1 ज़ैस मौके अवं पहरेरे अंगने मां बन्द थियो, तैस वक्त यहोवा दूइयोवं बार मीं सेइं ज़ोवं, 2 "यहोवा ज़ैनी धरती बनेवरीए, ज़ै तैस कायम केरते, तैसेरू नवं यहोवाए; तै एन ज़ोते, 3 मीं कां प्राथना केर ते अवं तेरी शुन्तां तीं बेड़ी-बेड़ी ते भेदेरी गल्‍लां ज़ोइलो ज़ैन तू हुन्ना न समझ़स। 4 किजोकि इस्राएलेरो परमेशर यहोवा एस नगरेरे घेरां केरे बारे मां ते यहूदारे राज़ां केरे मेहलां केरे बारे मां, ज़ैना एल्हेरेलेइ बिछ़ोड़े गातन कि हमलन ते तलवारन सेइं मोरच़ो बन्दी केरतां लेड़ी सके, एन ज़ोते, 5 कसदी लोकन सेइं जंग केरने तैना लोक एजने त एइतन, पन अवं सेरकोतां ते क्रोधे मां एइतां तैन मारेइलो ते तैन केरि लाशन सेइं तैस्से ठारी मां भरेलो; किजोकि तैन केरि बुरैइारे वजाई सेइं अवं तैन करां दूर भोवरोईं। 6 हेरा, अवं इस नगरेरे लोकां केरो आलाज़ केरतां एन लोकन ठीक केरेलो; ते तैन पुड़ पूरी शान्ति ते सच़्च़ाई बांदी केरेलो। 7 अवं यहूदा ते इस्राएलेरे कैदन वापस तैन केरे मुल्खे मां आनेलो, ते तैन पेइलेरे ज़ेरे बसेइलो। 8 अवं तैन्न तैन केरे सारे अधर्म ते पापेरे कम्मन करां शुद्ध केरेलो ज़ैना तैनेईं मेरे खलाफ कियोरन; ते तैनेईं ज़ेत्रे अधर्म ते पाप मेरे खलाफ कियोरेन, तैना सब अवं माफ़ केरेलो। 9 किजोकि तैना तैन सब भलैइयरे कम्मां शुनमेले ज़ैन अवं तैन केरे लेई केरेलो ते तैना सब भलियाई ते सुखेरे बारे मां चर्चा शुन्तां ज़ैन अवं तैन सेइं केरेलो, डरेले ते थरकेले; तैना धरती तैन कौमां केरि नज़री मां मेरे लेई खुशी ते तारीफ़ ते शोभारे वजा भोइ गाले।

10 "यहोवा एन ज़ोते, ऐह ठार ज़ेसेरे बारे मां तुस लोक ज़ोतथ, ‘ई त उज़ड़ी जेई, एसमां न त मैन्हु रेई जेवरेन ते न जानबर,’ मतलब यहूदा प्रदेशेरे नगर ते यरूशलेम नगरेरी सड़कां ज़ैना एरी बेरान भोइ जेवरिन कि तैन मां न त कोई मैन्हु रहते ते न कोई जानबर, 11 एन्ने मां खुशी ते आनन्देरो शब्द, महरावे महरनरी आवाज़, एस गल्‍लरे ज़ोने बालां केरि आवाज़ फिरी शुनोली: ‘सेना केरो यहोवारू शुक्र केरा, किजोकि यहोवा भलोए, ते तैसेरी दया हमेशारीए!’ ते यहोवारे भवने मां शुक्रेरी बलि आन्ने बाला केरो शब्द शुनोलो; किजोकि अवं इस मुल्खेरी हालत पेइलेरी ज़ेरि केरेलो, यहोवा एन ज़ोते।

