यिर्मयाह 46

मिस्र मुल्खेरे खलाफ नबूवत

1 कौमां-कौमां केरे बारे मां यहोवा ज़ैन मीं सेइं ज़ोवं, तैन इन आहे।

2 मिस्र मुल्खेरे बारे मां। मिस्रेरे राज़े फ़िरौन नको एरी सेना ज़ै फरात बड्डे दरियारे बन्ने पुड़ कर्कमीश नगरे मां थी, ते ज़ैन बाबेलेरे राज़े नबूकदनेस्सरे योशिय्याहेरे मट्ठे यहूदारे राज़े यहोयाकीमेरे राज़ केरनेरे च़ेवरोवं साले मां ज़ींतू, तैस सेनारे बारे मां,

3 "ढालन ते झिलम तियार केरतां लड़नेरे लेई नेड़े च़ले एज्जा। 4 घोड़न तियार केरा; ते हे सुवारव, घोड़न पुड़ च़ेढ़तां टोप लेइतां खड़े भोथ, भाले तिखे केरा, झिलमां लाथ! 5 अवं किजो तैन परेशान लाताईं? तैना परेशान भोइतां पत्रोवं हटे! तैन केरे बहादर सिपाही बिछ़ोड़ी जे; ते जल्दी केरतां नश्शे; तैना पत्रोवं तक्‍कन भी न, किजोकि यहोवा एन ज़ोते, कि च़ेवरे पासन डर भोल्हो! 6 न तेज़ च़लनेबालो नेश्शी बटेलो; किजोकि उत्तरेरे पासे मां फरात दरियारे बन्ने पुड़ तैना सब ठोकर खेइतां बिछ़ड़ी जे।

7 "ऐह कौने, ज़ैन नील दरियाएरो ज़ेरो, ज़ेसेरू पानी बड्डे दरियां केरू ज़ेरू उछ़ड़ते, बद्धतू च़लोरूए? 8 मिस्र नील दरियाएरो ज़ेरो बद्धते, तैसेरू पानी बड्डे दरियां केरू ज़ेरू उछ़ड़ते। तै ज़ोते, अवं च़ेढ़तां धरती भरेलो, अवं नगरन तैन केरे रानेबालन समेत खतम केरि देइलो। 9 हे मिस्री सुवारव अग्रोवं बधा, हे रथ च़लाने बालव, बड़े तेज़ च़लाथ! हे ढाल ट्लानेबाले कूशी ते पूती सेनकव, हे तीर च़लानेबाले लूदी लोकव च़ले एज्जा। 10 किजोकि तै दिहाड़ी सेना केरो यहोवा प्रभुएरे बदलो नेनेरी दिहाड़ी भोल्ही ज़ैस सेइं तै अपने दुश्मन करां बदलो नेलो। तलवार खेइतां रज़्ज़ेली, ते तैन केरो खून पीतां छकेली। किजोकि, उत्तरेरे मुल्खे मां फरात दरियारे बन्ने पुड़, सेना केरे यहोवा प्रभुएरे लेई बलिदाने। 11 हे मिस्र मुल्खेरी कुवारी कुई*46:11 मुल्खेरी कुवारी कुई मतलब मिस्री लोक, गिलाद प्रदेशे मां गेइतां बलसान दूवाई ने; तू फुज़ूल बड़ो आलाज़ करातिस, तू न बेझ़ोली! 12 किजोकि सब कौमां केरे लोकेईं शुनोरूए कि तू नीच़ भोइ जेई ते धरती तेरी चिन्डां केरि शौरी सेइं भेरोई जेई; सिपाही करां सिपाही ठोकर खेइतां बिछ़ड़ी जे; तैना दूईये साथी बिछ़ड़ी जेवरेन।"

