1 हे मेरे परमेशर, हे मेरे राज़ा, अवं तेरी तारीफ़ केरेलो,

ते तेरे नंव्वे हमेशा-हमेशा धन ज़ोतो रेइलो।

2 अवं रोज़ तींजो धन ज़ोइलो,

ते हमेशा तेरे नव्वेंरी तारीफ़ केरेलो।

3 यहोवा बड़ो महान ते बड़े तारीफ़रे काबले,

ते तैसेरी बडीयाई मैन्हेरी समझ़ी करां बेइरे।

4 तेरे कम्मां केरि तारीफ़ ते तेरे बड्डां-बड्डां कम्मां केरू बियान,

पीढ़ी-पीढ़ी भोती च़ली गाली।

5 अवं तेरे बड़े महिमा

ते तेरे महान कम्मन पुड़ ध्यान देंतो रेइलो।

6 लोक तेरे भयानक कम्मां केरि शेक्तरी चर्चा केरते राले।

ते अवं तेरे बड्डां-बड्डां कम्मां केरू बियान केरेलो।

7 लोक तेरी बड़ी भलियाई याद केरतां तैसारी चर्चा केरेले,

ते तेरे धार्मिकतारो जयजयकार केरेले।

8 यहोवा अनुग्रह ते दया केरनेबालो,

क्रोध केरने मां च़िर लानेबालोए ते बड़ो प्यार केरनेबालोए।

9 यहोवा सेभी केरे लेई भलोए,

ते तैसेरी दया सैरी सृष्टि पुड़े।

10 हे यहोवा, तेरी सारी सृष्टि तेरू शुक्र केरेली,

ते तेरे भक्त लोक तींजो धन ज़ोले!

11 तैना तेरे राज़्ज़ेरी महिमारे बारे मां चर्चा केरेले,

ते तेरी महा शेक्तरे बारे मां बियान केरेले

12 कि तै मैन्हन पुड़ तेरां महान कम्मां

ते तेरी राज़्ज़ेरी शान-ओ-शोकत ते तैसेरी महिमा बांदी केरन।

13 तेरी राज़्ज़ेरी कोई हद नईं,

ते तेरी हुकूमत पीढ़ी-पीढ़ी तगर च़लती राहेली।

14 यहोवा सेभी बिछ़ड़ने बालन सम्भालते,

ज़ैना रेईं जेवरेन तै तैन भी खड़े केरते।

15 सेभी प्रैणी केरि एछ़्छ़ी तीं बेलगती रैतिन,

ते तू हर कोन्ची मौके पुड़ रोट्टी देतस।✝

16 ते तू अपनि मुठड़ी खोलतां

सब जानदारां केरि खुवैइश पूरी केरतस।

17 यहोवा परमेशर, एपनी सैरी बत्तन मां धर्मी

ते अपने सारे कम्मन मां वफादारे।

18 यहोवा परमेशर, तैन सेभी केरे नेड़े, ज़ैना तैस याद केरतन,

ते ज़ैना तैस सच़्च़ैई सेइं पुकारतन।

19 ज़ैना तैसेरो डर मन्न त तै तैन केरि इच्छा पूरी केरते,

तै तैन केरि बिनती शुन्तां तैन केरि मद्दत केरते।

20 यहोवा अपने सब प्यार केरनेबालां केरि हिफाज़त केरते,

पन सब दुष्टां केरो नाश केरते।

21 अवं यहोवारी तारीफ़ केरेलो,

सारे जानदार हमेशा तगर तैसेरे पवित्र नव्वेंरी तारीफ़ केरते रहतन।