रोड़े फैगू ते बुरे फैगू
1 ज़ैखन बाबेलेरे राज़े नबूकदनेस्सरे, यहोयाकीमेरू मट्ठू यहूदा प्रदेशेरे राज़ो यकोन्याह, ते यहूदारे हाकिम ते लुहार ते बाकी कारीगिर कैदी बनेइतां यरूशलेम नगरे मरां बाबेले जो नीए, त तैसेरे बाद यहोवा मीं अपने भवनेरे सामने रखोरे फैगू केरे दूई टोकरे हिराए। 2 एक्की टोकरे मां त पेइलां पकोरां रोड़ां-रोड़ां फैगू थियां, ते होरि टोकरे मां खराब फैगू थियां, तैना एत्रां खराब थियां कि खानेरे काबल भी न थियां। 3 फिरी यहोवा मीं पुछ़ू, "हे यिर्मयाह, तीं कुन लेइहोते?" मीं जुवाब दित्तो, "फैगू; ज़ैना रोड़ां फैगू आन तैना बड़ां रोड़ां आन, पन ज़ैना खराबन, तैना बड़ां खराबन; बल्के एत्रां खराबन कि खानेरे काबल भी नईं।"
4 तैखन यहोवा मीं सेइं ज़ोवं, 5 "इस्राएलेरो परमेशर यहोवा इन ज़ोते, ज़ेन्च़रां रोड़ां फैगन, तेन्च़रे ही अवं यहूदी कैदन ज़ैना मीं इस ठारारां कसदी24:5 कसदी बाबेलेरे लोकां केरू होरू नवं। लोकां केरे मुल्खे मां भेज़ोरेन, हेरतां महरबानी केरेलो। 6 अवं तैन पुड़ सिद्धी नज़र रखेलो ते तैन इस मुल्खे मां वापस आनेलो; ते तैन नाश न केरेलो, पन बनालो; तैन ढ्लूड़ेलो न, पन लगोरे रखेलो। 7 अवं तैन केरो एरहो मन केरेलो कि तैना मीं ज़ानेले कि अवं यहोवा आईं: ते तैना मेरे लोक ठहरेले ते अवं तैन केरो परमेशर ठहरेलो, किजोकि तैना मेरे पासे पूरे मने सेइं फिरेले।
8 "पन ज़ेन्च़रां खराब फैगू, खराब भोनेरे वजाई सेइं खेइयोन न, तैस्से तरीके अवं यहूदा प्रदेशेरे राज़े सिदकिय्याह ते तैसेरे हाकिम ते बच़ोरे यरूशलेमेरे लोकन शारेलो, ज़ैना इस मुल्खे मां या मिस्र मुल्खे मां रेई जेवरेन। 9 एल्हेरेलेइ तैना दुनियारे अलग-अलग मुल्खन मां मारे-मारे फिरते दुख भोगते राले; ते ज़ेत्रे ठारन मां अवं तैन ज़बरदस्ती कढेलो, तैन सेभन मां तैना बदनामी ते मसाल ते लानतरे विषय भोल्हे। 10 ते अवं तैन मां तलवार च़लेइलो, ते काल ते मरी फैलेइलो, ते आखरी मां इस मुल्खे मरां ज़ै मीं तैन केरे दादे-पड़दादन ते तैन दित्तोरोए, तैना मिटाए गाले।"