1 ज़ैखन मीं परमेशर यहोवारे सब वचन ज़ोए, ज़ैना ज़ोनेरे लेई यहोवा यिर्मयाह सेभी लोकन कां भेज़ोरो थियो, 2 तैखन होशायाहेरे मट्ठे अजर्याह ते कारेहेरे मट्ठे योहानाने ते सब घमण्डी मैन्हेइं यिर्मयाह सेइं ज़ोवं, "तू झूठ ज़ोतस। इश्शे परमेशर यहोवा तू एन ज़ोनेरे लेई नईं भेज़ोरो कि ‘मिस्र मां रानेरे लेई न गाथ;’ 3 पन नेरिय्याहेरू मट्ठू बारूक तीं इश्शे खलाफ भड़काते कि असां कसदी लोकां केरे हथ्थे मां पेम ते तैना असन मारन या कैदी बनेइतां बाबेले जो नेन।" 4 एल्हेरेलेइ कारेहेरे मट्ठे योहानान ते सेनारे सेभी प्रधान्न ते सब लोकेईं यहोवारो ऐह हुक्म न मन्नो कि तैना यहूदा प्रदेशे मां रान। 5 पन कारेहेरू मट्ठू योहानान ते सेनारे ते सब प्रधान तैन सब यहूदी लोकन ज़ैन गैर कौमन मां तितर-बितर भोइ जेवरे थिये, ते तैन मरां वापस गेइतां यहूदा प्रदेशे मां राने लगोरे थिये, तैना तैन्न नेइतां जे, 6 मड़द, कौन्श, बाल-बच्‍चे, राज़ेरी कुइयां, ते ज़ेत्रे प्राणी अंगरक्षकां केरे प्रधान नबूजरदाने गदल्याहे ज़ैना अहीकामेरू मट्ठू ते शापानेरू पोट्लड़ू थियूं, सौंफी दित्तोरे थिये, तैना ते अवं ते नेरिय्याहेरे मट्ठू बारूक नेवं; 7 ते यहोवारो हुक्म न मेनतां तै मिस्र मुल्खे मां तहपन्हेस नगरे मां आए।

8 तैखन यहोवा तहपन्हेस नगरे मां मीं सेइं ज़ोवं, 9 "अपने हथ्थे मां बड्डे घोड़ ट्ला, ते यहूदी मड़दां केरे सामने तैस इट्टां केरे चबूतरे मां ज़ै तहपन्हेस नगरे मां फ़िरौनेरे मेहलेरे दारे कांए, चुन्नो लेइतां छ़ुपा, 10 ते तैन मड़दन सेइं ज़ो, ‘इस्राएलेरो परमेशर, सेना केरो यहोवा, एन ज़ोते: हेरा, अवं बाबेलेरे राज़े अपने सेवक नबूकदनेस्सरे जो समाद भेज़ेलो, ते तै अपनो तखत एन घोड़न पुड़ रखेलो, ज़ैना मीं छ़ुपेइतां रखोरेन; ते अपनो शाही तेम्बु इड़ी लुवालो।✝ 11 तै एइतां मिस्र मुल्खे नाश केरेलो, तैखन ज़ैना मरने बाले भोन तैना मौतरे कब्ज़े मां, ज़ैना कैदी भोनेबाले भोन तैना कैदी भोल्हे, ते ज़ैना तलवारारे लेई आन तैना तलवारारे कब्ज़े मां किये गाले। 12 अवं मिस्रेरे मन्दरन मां अग लुवेइलो; ते तै तैन फुकालो ते कैदी बनेइतां नेलो; ते ज़ेरो कोई पुहाल अपनु लिगड़ पलैटते, तेन्च़रे ही तै मिस्र मुल्खे पलेटतां नेलो; ते तैखन बेधड़क च़लो गालो। 13 तै मिस्र मुल्खे मरां दिहाड़ेरे खम्भन ट्लोड़ेलो; ते मिस्रेरे मन्दरन फुकेलो।’"