1 यहोवा मीं सेइं ज़ोवं, 2 "गा ते यरूशलेम नगरे मां उच्‍ची आवाज़ी सेइं ज़ो, यहोवा इन ज़ोते, मीं यादे ज़ैखन तू जुवान थी त तू केत्री वफादार थी, ते ड्लाहेरे वक्त तू मीं सेइं केत्रो प्यार केरती थी ते सुनसान ठैरी मां केन्च़रे मीं पत्पती च़ली ज़ैड़ी ज़मीनदारी न थी भोती। 3 इस्राएल, यहोवारे लेई पवित्र ते फसलरो पेइलो फल थियो। तैस खानेबाले सब दोषी भोल्हे ते मुसीबती मां पेले, यहोवा एन ज़ोते।"

4 हे याकूबेरे खानदानेरे लोकव, हे इस्राएलेरे कुलां केरे सब लोकव, यहोवारू एन वचन शुना! 5 यहोवा इन ज़ोते, "तुश्शे दादे-पड़दादन मीं मां कौ बुराई मैल्ही कि तैना मीं करां दूर भोए ते निकेम्मी मूरती केरि पूज़ा केरतां एप्पु निकम्मे भोइ जे? 6 तैनेईं एत्रू भी न पुछ़ू, ‘यहोवा कोड़िए? ज़ैनी असां मिस्र मुल्खे मरां आने, ज़ै असन सुनसान ठैरी मांमेइं ते रेतरे खडन सेइं भेरतां बगैर पैनेरे ते बड़े खतरेरे मुल्खे मांमेइं ज़ैन मां कोई न च़ले, ते ज़ैस मां कोई मैन्हु न राए।’ 7 ते मीं तुसां इस फलदार मुल्खे मां आने कि तैसेरो फल ते रोड़ी-रोड़ी फसल खाथ; पन मेरे इस मुल्खे मां एइतां तुसेईं ऐह अशुद्ध कियो, तै मेरो ई हिस्सो भिट्टो केरि छ़डो। 8 याजकेईं भी न पुछ़ू, ‘यहोवा कोड़िए?’ ज़ैना कानून शिखालते थिये तैना भी मीं न थिये ज़ानते; हुकूमत केरनेबाले मेरे खलाफ भोए; नेबेईं भी बाल देबतेरे नंव्वे सेइं नबूवत की, ते फुज़ूल मूरती केरि पूज़ा की।"

9 "एल्हेरेलेइ यहोवा इन ज़ोते, अवं तुसन सेइं फिरी बेंस केरेलो, ते तुश्शे एजने बाले पीढ़न भी सवाल पुछ़ेलो। 10 कित्ती लोकां केरे जज़ीरन मां पार गेइतां हेरां, या केदार नंव्वेरे ठैरी मां दूत भेज़तां रोड़ेच़ारे सोच विचार केरा; हेरा, कि एरू कम होरि कोन्ची ठारी भी भोवरूए? कुन कोन्ची कौमां अपने देबते बदलोरे भोन ज़ैना परमेशर भी नईं? 11 पन मेरे लोकेईं अपनो महिमा बालो परमेशर बेकार मूरतन सेइं बदलोरोए। 12 हे अम्बर हैरान भो, बड़ू थर्क ते सुनसान भोइ गा, यहोवा एन ज़ोते। 13 किजोकि मेरे लोकेईं दूई बुरैई कियोरिन: तैनेईं अवं ज़िन्दगरे पैनेरो नाग शारोरो आईं, ते तैनेईं कुण्ड बनेवरां आन, बल्के एरां कुण्डां आन ज़ैना ट्लुटोरन, ज़ैन मां पानी न रेई सखे।"✝

14 कुन इस्राएल गुलामे? कुन तै घरे मां ज़रमने करां गुलामे? तै किजो अपने दुश्मना केरो शिकार बनो? 15 तैसेरे दुश्मन जुवान शेरेरे ज़ेरे तैस पुड़ गरज़े। तैनेईं तैसेरो मुल्ख उज़ाड़ो; तैनेईं तैसेरे नगर एन्च़रां उज़ाड़े कि कोई बस्सने बालो न राव। 16 नोप ते तहपन्हेस नगरां केरे लोकेईं भी मुल्खेरी फसल चट केरतां छ़डी। 17 कुन ई तेरे केरनरो फल नईं, ज़ै तीं अपनो परमेशर यहोवा शारो ज़ैनी तू बत्तां च़लाव? 18 हुनी तीं मिस्रेरे पासे तकने सेइं कुन फैइदोए कि तू नील* दरियारू पानी पीस? ते कने अश्शूरेरे बत्ती करां भी कुन फैइदोए कि तू फरात दरियारू पानी पीस? 19 तेरी बुराई तीं सज़ाह देली, ते तेरू मीं करां दूर भोनू तीं झ़िड़क देलू। ई गल ज़ान ते हेर कि अपनो परमेशर यहोवा शारनो, ई बुरी ते ट्लिठी गल्‍ले। तीं मेरो डर न राव, प्रभु सेना केरे यहोवारू एन्ने ज़ोनूए।

