1 यहूदा प्रदेशेरे राज़े सिदकिय्याहेरे राज़ केरनेरे दशोवं साले मां ज़ै नबूकदनेस्सर राज़ेरो राज़ केरनेरो अठारोवं साल थियो, यहोवा मीं सेइं ज़ोवं। 2 तैस मौके बाबेलेरे राज़ेरी सेना यरूशलेम नगर घेरोरू थियूं ते अवं यहूदारे राज़ेरे पहरेरे मेहलेरे अंगने मां कैदी थियो। 3 किजोकि यहूदा प्रदेशेरे राज़े सिदकिय्याहे एन ज़ोइतां अवं कैद कियोरो थियो, "तू एरी नबूवत किजो केरतस, ‘यहोवा एन ज़ोते: हेरा, अवं एन नगर बाबेलेरे राज़ेरे कब्ज़े मां केरेलो, तै एस नेलो; 4 ते यहूदारो राज़ो सिदकिय्याह कसदी लोकां केरे हथ्थेरां न बच़ेलो, पन तै बाबेलेरे रोज़ेरे कब्ज़े मां ज़रूर भोल्हो, ते तै ते बाबेलेरो राज़ो एप्पु मांमेइं आमने-सामने गल्‍लां केरेले; ते अपनि-अपनि एछ़्छ़न सेइं एक्‍की होरि हेरेले। 5 ते तै सिदकिय्याह बाबेले मां नेलो, ते ज़ांतगर अवं तैस याद न केरि, तैखन तगर तै तैड़ी रालो, यहोवा एन ज़ोते। चाए तुस लोक कसदी लोकन सेइं लड़थ भी, फिरी भी तुश्शे लड़ने सेइं किछ भी कामयाबी न मैल्हेली।’"

6 मीं ज़ोवं, "यहोवा मीं सेइं ज़ोवं, 7 हेर, शल्‍लूमेरू मट्ठू हनमेल ज़ैन तेरे चाचेरू मट्ठूए, तैन तीं कां एन ज़ोनेरे लेई एजनेबालू आहे, ‘मेरू ऊडार ज़ैन अनातोत नगरे मांए, तैस घिन्न किजोकि तैस घिन्तां छुटानेरू हक तेरूए।’ 8 ते यहोवारे वचनेरे मुताबिक मेरो पेट्लेर ढ्ला हनमेल पहरेरे अंगने मां मीं कां एइतां ज़ोने लगो, ‘मेरू ज़ैन ऊडार बिन्यामीन इलाकेरे अनातोत नगरे मांए तैस घिन्न, किजोकि तैसेरो मालिक भोनेरो ते तैसेरे छुटानेरू हक्‍के; एल्हेरेलेइ तू तैस घिन्न।’ तैखन मीं समझ़ू कि तैन यहोवारू वचन थियूं।

9 "एल्हेरेलेइ मीं तैस अनातोत नगरेरू ऊडार अपने चाचेरे मट्ठे हनमेले करां घिन्नू, ते तैस चैंदरे 17 सिक्‍के* तुलतां दित्ते। 10 ते मीं दस्तावेज़न दस्तखत ते मोहर लाने पुड़, गवाहां केरे सामने तै चाँदी ट्लेकड़ी मां तुलतां तैस दित्ती। 11 तैखन मीं घिन्नेरे दूईये दस्तावेज़ ज़ैन मां सब शर्तां लिखोरी थी, ते ज़ैन मां एक्‍की पुड़ मोहर थी ते होरि खुल्‍लू थियूं, 12 तैना नेइतां अपने चाचेरे मट्ठे हनमेलेरे ते तैन गवाहां केरे सामने ज़ैनेईं दस्तावेज़न पुड़ दस्तखत कियोरेन, ते तैन सब यहूदी केरे सामने भी ज़ैन पहरेरे अंगने मां बिश्शोरे थिये, नेरिय्याहेरे मट्ठे बारूके ज़ैन महसेयाहेरू पोट्लड़ू थियूं, सौंफी दित्तो। 13 तैखन मीं तैन केरे सामने बारूके ऐह हुक्म दित्तो, 14 ‘इस्राएलेरो परमेशर सेना केरो यहोवा एन ज़ोते, एन घिन्नेरे दस्तावेज़न ज़ैन पुड़ मोहर लेवरीए ते ज़ैस मोहर नईं लेवरी, एन्न नेइतां मित्तरे भांडन मां रख, ताके इना बड़े दिहाड़न तगर रान। 15 किजोकि इस्राएलेरो परमेशर सेना केरो यहोवा एन ज़ोते, एस मुल्खे मां घर ते ऊडार ते दाछ़री बागां फिरी बेच़ी ते घिन्नी गैली।’

