1 हे यहोवा, ध्यान देइतां मेरी प्राथना शुन,

किजोकि अवं गरीब ते ज़रूरतमन्द आईं।

2 मेरे प्राण बच़ेइतां रख, किजोकि अवं तेरो भक्त आईं,

तू मेरो परमेशरस, एल्हेरेलेइ अपने दास मीं,

ज़ेसेरो भरोसो तीं पुड़े बच़ेइतां रख।

3 हे प्रभु, मीं पुड़ अनुग्रह केर,

किजोकि अवं तींए पुकारतो रहताईं।

4 अपने दासेरे मने खुश केर,

किजोकि हे प्रभु, अवं अपनो मन तेरे पासे लाताईं।

5 किजोकि हे प्रभु, तू भलो ते माफ़ केरने बालोस,

ज़ेत्रे तीं पुकारतन, तैन सेभी केरे लेई तू बड़ो महरबानस।

6 हे यहोवा मेरी प्राथनारे पासे कन ला,

ते मेरी बिनती ध्याने सेइं शुन।

7 मुसीबतरे दिहाड़े अवं तीं पुकारेलो,

किजोकि तू मेरी प्राथना शुनेलो।

8 हे प्रभु, देबतन मरां कोई तेरो ज़ेरो नईं,

ते न केन्चेरां कम्मां तेरे बराबरन।

9 हे प्रभु, ज़ेत्री भी कौमां तीं बनेवरिन,

तैना एइतां तीं कां मथ्थो टेकेली,

ते तेरे नव्वेंरी महिमा केरेली।

10 किजोकि तू महान, ते तू बड्डां-बड्डां कम्मां केरतस,

सिर्फ तूए परमेशर आस।

11 हे यहोवा, तू अपनि बत मीं हेरा, तैखन अवं तेरे सच़्च़े बत्ती पुड़ च़लेलो,

मीं अक मन केर कि अवं तेरे नंव्वेरो डर मन्नेलो।

12 हे प्रभु, हे मेरे परमेशर, अवं पूरे दिले सेइं तेरू शुक्र केरेलो,

ते तेरे नंव्वेरी महिमा हमेशा केरतो रेइलो।

13 किजोकि तेरी करुणा मीं पुड़ बड़ीए;

ते तीं अवं पाताले मां गाने करां बच़वरोईं।

14 हे परमेशर, घमण्डी लोक मेरे खलाफ खड़े भेवरेन,

ज़ालमां केरो जथो मेरे प्राणेरी तोपी मां खड़ो भोवरोए,

ते तैना तेरो कोई भी खियाल न केरन।

15 पन प्रभु दया केरनेबालो ते अनुग्रह केरनेबालो

ते च़िरे सेइं क्रोध केरनेबालो ते बड़ो प्यार केरनेबालोए।

16 मेरे पासे फिर, मीं पुड़ अनुग्रह केर;

अपने दासे तू शक्ति दे,

अपने दैसरे मट्ठे बच़ा,

17 मीं भलियैइयरो कोई निशान हिरा,

ज़ैस हेरतां मेरे दुश्मन उदास भोन,

किजोकि हे यहोवा, तीं एप्पु मेरी मद्दत की

ते मीं शान्ति दित्तोरीए।