यिर्मयाह 8

ज़िन्दगी करां जादे मौत

1 यहोवा एन ज़ोते, "तैस वक्त यहूदा प्रदेशेरे राज़े, हाकिम, याजक, नबी ते यरूशलेम नगरेरे रानेबालां केरि हेड्डी कब्रन मरां केढतां, 2 दिहाड़े, चाँदनी ते अम्बरेरां सारे तारां केरे सामने फैलाई गैली। किजोकि यहूदा प्रदेशेरे लोक तैन्न सेइं प्यार केरते थिये, ते तैन्ना केरि सेवा केरते थिये, ते तैन्न पत्पती च़लते थिये, ते तैन्ने कां गाते ते तैन्ने कां झुकते थिये। तैन केरि लाशां न अकोट्ठी की गैली ते न कब्रन मां देब्बी गैली; तैना ज़मीनी पुड़ खादरी ज़ेरि पेवरी रहेली। 3 तैखन इस बुरे कुलेरे बच़ोरे लोक तैन सेभी ठारन मां ज़ैस मरां मीं तैना कढोरेन, ज़िन्दगी करां जादे मौत चाले, सेना केरो यहोवा एन ज़ोते।"✝8:3 प्रका. 9:6.

पाप ते सज़ाह

4 यहोवा मीं सेइं इन भी ज़ोवं कि लोकन सेइं ज़ो, "यहोवा इन ज़ोते कि तू तैन सेइं एन भी ज़ो, कि ज़ैखन मैन्हु बिछ़ड़तन त कुन फिरी खड़े न भोन? 5 ज़ैखन कोई टेपलोइ गाते त कुन तै वापस न एज्जे? फिरी कुन वजा आहे कि इना यरूशलेम नगरेरे लोक हमेशा दूर-दूर भटकतन? एना धोखे न छ़डन, ते फिरी वापस एजने करां इन्कार केरतन। 6 मीं ध्याने सेइं शुनू, पन तैन केरि गल्‍लां ठीक नईं; एन मरां केन्चे अपने बुरैई करां न पशतेइतां ज़ोवं, ‘हाय! मीं एन कुन कियोरूए?’ ज़ेरो घोड़ो लड़ैई मां तेज़ दौड़ते, तेन्च़रे एना सब अपने दौड़ी मां दौड़तन। 7 इड़ी तगर अम्बरे मां सारस च़ुड़ोलोवं भी अपने ठहरावरे वक्ते ज़ानते, ते कबूतर, सूपाबेनी, ते बगुलो भी अपने एजनेरो वक्त रखतन; पन मेरे लोक अपने यहोवारे नियम न ज़ानन।

8 "तुस केन्च़रे ज़ोईं सकतथ कि असां अक्लमन्द अहम, ते यहोवारो दित्तोरो कानून असन सेइं साथीए? पन तैन केरे शास्त्री लोकेईं झूठो ज़िक्र लिखतां तै झूठो बनेवरोए। 9 अक्लमन्द शरमिन्दा भोइ जे, तैना बेइज़्ज़त भोए ते ट्लाए जे; हेरा, तैनेईं यहोवारू वचन कबूल न कियूं, तैन मां अक्ल कोड़ि राई? 10 एल्हेरेलेइ अवं तैन केरि कौन्शां होरि मड़दां केरि ते तैन केरां ऊडारां होरि अधिकैरी केरे कब्ज़े मां केरेलो, किजोकि निकड़े करां लेइतां बड़े तगर तैना सब लालच़ी आन; कुन नबी कुन याजक, तैना सब धोखेरां कम्मां केरतन। 11 तैना मेरे लोकन सेइं ज़ोतन, ‘शान्ति आहे शान्ति,’ एन्च़रे ज़ोइतां मेरे लोकां केरे ज़खम बांमेइं ठीक किये, पन शान्ति कोन्च भी नईं।✝8:11 यहे. 13:10. 12 कुन तैना बुरां कम्मां केरतां शरमिन्दा भोए? नईं, तैन कोई शर्म न अई, तैना शरमिन्दा भोनू भी न ज़ानन। एल्हेरेलेइ ज़ेन्च़रे होरे लोक बिछ़ड़न तेन्च़रे तैना भी बिछ़ड़ेले, ज़ैखन तैन केरे सज़ारो वक्त एज्जेलो, तैखन तैना भी ठोकर खेइतां बिछ़ड़ेले, यहोवा एन ज़ोते। 13 यहोवा इन भी ज़ोते, अवं तैन सेभी केरो खातमो केरेलो। न तैन केरे बागन मां दाछ़ राली, ते न फैगेरे बुट्टन पुड़ फैगू बल्के तैन केरां पट्लां भी शुकेलां, ते ज़ैन किछ मीं तैन्न दित्तोरूए तैन, तैन करां च़लू गालू।"

14 तैखन यहूदा प्रदेशेरे लोक एप्पु मांमेइं ज़ोले, "असां किजो च़ुप-च़प बिशोरेम? एज्जा, असां क़िले बाले नगरन मां अकोट्ठे नाश भोइ गाम; किजोकि इश्शो परमेशर यहोवा असन नाश केरनो चाते, ते असन बिष पीने जो दित्तोरूए। किजोकि असेईं यहोवारे खलाफ पाप कियोरोए। 15 असां शैन्तरो इंतज़ार केरते थिये, पन किछ भी भलू न भोवं, असन बेझ़ोनेरे वक्तेरो इंतज़ार थियो, पन घबरानू पेवरूए।

16 "दुश्मना केरे घोड़ां केरे खिनकनेरी आवाज़ दान नगरे मरां शुनोने लगोरीए, ते दुश्मना केरे ताकतबर घोड़ां केरे खिनकनेरी आवाज़ी सेइं सारो मुल्ख हिलने लगोरोए। तैनेईं एइतां इश्शो मुल्ख ते ज़ैन किछ तैस मांए, ते इश्शू यरूशलेम नगर लोकन समेत नाश कियूं। 17 यहोवा एन ज़ोते, अवं तुसन मां दुश्मन सिपाही भेज़ेलो ज़ेन्च़रे ज़ेरहीले सप टक देतन, तैन पुड़ तुश्शो कोई बस न च़लेलो ते तुस मेरि गाले।"

यहूदा प्रदेशेरे लेई मातम

18 अफ़सोस! अफ़सोस! इस मातमेरे हालती मां मीं कौन तसल्‍ली देलो? मेरो दिल अन्तरे अन्तर तड़फते! 19 मीं अपने लोकां केरे चिन्डां केरि शौर दूर मुल्खेरां शुनोतीए: तैना ज़ोतन, "कुन यहोवा सिय्योने मां नईं? कुन तैसेरो राज़ो तैस मां नईं?" पन यहोवा ज़ोवं, "तैनेईं किजो अवं अपने बनेवरी मूरती ते प्रदेशेरे बेकार चीज़ां केरे ज़िरिये सरकाव?" 20 लोक ज़ोतन, "फसल कटनेरो मौसम च़लो जेव, फल ट्लोड़नेरो मौसम भी खतम भोइ जेव, ते इश्शो छुटकारो न भोवं।" 21 यिर्मयाह ज़ोते, एल्हेरेलेइ अवं अपने लोकन केरे दुखे सेइं भी दुखी भोव, अवं मातमेरां लिगड़ां लेइतां बड़ो उदास भोव।

22 कुन गिलाद प्रदेशे मां किछ बलसानेरी दूवाई नईं? कुन तैस मां कोई बेइद नईं? अगर आहे त मेरे लोकां केरे ज़खम किजो ठीक न भोए?