़ींतो रालो ते शेबारे सोन्ने मरां तैस दित्तू गालू।

लोक हमेशा तैसेरे लेई प्राथना केरेले;

सैरी दिहैड़ी तैस जो धन ज़ोले।

16 मुल्खे मां पहाड़ां केरि च़ोटन पुड़ बड़ू जादे अन्न भोल्हु;

ज़ेसेरो फल लबानोनेरे गैइड़ां केरो ज़ेरो झुकेलो;

ते नगरेरे लोक घासेरे ज़ेरे हरे भरे भोल्हे।

17 राज़ेरू नवं हमेशा तगर बनोरू रालू;

ज़ांतगर दिहाड़ो बनोरू रालो, तैखन तगर हमेशा तैसेरू नवं नंव्वू भोतू रालू,

ते लोक अपने आपे तैसेरे वजाई सेइं धन मन्नेले,

सैरी कौमां तैस जो धन ज़ोली।

18 यहोवा परमेशरेरी तारीफ़ भोए, ज़ै इस्राएलेरो परमेशरे;

सिर्फ तैए चमत्कार केरते।✝72:18 भज. 136:4.

19 राज़ेरी महिमारे नंव्वेरी हमेशा तारीफ़ भोए;

सारी धरती तैसेरे महिमा सेइं भरपूर भोल्ही।

आमीन फिरी आमीन।

20 (यिशैरे मट्ठे दाऊदेरी प्राथना मुक्‍की जेई।)