1 योना ऐह गल बड़ी बुरी लगी, ते तैस बड़ी सरक अई। 2 ते तैनी एन ज़ोइतां यहोवा कां प्राथना की, "हे यहोवा ज़ैखन अवं अपने मुल्खे मां थियो, त मीं कुन एन्ने न थियूं ज़ोवरू? त एस्से वजाई सेइं मीं तेरो हुक्म शुनते तर्शीशे जो नशनेरे लेई लूश कमाई; किजोकि अवं ज़ानतो थियो कि तू अनुग्रह केरनेबालो, ते दया केरनेबालो परमेशर आस, ते क्रोध केरने मां च़िर लानेबालो ते करुणा केरनेबालो आस, ते दुख देने सेइं खुश न भोस। 3 हुनी हे यहोवा, तू मेरी जान ने; किजोकि मेरे लेई ज़ींते राने करां मरनू रोड़ूए।" 4 तैखन यहोवा परमेशरे ज़ोवं, "तेरो ज़ै क्रोध भड़कोरोए, कुन तै जाइज़े?" 5 इस गल्‍ली पुड़ योना तैस नगरे मरां निस्तां, पूरबेरे पासे गेइतां बिश्शी जेव, तैड़ी अक छपड़ बनेइतां तैसेरी छावी मां बिश्शी जेव ते हेरने लगो कि नगरेरो कुन हाल भोते?

6 तैखन यहोवा परमेशरे अक रेंड़ेरो बुट उगेइतां एन्च़रे बधव कि योनारे दोग्गे पुड़ छाव भोए, ज़ैस सेइं तैसेरो दुख दूर भोए। योना तैस रेंड़ेरे बुट्टेरे वजाई सेइं बड़ो खुश भोव। 7 झ़ेझ़ां ज़ैखन लौ लगी भोने, तैखन परमेशरे अक कीड़ो भेज़ो, ते तैनी कीड़े रेंड़ेरो बुट कट्टो ते तै शुक्‍की जेव। 8 ज़ैखन दिहाड़ो निस्सो, तैखन परमेशरे पूरबेरे पासेरां बड़ी भारी लू च़लाई, ते योनारे दोग्गे पुड़ दिहाड़ेरो सेक पेने लगो, ते योना बेहोश भोने लगो; ते योना एन ज़ोइतां मौत मगने लगो, "मेरे लेई ज़ींते राने करां मरनू रोड़ूए।" 9 परमेशरे योना पुछ़ू, "तेरो क्रोध ज़ै रेंड़ेरे बुट्टेरे वजाई सेइं भड़कोरोए, कुन जाइज़े?" योना ज़ोवं, "हाँ, मेरो ज़ै क्रोध भड़कोरोए तै ठीके, बल्के क्रोधेरे मारे मरनू भी रोड़ू भोथू।" 10 तैखन यहोवा ज़ोवं, "तीं ज़ैस रेंड़ेरे बुट्टेरे लेई किछ मेहनत नईं कियोरी, न तै बडाव, ज़ै एक्‍की राती मां लग्गो ते एक्‍की राती मां शुक्‍की जेव, तैसेरे लेई तू दुखी आस। 11 ते फिरी एन बड्डू नगर नीनवे, ज़ैस मां अक लख बीह हज़ारन करां जादे लोक रहतन, ज़ैना सही ते गलतेरो फर्क न ज़ानन, ते बड़े पैलतू जानबर भी तैस मां रहतन, त कुन अवं तैन पुड़ तरस न खेइं?"