1 यहूदा प्रदेशेरे राज़े सिदकिय्याहेरे राज़ केरनेरे नोवोवं सालेरे दशोवं महीने मां, बाबेलेरे राज़े नबूकदनेस्सरे अपनि सारी सेना समेत यरूशलेम नगरे पुड़ चढ़ाई केरतां तैन घेरू। 2 ते सिदकिय्याहेरे राज़ेरे राज़ केरनेरे यारोवं सालेरे च़ेवरोवं महीनेरे नोवोवं दिहाड़े तैस नगरेरी शहरपनाह ट्लोड़ी छ़डी। 3 ज़ैखन यरूशलेम नगरे पुड़ कब्ज़ो कियो जेव, तैखन नेर्गलसरेसेर, समगर्नबो ते खोजां केरो प्रधान सर्सकीम, ते मगों केरो प्रधान नेर्गलसरेसेर, बाबेलेरे राज़ेरे सब हाकिम मझ़ाटेरे फाटके मां दाखल भोइतां बिश्शी जे। 4 ज़ैखन यहूदारे राज़े सिदकिय्याह ते सब जंग लड़नेबाले सिपैहेईं तैना लाहे, तैखन तैना रातो-रात राज़ेरे बागरे बत्तां दूईये दिवारां केरे मझ़ाटेरे फाटके मांमेइं नगरे मरां निस्तां नश्शे ते अराबारे* बत्तां च़ले जे। 5 पन कसदी केरि सेना तैन केरो पीछो केरतां सिदकिय्याह यरीहो नगरेरे मैइदानी इलाके मां ट्लाव ते तैनेईं बाबेलेरे राज़े नबूकदनेस्सरे कां हमात प्रदेशेरे रिबला नगरे मां नेव; ते तैनी तैड़ी तैस सज़ाह देनेरो हुक्म दित्तो। 6 तैखन बाबेलेरे राज़े सिदकिय्याहेरां मट्ठां तैसेरे सामने रिबला नगरे मां मारां; ते सब खानदानी यहूदी अधिकारी भी मारे। 7 तैनी सिदकिय्याह राज़ेरी एछ़्छ़ी केढी ते तै बाबेल जो गानेरे लेई बेड़िन सेइं बेन्धतां रख्खो। 8 कसदी सेना राज़ेरो मेहल ते लोकां केरां घरां अग लेइतां फुक्‍कां, ते यरूशलेम नगरेरी शहरपनाह बिछ़ोड़ी। 9 तैखन अंगरक्षकां केरो प्रधान नबूजरदाने ज़ैना लोक नगरे मां रेइ जेवरे थिये, ते ज़ैना लोक तैस कां नेशतां एवरे थिये यानी ज़ेत्रे लोक रेइ जेवरे थिये, तैना सब कैदी बनेइतां बाबेले जो निये। 10 पन ज़ैना लोक एत्रे गरीब थिये ज़ैन कां किछ न थियूं, तैना अंगरक्षकां केरे प्रधान नबूजरदाने यहूदा प्रदेशे मां छ़डे, ते गांते बार तैन दाछ़री बागां ते ऊडारां दित्तां।

11 बाबेलेरे राज़े नबूकदनेस्सरे अंगरक्षकां केरे प्रधान नबूजरदाने मेरे बारे मां ऐह हुक्म दित्तो, 12 "यिर्मयाह नेइतां तैस पुड़ सिद्धी नज़र रख ते तैसेरो कोई नुकसान नईं केरनो; ज़ेन्च़रे तै तीं सेइं ज़ोए तेन्च़रे ही तैस सेइं सलूख केरां।" 13 एल्हेरेलेइ अंगरक्षकां केरे प्रधान नबूजरदान ते खोजां केरे प्रधान नबूसजबान ते मगों केरे प्रधान नेर्गलसरेसेर ते बाकी अधिकारी, 14 ते बाबेलेरे राज़ेरे सेभी प्रधानेईं, लोक भेज़तां अवं पहरेरे अंगने मरां एप्पु कां कुजव ते गदल्याह ज़ैन अहीकामेरू मट्ठू ते शापानेरू पोट्लड़ू थियूं सौंफी दित्तो, कि अवं तैस घरे पुज़ाए। तैखन करां अवं लोकन सेइं साथी राने लगो।

15 ज़ैखन अवं पहरेरे अंगने मां कैद थियो, तैखन यहोवा मीं सेइं ज़ोवं, 16 "गेइतां एबेदमेलेक कूशी सेइं ज़ो, ‘इस्राएलेरो परमेशर सेना केरो यहोवा तीं सेइं एन ज़ोते: हेर, मीं अपने तैना वचन ज़ैन मीं एस नगरेरे बारे मां ज़ोवरेन एन्च़रे सेइं पूरे केरेलो कि एसमां सुख न भोल्हु, नुकसाने भोल्हो, ते तैस वक्त तैन केरू पूरू भोनू तीं लेइहोलू। 17 पन यहोवा एन ज़ोते, कि तैस वक्त अवं तीं बच़ेइलो, ते ज़ैन लोकन करां तू डरतस, तू तैन केरे कब्ज़े मां न कियो गालो। 18 किजोकि अवं तीं ज़रूर बच़ेइलो, ते तू तलवारी सेइं न मरेलो, ते तेरी जान बच़ेली, यहोवा एन ज़ोते। एन एल्हेरेलेइ भोल्हु, कि तीं मीं पुड़ भरोसो कियोरोए।’"