16 "ज़ैखन मीं घिन्नेरो तै दस्तावेज़ नेरिय्याहेरे मट्ठे बारूकेरे हथ्थे मां दित्तो, तैखन मीं यहोवा कां ई प्राथना की, 17 ‘हे प्रभु यहोवा, तीं बड़े ताकती ते शेक्ति सेइं अम्बर ते धरती बनाई! तेरे लेई कोई कम मुश्किल नईं। 18 तू हज़ारन पुड़ दया केरतस पन दादे-पड़दादां केरे पापां केरो बदलो तैन केरे खानदानेरे लोकन भी देतस, हे महान ते शक्तिमान परमेशर, ज़ेसेरू नवं सेना केरो यहोवाए, 19 तू बड़ी योजना बनाने ते बड़ां-बड़ां कम्मां केरनेबालो आस; तेरी नज़री मैन्हेरे सारे चाल च़लने पुड़ लगोरी रहतीए, ते तू हर एक्‍की तैसेरे चाल च़लने ते कम्मां केरो फल देतस। 20 तीं मिस्र मुल्खे मां निशान ते चमत्कार किये, ते अज़ तगर इस्राएली लोकां बल्के सब लोकां केरे दरमियान तेन्च़रे केरतो एवरो आस, ते एन्च़रे सेइं तीं अपनु एरू नवं महान कियूं ज़ैन अज़्ज़ेरे दिहाड़े तगर बनोरूए। 21 तीं अपने इस्राएली लोक मिस्र मुल्खेरां निशान ते चमत्कार ते ताकतबर हथ ते अपने शेक्तरे ज़िरिये, ते बड़े-बड़े कम्मन सेइं केढतां आने। 22 फिरी तीं ऐह मुल्ख तैन दित्तो ज़ेसेरो वाधो तीं तैन केरे दादे-पड़दादन सेइं कियोरो थियो; ज़ैस मां दुद्ध ते मैछ़ेरी* धारां बेगतिन, ते तैना एइतां इस मुल्खेरे मालिक भोए। 23 फिरी भी तैनेईं तेरी न मन्नी, ते न तेरे कानूने पुड़ च़ले; बल्के ज़ैन किछ तीं तैन केरनेरो हुक्म दित्तोरो थियो, तैस मां तैनेईं किछ भी न कियूं। एल्हेरेलेइ तीं तैन पुड़ ऐह आफत छ़डी। 24 हुनी हेर दुश्मनेईं नगरे घेरो दित्तोरोए, तैना लोक एस नगरे नेनेरे लेई एवरेन, ते एन नगर तलवार, काल ते मरी एरे वजाई सेइं एन च़ढ़ोरे कसदी केरे कब्ज़े मां कियोरूए। ज़ैन तीं ज़ोवरू थियूं हुनी तैन पूरू भोवरूए, ते तू एस हेरतस भी। 25 फिरी भी, हे प्रभु यहोवा, तीं मीं सेइं ज़ोवरूए कि गवाह कुजेइतां तैस उडारे घिन्न, हालांकि एन नगर कसदी केरे कब्ज़े मां कियोरूए।’"

