यिर्मयाह 21

सिदकिय्याह राज़ेरी बिनती कबूल नईं

1 यहोवा मीं सेइं तैस वक्त गल की, ज़ैखन सिदकिय्याह राज़े मीं कां मल्किय्याहेरे मट्ठे पशहूर ते मासेयाह याजकेरे मट्ठे सपन्याहेरे ज़िरिये ई भेज़ो, 2 "इश्शे लेई यहोवा पुछ़, किजोकि बाबेलेरो राज़ो नबूकदनेस्सर इश्शे खलाफ जंग केरि राहोरोए; कोन्च एरू न भोए कि यहोवा असन सेइं अपने सब बड़ां-बड़ां कम्मां केरे मुताबिक एरहो सलूख केरे कि तै असन करां च़लो गाए।"

3 तैखन मीं तैन जुवाब दित्तो, "तुस सिदकिय्याह सेइं इन ज़ोथ, 4 इस्राएलेरो परमेशर यहोवा एन ज़ोते: ‘हेरा, जंगरे लेई ज़ैना हथियार तुश्शे हथ्थन मां आन, ज़ैन सेइं तुस बाबेलेरे राज़े ते शहरपनाह बेइर घेरने बाले कसदी लोकन सेइं लड़ने लगोरेथ, तैन अवं वापस एइतां एस नगरेरे मझ़ाटे अकोट्ठे केरेलो; 5 ते अवं एप्पु हथ खड़ो केरतां ते अपने शेक्ति सेइं, ते अपने क्रोध ते बड़े जलजलाहटी सेइं ते बड़े सरकी सेइं तुश्शे खलाफ लड़ेलो। 6 अवं एस नगरेरे रानेबालन कुन मैन्हु, कुन जानबर सेभन मारेलो; तैना बड़ी मरी सेइं मरेले। 7 तैसेरां बाद, यहोवा एन ज़ोते, हे यहूदा प्रदेशेरे राज़ा सिदकिय्याह, अवं तीं, तेरे अधिकैरन ते लोकन, बल्के ज़ैना लोक एस नगरे मां मरी, तलवार ते काले करां बच़ोरे राले तैन्न बाबेलेरे राज़े नबूकदनेस्सर ते तैन केरे जानरे दुश्मना केरे कब्ज़े मां केरेलो। तै तैन तलवारी सेइं मारेलो; तैन पुड़ न त तै तरस खालो, न किछ नरमी हिरालो ते न किछ दया केरेलो।’✝21:7 लूक. 21:24.

8 "तैखन यहोवा मीं सेइं ज़ोवं, बाकी लोकन सेइं ज़ो कि यहोवा एन ज़ोते, हेरा, अवं तुश्शे सामने ज़िन्दगरी बत ते मौतरी बत ज़ोताईं। 9 ज़ै कोई एस नगरे मां राए तै तलवार, काल ते मरी सेइं मरेलो। पन ज़ै कोई निस्तां तैन कसदी लोकन कां नेश्शी गाए ज़ैनेईं तुस घेरोरेथ तै ज़ींतो रालो, ते तैसेरी जान बच़ेली। 10 किजोकि यहोवा एन ज़ोते कि मीं एस नगरेरे पासे अपनु तुत्तर भलियाई केरनेरे लेई नईं, बल्के बुराई केरनेरे लेई कियोरूए। एन बाबेलेरे राज़ेरे कब्ज़े मां भोल्हु, ते तैना एस फुकेले।"

दाऊदेरे घरानेरे लेई सन्देश

11 "यहूदारे राज़ घरानेरे लोकन सेइं ज़ो, ‘यहोवारू वचन शुना, 12 हे दाऊदेरे खानदानेरे लोकव! यहोवा एन ज़ोते, झ़ेझ़ां न्याय केरा, ते लुटोरे ज़ुलम केरनेबालेरे कब्ज़े मरां छुटाथ, न त तुश्शे बुरे कम्मां केरि वजाई सेइं मेरी सरकरी अग भड़केली, ते एरी ज़लती राली कि कोई तैस हिशेई न सकेलो।’

13 "हे यरूशलेम वैदी मां रानेबाली ते मैइदानी मुल्खेरी चट्टान; तुस ज़ैना ज़ोतथ, ‘असन पुड़ कौन चढ़ाई केरि सकेलो, ते इश्शे रानेरी ठारन मां कौन दाखल भोइ सकेलो?’ यहोवा ज़ोते कि अवं तुश्शे खलाफ आईं। 14 ते यहोवा एन ज़ोते कि अवं तुसन सज़ाह देइतां तुश्शे कम्मां केरो फल तुसन भुगतालो। अवं तैसेरे जंगले मां अग लेइलो, ते तैसेरे च़ेवरे पासन सब किछ भस्म भोइ गालू।"