नबूकदनेस्सरेरू एजनू

13 यहोवा मीं सेइं इन भी ज़ोवं, कि बाबेलेरो राज़ो नबूकदनेस्सर किजो एइतां मिस्र मुल्खे पुड़ हमलो केरेलो: 14 "मिस्र मुल्खे मां बियान केरा, ते मिग्दोल नगरे मां शुनाथ; हाँ, ते नोप ते तहपन्हेस नगरे मां शुन्तां इन ज़ोथ कि खड़े भोइतां तियार भोइ गाथ; किजोकि तुश्शे च़ेवरे पासन सब किछ तलवार खाली। 15 तेरे ताकतबर मैन्हु किजो खतम भोइ जे? तैना एल्हेरेलेइ खड़े न रेई सखे किजोकि यहोवा तैन ढ्लैक दित्तोरीए। 16 तैनी बड़े लोकन ठोकर खुवाई, तैना एक्‍की होरि पुड़ बिछ़ड़ी जे; ते तैना एक्‍की होरि सेइं ज़ोने लगे, ‘उठा, च़ला, असां अंधेर केरनेबालां केरि तलवारारे डरेरे मारे अपने-अपने लोकन ते अपनि-अपनि ज़र्म धेरतली मां फिरी वापस गाम।’ 17 तैड़ी तैना उच्‍ची आवाज़ी मां ज़ोतन, ‘मिस्र मुल्खेरो राज़ो फ़िरौन सत्यानाश भोव; किजोकि तैनी अपनो बड़ो कीमती मौको गुवाव।’

18 "तै महाराज़ो ज़ेसेरू नवं सेना केरो यहोवाए, तै एन ज़ोते कि मीं अपनि कसम, ज़ेरो ताबोर बाकी पहाड़न मां, ते ज़ेरो कर्मेल समुन्दरेरे बन्ने, तेन्च़रे ही तै एज्जेलो। 19 हे मिस्र मुल्खे मां रानेबाली कुई! गुलैमी मां गानेरू सामान तियार केर, किजोकि नोप नगर उज़ड़ेलू ते एरू तबाह भोल्हु कि तैस मां कोई भी रेई सकेलो।

20 "मिस्र बड़ी खूबसूरत बेछ़ड़री ज़ेरि त आहे, पन उत्तरेरे पासेरां नाश एवरोए, बल्के तै पुज़्ज़ी जेव। 21 तैसेरे ज़ैना सिपाही किरैइये पुड़ एवरेन तैना पालोरे बछ़ड़ां केरे ज़ेरेन; तैनेईं तुत्तर फिरवं, ते साथी नेश्शी जे, तैना खड़े न राए; किजोकि तैन केरि मुसीबतरी दिहाड़ी ते सज़ारो वक्त अव। 22 तैसेरे नशनेरी आवाज़ सप्पेरे शोंटार मारनेरी ज़ेरि भोल्ही; किजोकि तैना बुट कटने बालां केरे सेना ते मैक्‍कु घिन्तां तैसेरे खलाफ एज्जेले। 23 यहोवा एन ज़ोते, कि चाहे तैसेरू जंगल बड़ू घनू भोए, पन तैना तैस कट्टेले, किजोकि तैना टिट्टां केरे ज़ेरे बेशुमार आन। 24 मिस्री कुवारी शरमिन्दा भोल्ही, तै उत्तरेरे पासेरे लोकां केरे कब्ज़े मां की गाली।"

25 इस्राएलेरो परमेशर, सेना केरो यहोवा ज़ोते: "हेरा, अवं नो नंव्वेरे नगरेरे आमोन देबते ते फ़िरौन राज़े ते मिस्रे तैसेरे सब देबतन ते राज़न समेत ते फ़िरौने समेत ज़ैना तैस पुड़ भरोसो रखतन सज़ाह देनेबालो आईं। 26 अवं तैन्न बाबेलेरे राज़े नबूकदनेस्सर ते तैसेरे अधिकैरी केरे कब्ज़े मां केरेलो ज़ैना तैन्न जाना मारने चातन। तैसेरे बाद तै पुराने ज़मानेरो ज़ेरो फिरी बसाव गालो, यहोवा एन ज़ोते।

इस्राएलेरे लेई दिलासो

27 "पन हे मेरे दास याकूब, तू न डर, ते हे इस्राएल, परेशान न भो; किजोकि अवं तीं तेरे खानदाने गुलैमरे दूर मुल्खे मरां छुटेइतां आनेलो। याकूब वापस एइतां चैन ते सुखे सेइं रालो, ते कोई तैस डरेई न सकेलो। 28 मेरे दास याकूब, यहोवा एन ज़ोते, कि तू न डर, किजोकि अवं तीं सेइं साथी आईं। ते अगर अवं तैन सब कौमां केरो अन्त केरि छ़डेलो ज़ैन मरां मीं तू ज़बरदस्ती कढोरोस, फिरी भी तेरो अन्त न केरेलो। अवं तीं सज़ाह विचार केरतां देइलो, पन तीं कोन्ची तरीके सेइं बेकसूर न ठहरेइलो।"