26 तैखन यहोवा मीं सेइं ज़ोवं, 27 "अवं त सेभी इन्सानां केरो परमेशर यहोवा आईं; कुन मेरे लेई कोई भी कम मुश्किले? 28 एल्हेरेलेइ यहोवा इन ज़ोते, हेर, अवं इन नगर कसदी ते बाबेलेरे राज़े नबूकदनेस्सरेरे कब्ज़े मां केरने पुड़ आईं ते तै एस नेलो। 29 ज़ैना कसदी एस नगरेरे खलाफ जंग केरि राहोरेन, तैना एइतां एसमां अग लेइतां फुकेले, ते ज़ैन घरां केरि छतन पुड़ तैनेईं बाल देबतेरे लेई गुग्गल बालो ते होरि देबतां केरे लेई पीनेरी च़ढ़तल च़ैढ़तां मीं नफरत दिवारी आहे, तैना घरां फुक्‍कां गालां। 30 किजोकि इस्राएल ते यहूदा, ज़ैन कम मीं बुरू लगते, तैन्ने बचपने करां केरते एवरेन; इस्राएली एपनी बेनोरी मूरतन सेइं मीं सरकाते एवरे आन, यहोवा एन ज़ोते। 31 एन नगर ज़ैखन करां बस्सोरूए तैखन करां अज़्ज़ेरे दिहाड़े तगर मेरी सरक ते क्रोधेरे भड़कनेरी वजा भोवरूए, एल्हेरेलेइ हुनी अवं एस अपने सामनेरां एल्हेरेलेइ दूर केरेलो। 32 किजोकि इस्राएल ते यहूदा अपने राज़न, हाकिमन, याजकन ते नेबन समेत, कुन यहूदा प्रदेशेरे, कुन यरूशलेमेरे रानेबाले, सब बुरैई पुड़ बुरैई केरतां अवं सरकावरोईं। 33 तैनेईं मेरी पासे तुत्तर नईं बल्के पिठ फिराई; हांलाकि अवं तैन लगातार शिखालतो एवरो आईं, फिरी भी तैनेईं मेरी शिक्षा न मन्नी। 34 बल्के ज़ैस भवने जो मेरो ज़ोतन, तैस मां भी तैनेईं एपनी भिट्टी मूरती रेखतां तै अशुद्ध कियोरोए। 35 तैनेईं हिन्नोमी केरे वैदी मां बाल देबतेरे उच्‍ची-उच्‍ची ठारां बनेइतां अपना मट्ठां कुइयां मोलेक देबतेरे लेई अग्गी मां बलिदान कियां, ज़ेसेरो हुक्म मीं न थियो दित्तोरोए, ते न ऐह गल कधे मेरे मने मां अई कि एरां भिट्टां कम्मां कियां गान कि ज़ैस सेइं यहूदी लोक पापे मां फसन।

36 "पन हुनी इस्राएलेरो परमेशर यहोवा एस नगरेरे बारे मां, ज़ेसेरे लेई तुस लोक ज़ोतथ, ‘तैन तलवार, काल ते मरी एरे ज़िरिये बाबेलेरे राज़ेरे कब्ज़े मां पेवरूए’ एन ज़ोते: 37 हेरा, अवं तैन्न तैन सेभी मुल्खन सेइं ज़ैन मां मीं सरक ते क्रोधे मां एइतां तैना ज़बरदस्ती कढोरे थिये, वापस एन्हतां इस नगरे मां अकोट्ठे केरेलो, ते निडर केरतां बसेइलो। 38 ते तैना मेरे लोक भोल्हे, ते अवं तैन केरो परमेशर भोल्हो।✝ 39 अवं तैन अक मन ते अक चाल केरेलो कि तैना हमेशा मेरो डर मन्ते रान, ज़ैस सेइं तैन केरू ते तैन केरे बाद तैन केरे खानदानेरू भी भलू भोए। 40 अवं तैन सेइं ऐह करार केरेलो, कि अवं कधे तैन केरू साथ छ़ेडतां तैन केरू भलू केरनू न शारेलो; ते अपनो डर अवं तैन केरू मने मां एरहो पैदा केरेलो कि तैना कधे मीं करां अलग भोनू न चाले।✝ 41 अवं बड़ी खुशी सेइं तैन केरू भलू केरतो रेइलो, ते सच़्च़े तैन एस मुल्खे मां अपने सारे मने ते प्राण सेइं बसेइलो।

42 "हेरा, यहोवा एन ज़ोते कि ज़ेरो मीं अपने एन लोकन पुड़ ई बड़ी मुसीबत छ़डी, तेन्च़रे ही सच़्च़े एन सेइं तै सब भलियाई भी केरेलो ज़ेसेरे केरने वाधो मीं कियोरोए। एल्हेरेलेइ ऐह मुल्ख ज़ेसेरे बारे मां तुस लोक ज़ोतथ, 43 कि ऐह उज़ड़ी गालो, एसमां न त मैन्हु राहोरेन ते न जानबर, ऐह त कसदी लोकां केरे कब्ज़े मां पेवरोए, एसमां फिरी ऊडारां घिन्ना गालां, 44 ते बिन्यामीनेरे इलाके मां, यरूशलेमेरे आसे-पासे, ते यहूदा प्रदेशेरे मतलब पहाड़ी प्रदेश, बुनीयें मुल्ख ते दक्षिण मुल्खेरे नगरन मां लोक गवाह कुजेइतां ऊडार घिन्तां नेले, ते पुराने दस्तावेज़े मां दस्तखत ते मोहर लाएले; किजोकि अवं तैन केरे दिहाड़े वापस आनेलो; यहोवा एन ज़ोते।"