12 "सेना केरो यहोवा ज़ोते: सब ड्लाव्वन समेत ऐह ठार ज़ै एरी बेराने कि एसमां न त मैन्हु रेई जे ते न जानबर, एस्से मां गब्बां बिशालने बाले पुहाल फिरी न बस्सेले। 13 पहाड़ी मुल्खे मां ते बुनीयें मुल्खे मां, दक्षिण मुल्खेरे नगरन मां, बिन्यामीनेरे इलाके मां, ते यरूशलेम नगरेरे आसे-पासे, मतलब यहूदा प्रदेशेरे सेभी नगरन मां गब्बां फिरी गेनि-गेनतां च़ारां गालां, यहोवा एन ज़ोते।"

14 यहोवा एन भी ज़ोते, "हेर, एरे दिहाड़े एजने बाले आन कि भलैइयरे बारे मां ज़ैन वचन मीं इस्राएल ते यहूदारे घराना केरे बारे मां ज़ोवं, तैन पूरू केरेलो। 15 तैन दिहाड़न मां ते तैस वक्ते मां, अवं दाऊद राज़ेरे खानदाने मां धार्मिकतारी अक डालड़ी* लेइलो; ज़ै एस मुल्खे मां न्याय ते धार्मिकतारां कम्मां केरेलो।✝ 16 तैन दिहाड़न मां यहूदा प्रदेश बच़ोरो रालो ते यरूशलेम निडर बस्सोरो रालो; ते तैसेरू नवं एन रख्खू गालू मतलब ‘यहोवा इश्शी धार्मिकता।’

17 "यहोवा एन ज़ोते, दाऊदेरे कुले मरां इस्राएलेरे घरानेरे तखते पुड़ बिशने बाले हमेशा बनोरे राले, 18 ते लेवी याजकां केरे कुलन मां रोज़ मेरे लेई होमबलि च़ाढ़ने बाले ते अन्नबलि च़ाढ़ने बाले ते मेलबलि च़ाढ़ने बाले हमेशा बनोरे राले।"

19 फिरी यहोवा मीं सेइं ज़ोवं, 20 "यहोवा एन ज़ोते: मीं दीसां ते रातरे बारे मां ज़ै करार कियोरे, ज़ैखन तुस तैस एन्च़रे ट्लोड़ी सकेले कि दीस ते रात अपने-अपने वक्ते पुड़ न भोन, 21 तैखन ज़ै करार मीं अपने दास दाऊदे सेइं कियोरोए ट्लूटी सकेलो, कि तेरे खानदानेरे तखते पुड़ बिशने बाले हमेशा बनोरे राले, ते मेरो करार मेरी सेवा केरनेबाले लेवी याजकन साथी कियोरो रालो। 22 ज़ेन्च़रे अम्बरेरी सेनारी गिनती ते समुन्दरेरे रेतरी सिक्‍कां गेनोई न सकन तैस्से तरीके अवं अपने दास दाऊदेरे खानदाने ते अपने सेवकन लेवी लोकन बधेइतां बेशुमार केरेलो।"

23 यहोवा यिर्मयाह सेइं ज़ोवं, 24 "कुन तीं न हेरू कि इना लोक कुन ज़ोतन, ‘ज़ैना दूई कुल यहोवा च़ुनोरे थिये तैन दूईयने करां हथ खड़ो कियो?’ एन ज़ोइतां कि इनां मेरे लोकन घटिया समझ़तन कि ऐह कौम तैन केरि नज़री मां बिछ़ड़ी जेवरीए। 25 यहोवा एन ज़ोते, अगर दीस ते रातरे बारे मां मेरो करार अटल न राए, ते अगर अम्बर ते धेरतरे नियम मेरे ठहरावरे न रेई गान, 26 तैखने अवं याकूबेरे खानदाने करां हथ खड़े केरेलो। ते अब्राहम, इसहाक ते याकूबेरे खानदाने पुड़ राज़ केरनेरे लेई अपने दास दाऊदेरे खानदाने मरां कोन्ची फिरी न ठहरेइलो। पन एसेरे बदले अवं तैन पुड़ महरबानी केरतां तैना गुलैमी मरां वापस आनेलो।"