20 "किजोकि बड़े पेइले मीं तीं पुड़ ज़ुलम केरनेबालू जुऊं ट्लोड़ू ते तेरी रेस्सी खोल्‍ली; पन तीं ज़ोवं, ‘अवं सेवा न केरेली।’ ते सब उच्‍चे-उच्‍चे पहैड़न पुड़ ते सब सब्ज़ बुट्टन हैठ तू व्यभिचार केरनेबाले कौन्शरू ज़ेरू कम केरती राई। 21 मीं त तू रोड़े किसमेरी दाछ़ ते रोड़ू बीज़ केरतां लेवी थी, फिरी तू किजो मेरे लेई जंगली दाछ़ बेनि जेई? 22 चाए तू अपनो आप सिज्जी सेइं धोस ते बड़ी साबन भी इस्तेमाल केरस, फिरी भी तेरे अधर्मेरो दाग मेरे सामने बनोरो रालो, प्रभु यहोवा एन ज़ोते। 23 तू केन्च़रे ज़ोतिस कि अवं अशुद्ध नईं, मीं बाल देबतेरे मूरती केरि पूज़ा नईं कियोरी? वैदी मां अपनि चाल हेर ते समझ़ कि तीं कुन कियोरूए? तू तेज़ च़लनेबाली ते इरां उरां फिरने बाली ऊँटनरी ज़ेरि आस ज़ै ऊँटे, 24 जंगले मां पलोरी गेधरी ज़ेरि ज़ै गधेरे तोपी मां हवा शीगचे, तैखन तैस कौन कैबू केरि सकते? ज़ेत्रे तैस तोपतन तैन बेकार मेहनत न केरन; किजोकि तैन तै एरे वक्ते मां मैल्हेली। 25 अपने पव नग्गे ते गलो शुकोरो न रख। पन तीं ज़ोवं, ‘नईं, एरू न भोइ सके, किजोकि मेरो प्यार होरे देबतन सेइं भोवरोए ते अवं तैन पत्पती च़लती राली।’

26 "ज़ेन्च़रे च़ोर ट्लाव गाने पुड़ शरमिन्दो भोते, तेन्च़रे ही इस्राएलेरो घरानो, राज़न, हाकिमन, याजकन ते नेबन समेत शरमिन्दो भोल्हो। 27 तैना लेकड़रे मूरतन सेइं ज़ोतन, ‘तू मेरो बाजी आस,’ ते घोड़ेरे मूरतन सेइं ज़ोतन, ‘तीं मीं ज़र्म दित्तोरूए।’ इस तरीके तैनेईं मेरे पासे तुत्तर नईं पिठ ही फेरी; पन आफतरे वक्त तैना ज़ोतन, ‘उठतां असन बच़ा!’ 28 पन ज़ैना देबते तीं अपने लेई बनेवरेन, तैना कोड़ि राए? अगर तैना तेरे मुसीबतरे वक्ते मां तीं बच़ेइ सकतन त हुन्ना उठन; किजोकि हे यहूदा, तेरे नगरां केरे ज़ेरे तेरे देबते भी बड़े आन!"

29 तुस मीं सेइं किजो बेंस केरने लगोरेथ? तुसेईं सेभेइं बगावत कियोरीए, यहोवारू एन ज़ोते। 30 मीं बेकार तुश्शे मट्ठन झ़िड़क दित्ती, किजोकि तैनेईं किछ भी न मन्नू; तुसेईं अपने नबी अपने तलवारी सेइं एन्च़रे मारे ज़ेन्च़रे शेर छ़िन्दते। 31 हे लोकव, यहोवारे वचने पुड़ ध्यान देथ! कुन अवं इस्राएलेरे लेई सुनसान जगाह या बड़े आंधारेरो मुल्ख बनो? तैखन मेरे लोक किजो ज़ोतन कि "असां त आज़ाद भोइ जे एल्हेरेलेइ तीं कां फिरी न एजमेले?" 32 कुन कुमारी अपने श्रृंगार या मारहनी अपनि सजावट बिसरी सकतीए? फिरी भी मेरे लोकेईं अवं बड़ो च़रोकनो बिसरोरो आईं।

33 "प्यार हासिल केरनेरे लेई तू केरि रोड़ी चाल च़लती आस! बुरी कौन्शन भी तीं अपनि ज़ेरि चाल शिखालोरीए। 34 तेरे लिगड़न मां बेकसूर ते गरीब लोकां केरे खूनेरो निशान मैलतन; तीं तैना च़ोरी केरते न ट्लाए। पन एन भोनेरे बावजूद भी 35 तू ज़ोतिस, ‘अवं बेकसूर आईं; ज़रूर तैसेरो क्रोध मीं पुड़ हेटी गालो।’ हेर, तू ज़ैन ज़ोतिस, ‘मीं पाप नईं कियोरो,’ एल्हेरेलेइ अवं तीं सज़ाह देइलो। 36 तू किजो नंव्वी बत्तां ट्लानेरे लेई एत्री डामाडोल फिरतिस? ज़ेरि तू अश्शूरी लोकन करां शरमिन्दा भोइ तेन्च़रे मिस्री लोकन सेइं भी भोल्ही। 37 तैट्ठां भी शरमरे मारे तू दोग्गे पुड़ हथ रेखतां एरी च़ली एज्जेली, किजोकि ज़ैन पुड़ तीं भरोसो रखोरोए तैना यहोवा निकम्मे ठहरावरेन, ते तैन केरे वजाई सेइं तू कामयाब न भोल्ही।"