बत हिरानेरे लेई ते मुक्ति मैल्हनेरे लेई प्राथना
दाऊदेरू भजन
1 हे यहोवा, मेरी प्राथना शुन,
मेरी बिनती पुड़ ध्यान दे!
तू ज़ै सच़्च़ो ते धर्मी आस, एल्हेरेलेइ मेरी प्राथना शुन,
2 अपने दासे पुड़ मुकदमो न केर!
किजोकि कोई प्राणी तेरी नज़री मां बेकसूर न भोइ सके।143:2 रोम. 3:20;1 कुरि. 4:4;गल. 2:16.
3 दुश्मन त मेरे प्राणेरो गाक भोवरोए;
तैनी मेरी ज़िन्दगी मित्ती मां मलेवरीए,
तैनी अवं तैन लोकां केरो ज़ेरो आंधरे मां छ़डोरोईं, ज़ैना बड़े दिहाड़ां केरे मेरि जेवरेन।
4 मेरे अन्तर मेरी आत्मा बेचैन भोने लगोरीए,
मेरो मन दुखीए।
5 मीं पुराने ज़मानेरे दिहाड़े याद एइतन,
अवं तेरे सब महान कम्मन सोचताईं,
ते तेरे हथ्थां केरे कम्मन सोचताईं।
6 अवं अपने हथ तेरे पासे खड़े केरताईं;
ते मेरी जान शुकोरी ज़मीनरी ज़ेरि ट्लिशोरीए। (सेला)
7 हे यहोवा, मेरी प्राथना जल्दी शुन;
किजोकि मेरे प्राण निसने बालेन!
अपनु तुत्तर मीं करां न छ़ुपा, एरू न भोए कि अवं कब्री मां गाने बालां केरो ज़ेरो भोईं।
8 झ़ेझ़ेरे मौके मीं अपने प्यारेरी खबर शुना,
किजोकि अवं तींए पुड़ भरोसो रखताईं।
ज़ैस बत्तां मीं च़लनूए, मीं तै बत हेरा,
किजोकि अवं अपनो मन तेरे पासे लाताईं।
9 हे यहोवा, मीं मेरे दुश्मन करां बच़ा;
अवं तेरे आड़ी मां छ़पोरोईं।
10 मीं शिखाल, कि अवं तेरी मर्ज़ी पूरी केरि, किजोकि मेरो परमेशर तूए आस!
तेरी भली आत्मा मीं धर्मेरे बत्ती मां च़लाए।
11 हे यहोवा, अपने नंव्वेरे खातर मेरे ज़िन्दगरी हिफाज़त केर!
तू ज़ै धर्मी आस, मीं मुसीबती करां छुटा!
12 एपनी दयाई सेइं मेरे दुश्मन नाश केर,
मेरे सारे सताने बालन नाश केरि छ़ड,
किजोकि अवं तेरो दास आईं।