1 अवं पतरस यीशु मसीहेरो प्रेरित आईं, अवं ई चिट्ठी परमेशरेरे च़ुनोरे लोकां केरे लेई लिखने लगोरोईं, ज़ैना परदेशी केरे ज़ेरे पुन्तुस, गलातिया, कप्पदूकिया, आसिया ते बितूनिया इलाकां केरे अलग-अलग नगरन मां तितर-बितर भोइतां रहतन। 2 बाजी परमेशरे बड़ो पेइलो ई फैसलो कियोरो थियो कि तुस तैसेरे लोक भोथ त कने तै तुसन पवित्र आत्मारे कम्मेरे ज़िरिये पवित्र बनाए। तैने एन एल्हेरेलेइ कियूं ताके तुस यीशु मसीहेरी मन्नथ ते तैसेरे खूनेरे ज़िरिये सेइं शुद्ध भोथ। अवं प्राथना केरताईं कि परमेशर तुसन अनुग्रह ते शान्ति जादे करां जादे दे।

3 इश्शे प्रभु यीशु मसीहेरे बाजी ते परमेशरेरू शुक्र भोए, परमेशरे असन पुड़ महान दया केरतां असन नव्वीं ज़िन्दगी दित्ती। किजोकि परमेशरे यीशु मसीह मुड़दन मरां ज़ींतो कियो त कने तैने अस पूरी उमीदी सेइं ज़ींनेरे काबल बनेवरेम, मतलब असन तैन चीज़ां हासिल केरनेरी पूरी उमीदे, ज़ैन केरो देनेरो वाधो परमेशरे असन सेइं कियोरोए। 4 अस तैस विरासती हासिल केरनेरो इंतज़ार केरने लगोरेम ज़ै परमेशरे इश्शे लेई तियार कियोरीए। कोई भी तैन चीज़न कधी बरबाद न केरि बटे। किछ भी तैस खराब न केरि बटे। तैना चीज़ां कधी भी पुरैनी न भोल्ही ते तैन केरि खूबसूरती कधे न घटेली। परमेशरे इना चीज़ां तुश्शे लेई सुर्गे मां रेखोरिन। 5 परमेशर तुसन अपने महान शेक्तरे ज़िरिये सेइं सम्भाले, किजोकि तुस यीशु पुड़ विश्वास केरतथ। तै तुसन यीशु मसीहेरे वापस एजने तगर सम्भैलतां रखेलो। तेइस तुस ज़ानेले कि परमेशरे तुस पापे करां ते मौती करां पूरे तरीके सेइं बच़ावरेथ। 6 तुसेईं इन सेब्भी चीज़ां केरे बारे मां खुश भोवरू लोड़े, चाए हुना किछ वक्तेरे लेई अलग-अलग किसमेरी मुसीबतां तुसन दुखी केरतिन। 7 इन मुसीबतां केरो मकसद ईए कि इन बांदू भोए कि तुस सच़्च़े परमेशरे पुड़ विश्वास केरतथ। तुश्शो यीशु मसीह पुड़ विश्वास केरनो सोन्ने करां भी जादे कीमतीए। ज़ेन्च़रे नाश भोनेबालू सोन्नू अग्गी सेइं परखू ते शुद्ध कियूं गाते, तेन्च़रे अगर तुश्शो विश्वास अग्गरे ज़ेरे अज़मैइशन सेइं परखनेरे बाद भी मज़बूत रहते त ज़ेइस यीशु मसीह फिरी एज्जेलो, परमेशर तुसन जो शाबाश ज़ोलो, महिमा ते आदर देलो। 8 तुसेईं यीशु मसीह कधे नईं लाहोरो, पन फिरी भी तुस तैस सेइं प्यार केरतथ। तुस हुना तैस न लहथ पन तुस तैस पुड़ विश्वास केरतथ। एसेरो नितीजो ई आहे, कि तुस बड़े खुशी आथ। तुस एत्रे खुशी आथ कि लफज़न मां बियान न केरोए। 9 तुस एल्हेरेलेइ खुशी आथ किजोकि परमेशर तुश्शे प्राण पापेरे सज़ाही करां बच़ाने लगोरोए। इन यीशु मसीह मां तुश्शे विश्वासेरू इनामे।

