यिर्मयाह 5

यरूशलेमेरे पाप

1 यहोवा यरूशलेम नगरेरे लोकन सेइं ज़ोते, नगरेरे सड़कन मां इरां-उरां देवड़तां हेरा! तैसेरे चौकन मां तोप्पा अगर कोई एरहो मैल्ही सके ज़ै न्याय सेइं कम केरे ते सच़्च़ाई तोपनेबालो भोए; त अवं तैसेरे पाप माफ़ केरेलो। 2 अगर तैसेरे लोक यहोवारी कसम भी खान, फिरी भी सच़्च़े तैना झूठी कसम खातन। 3 हे यहोवा, कुन तेरी नज़र सच़्च़ैई पुड़ नईं? तीं तैन्न दुख दित्तो, पन तैन कोई फर्क न पेव; तीं तैना नाश न किये, पन तैनेईं सज़ाही सेइं भी न मन्नू। तैनेईं अपनो मन चट्टानी करां भी जादे सखत कियोरोए; तैनेईं पाप मेनतां पसताने करां इन्कार कियूं।

4 फिरी मीं अपने आपे सेइं ज़ोवं, "इना लोक त कंगाल ते बेवकूफ आन; किजोकि इना यहोवारी बत्तां ते अपने परमेशरेरो नियम न ज़ानन। 5 एल्हेरेलेइ अवं प्रधान्न कां गेइतां तैन सेइं गल केरेलो; किजोकि तैना त यहोवारी बत्तां ते अपने परमेशरेरे कानूने ज़ानतन।" पन तैनेईं सेभेइं मिलतां जुऊं ट्लोड़ू ते रेस्सी खोल्‍ली छ़ेडी।

6 एल्हेरेलेइ जंगले मरां अक शेर एइतां तैन्न मारेलो, खुशक मुल्खेरू अक गिद तैन्न पुड़ हमलो केरेलू। ते अक ड्लाघ तैन केरे नगरन कां ढोक देइतां बिशेलो, ते ज़ै कोई तैन मरां निस्से तै छ़िन्दो गालो; किजोकि तैन केरे पाप बड़े बधोरेन ते तैना मीं करां बड़े दूर भेवरेन।

7 यहोवा यहूदारे लोकन पुछ़ते, "कुन अवं तेरे पाप माफ़ केरि? तेरे मट्ठेईं अवं शारो ते तैन केरि कसम खेवरीए ज़ैना परमेशर नईं। ज़ैखन मीं तैन केरू पेट भरू, तैखन तैनेईं व्यभिचार कियो ते वेश्या केरे घरन मां बड़े लोक गाते थिये। 8 तैना एरे घोड़ां केरे ज़ेरे भोए ज़ैना खुवेइतां पियेइतां बेलगाम आन, तैना अपने-अपने पड़ोसेरे कौन्शी पुड़ बुरी नज़रां तकने लगे ज़ेन्च़रे घोड़े खिनकतन। 9 कुन एरां कम्मां केरे लेई अवं तैन्न सज़ाह न देईं? यहोवा एन ज़ोते; कुन अवं एरी कौमी करां बदलो न नेही?"

यहोवा इस्राएले रद केरते

10 अवं दुश्मन्न ज़ोइलो दाछ़री बागन बरबाद त केरा, फिरी भी तैसेरो खातमों न केरि छ़डा; तैसेरू ज़ील राने देथ पन तैसेरी डैलड़न ट्लोड़तां शैरी छ़डा, किजोकि तैना यहोवारी नईं। 11 यहोवा एन ज़ोते कि इस्राएल ते यहूदारे लोकेईं मीं सेइं बड़ो धोखो कियोरोए। 12 तैनेईं झूठ ज़ोइतां ज़ोवं, यहोवा एरहो नईं; मुसीबत असन पुड़ न पेली, न असां तलवार ते न काले हेरमेले। 13 नबी हवारे ज़ेरे भोइ गाले; तैन मां परमेशरेरू वचन नईं। तैन सेइं साथी एरू कियूं गालू!

