1 हे यहोवा, हे बदलो घिन्ने बाले परमेशर,

हे बदलो घिन्ने बाले परमेशर, अपनि लौ चमका।✝

2 हे धेरतरे न्याय केरनेबालां, उठ;

ते घमण्डी लोकन बदलो दे!

3 हे यहोवा, दुष्ट लोक केइस तगर,

दुष्ट लोक केइस तगर बड़कां मारते राले?

4 तैना बकतन ते बेड्डी गल्‍लां केरतन,

सारे अनर्थ केरनेबाले घमण्ड केरतन।

5 हे यहोवा, तैना तेरे लोकन ढ्लेन्च़ी छ़डतन,

ते तेरी विरासती दुख देतन।

6 तैना विधवा ते परदेशी लोकन मारतन,

ते अनाथन मारतन;

7 ते तैना ज़ोतन, "यहोवा न हेरेलो,

याकूबेरो परमेशर खियाल न केरेलो।"

8 तुस लोक ज़ैना जानबरां केरे ज़ेरेथ, खियाल केरा;

हे बेवकूफव, तुस केइस समझ़दार बनेले?

9 ज़ैनी कन दित्तोरोए, कुन तै एप्पु न शुने?

ते ज़ैनी अछ़ बनाई, कुन तै एप्पु न लाहे?

10 ज़ै एक्‍की-एक्‍की कौमी झ़िड़क देते, ते इन्साने ज्ञान शिखालते,

कुन तै न सुधारेलो?

11 यहोवा मैन्हेरे खियाल त ज़ानते कि तैना बेफैइदेन

12 हे यहोवा, केत्रो धने तै मड़दे ज़ैस तू झ़िड़क देतस,

ते अपनो कानून शिखालतस,

13 किजोकि तू तैस आफतरे दिहाड़न मां तैस वक्ते तगर चैन देतो राव,

ज़ांतगर दुष्टां केरे लेई खड्डो तियार न भोए।

14 किजोकि यहोवा अपने लोकन रद न केरेलो,

तै एपनी विरासती न शारेलो।

15 पन न्याय धार्मिकतारे मुताबिक कियो गालो,

ते सारे सिद्धे मने बाले तैस पत्ती-पत्ती भोल्हे।

16 कुकर्म केरनेबालां केरे खलाफ मेरे लेई कौन खड़ो भोल्हो?

मेरे तरफां अनर्थ केरनेबालां केरो कौन सामनो केरेलो?

17 अगर यहोवा मेरी मद्दत केरनेबालो न भोथो,

त अवं एक्‍की सैइती मां मेरि जेवरो भोथो।

18 ज़ैखन मीं ज़ोवं, "मेरो पव झिशकने लगोरोए"

तैखन हे यहोवा, तेरे प्यारे मीं सहारो दित्तो।

19 ज़ैखन मेरे मने मां बड़ी फिक्र भोतीए,

तैखन हे यहोवा, तेरी दित्तोरी शैन्ति सेइं मीं सुख भोते।

20 कुन तेरे ते दुष्टां केरे तखतेरे दरमियान समझोतो भोल्हो,

ज़ैन कानूनेरी आड़ी मां झगड़ो मच़ातन?

21 तैना धेर्मेरे प्राण नेनेरे लेई अकोट्ठे भोतन,

ते बेकसूरे मौतरी सज़ाह देतन।

22 पन यहोवा मेरो गढ़े,

ते मेरो परमेशर मेरी छ़पनेरी चट्टान भोवरोए।

23 परमेशर तैन केरू अनर्थ कम तैन्ने पुड़ वापस आनोरूए,

ते तै तैन, तैन केरि बुरैइारे ज़िरिये नाश केरेलो।

इश्शो परमेशर यहोवा तैन नाश केरेलो।