10 ई मुक्ति किछ एरी थी ज़ेसेरे बारे मां नबी बड़ू ज़ाननू चाते थिये। तैनेईं ज़ोवं केन्च़रे परमेशर तुसन पुड़ अनुग्रह केरतां बच़ालो ज़ेसेरे काबल तुस न थिये, तैनेईं बड़ी जांच पड़ताल की, कि तैन जुवाब मैल्हे। 11 मसीहेरो आत्मा तैन मां थियो ते तैन सेइं ज़ोने लगोरो थियो कि मसीह केन्च़रे दुख झ़ैल्‍लेलो ते तैट्ठां बाद तैस महान आदर दित्ती गाली। एल्हेरेलेइ तैना इन खोज केरतां तोपने लगे कि सच़्च़े मसीह कौन भोल्हो ते इन केइस भोल्हु। 12 पन परमेशरे इन अपने गल्‍लां ज़ोनेबालन सेइं ज़ोवं, कि तैन केरो सन्देश तैन केरे अपने आपेरे लेई नईं, पन तुश्शे लेईए। तै सन्देश यीशु मसीहेरे बारे मां खुशखबरी आहे, ज़ै तुसेईं इस वक्त शुनी। परमेशरे सुर्गेरां पवित्र आत्मा भेज़ो कि लोकां केरि मद्दत केरे कि तैना तुसन खुशखबरी शुनान। इन सब एत्रू हैरान केरने बालूए कि स्वर्गदूत भी इन हेरनेरी बड़ी इच्छा रखतन।

13 एल्हेरेलेइ अपने मने तियार केरा ते अपने आपे कैबू मां रखा। तैस मुक्तरी उमीद रखा ज़ै तुसन अनुग्रहे सेइं तेइस मैल्हनी ज़ेइस यीशु मसीह दुबारां इस दुनियाई मां एजनोए। 14 परमेशरे मन्ना किजोकि तुस तैसेरे बच्‍चेथ। बुरां कम्मां न केरा ज़ैना तुस बुरी इच्छाई सेइं केरते थिये ज़ेइस तुस परमेशरेरी सच़्च़ाई न थिये ज़ानते। 15 पन हुनी तुस ज़ैन किछ केरतथ तैस मां पवित्र भोथ, ज़ेन्च़रे परमेशर पवित्रे ज़ैने तुस अपने बच्‍चे भोनेरे लेई च़ुनोरेथ। 16 किजोकि पवित्रशास्त्रे मां परमेशरे ज़ोवरूए, "पवित्र बना, किजोकि अवं पवित्र आईं।" 17 ज़ैखन तुस प्राथना केरतथ तुस परमेशरे जो बाजी ज़ोतथ। पन याद रखा तै तरफदारी न केरे। एल्हेरेलेइ ज़ैखन तुस इस दुनियाई मां परदेशी केरे ज़ेरे रहतथ त तुसेईं तैसेरी बड़ी इज़्ज़त कियोरी लोड़े। 18 किजोकि तुस ज़ानतथ, बीतोरे वक्ते मां तुस बेकार तरीके सेइं ज़ीते थिये ज़ेन्च़रे तुश्शे दादे-पड़दादे ज़ीते थिये। पन हुनी तुस बेकार ज़िन्दगी करां छुटेवरेथ, तुस नाश भोनेबाले सोन्ने चैंदी सेइं नईं घिन्नोरे, 19 पन मसीहेरे कीमती खूने सेइं घिन्नोरेथ, मसीह ज़ै शुद्ध ते सिद्ध गबड़ेरो ज़ेरोए। 20 दुनिया बनाने करां पेइले परमेशरे इन ठहरावरू थियूं कि यीशु मसीह मुक्ति देनेबालो भोल्हो। पन तै इन आखरी दिहाड़न मां इस दुनियाई मां अव ताके तुश्शी मद्दत केरे। 21 यीशु मसीहे ज़ैन कियूं तैसेरे वजाई सेइं तुस हुनी परमेशरे पुड़ विश्वास केरतथ, तैए आहे ज़ैने यीशु मसीह मुड़दन मरां ज़ींतो कियो ते तैस आदर दित्ती ताके तुश्शो विश्वास ते उमीद परमेशरे पुड़ भोए।

22 किजोकि तुस सच़ मन्नेरे ज़िरिये शुद्ध कियोरेथ, ते हुनी तुसेईं विश्वासी सैथन सेइं ईमानदैरी सेइं प्यार कियोरो लोड़े। तुसेईं एक्‍की होरि सेइं गहराई ते पूरे दिले सेइं प्यार कियोरो लोड़े। 23 किजोकि तुसन परमेशरेरी तरफां नव्वीं ज़िन्दगी मैल्होरी। तुसेईं ई ज़िन्दगी एरी चीज़ी सेइं नईं हासिल कियोरी ज़ै नाश भोल्ही। पन तैस सेइं ज़ैन हमेशा रालू। मतलब परमेशरेरे ज़ींते ते हमेशा रानेबाले वचने सेइं मैल्होरीए। 24 किजोकि पवित्रशास्त्र ज़ोते, "सारे लोक घासेरे ज़ेरे आन ते तैन केरि शोभा जंगली फूड़ोंवेरी ज़ेरिए। घास शुक्‍की गालो ते फूड़ोंव झ़ेड़ी गालू। 25 पन प्रभुएरू वचन सदा बनोरू रालू, ते वचन मसीहेरे बारे मां खुशखबरी ज़ै तुसन शुनाई जेई।"