न्यायेरू एलान

14 एल्हेरेलेइ सेना केरो परमेशर यहोवा एन ज़ोते: "इना लोक ज़ैना एरू ज़ोतन, एल्हेरेलेइ हेर, अवं अपनु वचन तेरे ऐशी मां अग्गरू ज़ेरू, ते इन लोकन लेकड़ो ज़ेरो बनेइलो, ते मेरू वचन अग्गरू ज़ेरू तैन्न भस्म केरेलू।✝5:14 यिर्म. 23:29. 15 यहोवा एन ज़ोते, हे इस्राएली लोकव, हेर अवं तुश्शे खलाफ दूरेरां एरी कौम च़ैढ़तां आनेलो ज़ै ताकतबर ते पुरानीए, तैसेरी भाषा तुस न समझ़ेले, ते न इन बुझ़ेले कि तैना लोक कुन ज़ोईं राहोरेन। 16 तैन केरो तरकश खुल्‍ली कब्रे ते तैना सब शूरबीर आन। 17 तुश्शे उडारेरी पकोरी फसल ते खानेरी चीज़ां ज़ैना तुश्शे मट्ठां कुइयां केरे खानेरे लेई आन तैना खाएले। तैना तुश्शां गब्बां गोरू खाएले; तैना तुश्शी दाछ़ां ते फैगू खाएले; ते ज़ैन क़िले बाले नगरन पुड़ तुस भरोसो केरथ तैन तैना तलवारारी ताकती सेइं नाश केरेले।"

18 "फिरी भी यहोवा एन ज़ोते, तैन दिहाड़न मां भी अवं तुश्शो खातमो न केरेलो। 19 ज़ैखन लोक तीं पुछ़ेले, ‘इश्शे परमेशर यहोवा असन सेइं इनां कम्मां किजो कियोरन,’ तैखन तू तैन ई जुवाब देइयां, ‘ज़ेन्च़रे सेइं तुसेईं अवं शैरतां अपने मुल्खे मां होरि देबतां केरि सेवा की, तेन्च़रे तुसन बखले मुल्खे मां परदेशी लोकां केरि सेवा केरनी पेली।’"

यहोवा अपने लोकन खबरदार केरते

20 याकूबेरे खानदानेरे लोकन मां ई प्रचार केरा, ते यहूदा प्रदेशे मां इन शुनाथ, 21 "हे बेवकूफ ते बेअक्ल लोकव, तुस ज़ैना एछ़्छ़ी भोते संते न लाथ, ज़ैना कन भोते संते भी न शुनथ, इन शुना।✝5:21 प्रेरित. 28:26;मरक. 8:18. 22 यहोवा एन ज़ोते, कुन तुस लोक मेरो डर न मन्थ? कुन तुस मेरे सामने न थरकथ? मीं रेत समुन्दरेरी हद ठहरेइतां जुग-जुगेरो एरहो बाँध ठहराव कि तै तैस पार न केरि सके; ते चाहे तैसेरी छ़ेल्ही भी उठन, फिरी भी तैना हावी न भोइ सकन, या ज़ैखन तैना गरज़न फिरी भी तैस पार न केरि सकन। 23 पन इन लोकां केरो मन ज़िद्दी ते बगावत केरनेबालोए; तैनेईं बगावत की ते दूर भोए। 24 तैना अपने मने मां एत्रू भी न सोचन कि इश्शो परमेशर यहोवा त बरसांतरे शुरुआती ते खतम भोनेरे दूईये वक्तन पुड़ झ़ड़ी बखाते, ते फल कटनेरे हफते इश्शे लेई रखते, एल्हेरेलेइ असां तैसेरो डर मन्नम।✝5:24 प्रेरित. 14:17. 25 पन तुश्शे अधर्मेरे कम्मां केरे वजाई सेइं इनां बरकतां रुकी जेई, ते तुश्शे पापां केरे वजाई सेइं तुश्शी भलियाई न भोए। 26 मेरे लोकन मां दुष्ट लोक आन; ज़ेन्च़रे च़ुड़ोली ट्लाने बालो ताकी मां रहते, तेन्च़रे तैना भी ताकी मां रहतन। तैना फंदे लेइतां मैन्हन अपने कब्ज़े मां केरतन। 27 ज़ेरो शिकैरेरो पिंजरो च़ुड़ोलन सेइं भेरतां भोए, तेन्च़रे तैन केरां घरां धोखे सेइं भेरतां रहतन; एस्से वजाई सेइं तैना बेधी जे ते धनी भोइ जे। 28 तैना मोट्टे ते चिकने भोइ जेवरेन। बुरे कम्मन मां तैनेईं हद पार की; तैना न्याय, खास केरतां अनाथां केरो न्याय न केरन; इस सेइं एन केरू कम कामयाब न भोए, तैना गरीबां केरू हक भी न दुवान। 29 एल्हेरेलेइ यहोवा ज़ोते, कुन अवं इन गल्‍लां केरि सज़ाह न देईं? कुन अवं एरी कौमी करां बदलो न नेही?"

30 मुल्खे मां एरू कम भोते ज़ैस सेइं हैरान भोवरू लोड़े। 31 नबी झूठी नबूवत केरतन; ते याजक तैन केरे सहारे सेइं लोकन पुड़ राज़ केरतन; मेरे लोकन एन रोड़ू भी लगते, पन आखरी वक्ते मां तुस कुन केरेले?