1 तैस्से साल मीं इस बारे मां चिट्ठी, तैन बुज़ुर्गन ते नेबन ते आम लोकन कां भेज़ी ज़ैन नबूकदनेस्सर कैदी बनेइतां यरूशलेम नगरे मरां बाबेले जो घिन्तां जेवरो थियो। 2 ई चिट्ठी तैस मौके भेज़ी, ज़ैखन यकोन्याह राज़ो ते तैसेरी अम्मा, खोजे, यहूदा ते यरूशलेम नगरेरे हाकिम, लुहार ते बाकी कारीगिर यरूशलेम नगरे मरां च़ले जेवरे थिये। 3 ई चिट्ठी शापानेरे मट्ठे एलासा ते हिल्किय्याहेरे मट्ठे गमर्याहेरे ज़िरिये भेज़ी, ज़ैना यहूदारे राज़े सिदकिय्याहे बाबेलेरे राज़े नबूकदनेस्सरे कां बाबेले जो भेज़े। 4 तैस मां लिखोरू थियूं: "ज़ेत्रे लोक मीं यरूशलेम नगरे मरां कैदी बनेइतां बाबेले मां पुज़ाए, तैन सेभन सेइं इस्राएलेरो परमेशर सेना केरो यहोवा इन ज़ोते। 5 घर बनेइतां तैन मां बेस्सी गाथ; बागां लेइतां तैन केरो फल खाथ। 6 ड्लाह बनेइतां मट्ठां-कुइयां पैदा केरा ते अपने मट्ठां केरो ड्लाह बनाथ, कि तैना भी मट्ठां-कुइयां पैदा केरन; ते तैड़ी घटा न बल्के बद्धते गाथ। 7 पन ज़ैस नगरे मां मीं तुस कैदी बनेइतां भेज़े, तैसेरे सुखेरी प्राथना केरा, ते तैसेरे लेई यहोवा कां प्राथना केरा। किजोकि तैसेरे सुखे सेइं तुस सुखे सेइं राले। 8 किजोकि इस्राएलेरो परमेशर, सेना केरो यहोवा तुसन सेइं एन ज़ोते कि तुश्शे ज़ैना नबी ते एजने बाले वक्तेरे बारे मां ज़ोनेबाले तुश्शे दरमियान आन, तैना तुसन टपलेइ न सकेले, ते ज़ैना सुपना तैना तुश्शे लेई हेरतन तैन केरे पासे ध्यान न देथ, 9 किजोकि तैना मेरे नंव्वे सेइं तुसन सेइं झूठी नबूवत शुनातन; मीं तैना नईं भेज़ोरे, अवं यहोवा एन ज़ोताईं।

10 "यहोवा एन ज़ोते कि, बाबेलेरे 70 साल पूरे भोने पुड़ अवं तुश्शी खबर नेइलो, ते अपनु इन मन पसंद वचन पूरू केरेलो, कि अवं तुसन एस ठैरी मां वापस आनेलो। 11 किजोकि यहोवा एन ज़ोते, कि ज़ैन-ज़ैन अवं तुश्शे लेई सोचताईं तैन अवं ज़ानताईं, तैन नुक्सानेरे लेई नईं, बल्के सुखेरू आहे ते आखरी मां तुश्शी उमीद पूरी केरेलो। 12 तैखन तैस मौके तुस मीं याद केरेले ते एइतां मीं कां प्राथना केरेले ते अवं तुश्शी शुनेलो। 13 तुस मीं तोपेले ते अवं तुसन मैल्हेलो भी; किजोकि तुस अपने पूरे मने सेइं मीं कां एज्जेले। 14 अवं तुसन मैल्हेलो, यहोवा एन ज़ोते, ते गुलैमी मरां अवं वापस आनेलो; ते तुसन तैन सेभी कौमन ते ठारन मां ज़ैन मरां मीं तुस ज़बरदस्ती कढोरेथ, ते तुसन अकोट्ठे केरतां एस ठैरी मां वापस आनेलो ज़ैठां मीं कैदी बनावेइतां कढोरे थिये, यहोवा एन ज़ोते।

15 "तुस ज़ोतथ कि यहोवा इश्शे लेई बाबेले मां नबी बांदे कियोरेन। 16 पन ज़ै दाऊद राज़ेरे तखते पुड़ बिशोरोए, ते ज़ैना लोक एस नगरे मां रहतन, यानी तुश्शे भियाल ज़ैना तुसन सेइं साथी गुलैमी मां न जे, तैन सेभी केरे बारे मां सेना केरो यहोवा एन ज़ोते, 17 शुना, अवं तैन मां तलवार च़लेइलो, काल ते मरी फैलेइलो; ते तैन एरे फैगू केरे ज़ेरे केरेलो ज़ैना खराब भोनेरे वजाई खेइयोन न। 18 अवं तलवार, काल ते मरी सेइं तैन केरो पीछो केरेलो, ते एरू केरेलो कि तैना दुनियारे मुल्खन मां मारे-मारे फिरेले, ते तैन सेभी कौमन मां ज़ैन मां अवं तैन ज़बरदस्ती छ़डेलो, तैन केरि एरी हालत केरेलो कि लोक तैन केरि हालत हेरतां हैरान भोल्हे ते च़ैड़ी देले ते तैन बेइज़्ज़त केरेले, ते तैन केरि मसाल देइतां लानत देले। 19 किजोकि ज़ैन वचन अवं अपने दास नेबी केरे ज़िरिये तैन कां बार-बार भेज़तां सन्देश भेज़तो राव, तैनेईं तैन न शुनू, यहोवा एन ज़ोते।

20 "एल्हेरेलेइ हे सारे कैदी लोकव, ज़ैना मीं यरूशलेम नगरे मरां बाबेले जो भेज़े, तुस तैसेरू इन वचन शुना, 21 ‘कोलायाहेरू मट्ठू अहाब ते मासेयाहेरू मट्ठू सिदकिय्याह ज़ैना मेरे नंव्वे सेइं तुसन झूठी नबूवत शुनातन, तैन केरे बारे मां इस्राएलेरो परमेशर सेना केरो यहोवा इन ज़ोते कि शुना, अवं तैन बाबेलेरे राज़े नबूकदनेस्सरेरे हथ्थे देइलो, ते तै तैन तुश्शे सामने मारेलो। 22 सब यहूदी कैदी ज़ैना बाबेले मां रहतन, तैन केरि मसाल देइतां लानत देले: यहोवा तीं सिदकिय्याह ते अहाबेरो ज़ेरो केरे, ज़ैना बाबेलेरे राज़े अग्गी मां फुक्‍के, 23 किजोकि तैनेईं इस्राएली लोकन मां बुरां कम्मां कियां, यानी अपने पड़ोसी केरि कौन्शन सेइं व्यभिचार कियो, ते मेरे हुक्मेरे बगैर मेरे नंव्वे सेइं झूठे वचन ज़ोए। एसेरो ज़ान्ने बालो ते गवाह अव्वें आईं, यहोवा एन ज़ोते।’"

24 नेहेलाम नगरेरे शमायाह सेइं तू इन ज़ो, "इस्राएलेरे परमेशर यहोवा इन ज़ोवरूए: 25 एल्हेरेलेइ कि तीं यरूशलेमेरे सेभी लोकन ते सब याजकन ते मासेयाहेरे मट्ठे सपन्याह याजके जो अपने ही नव्वें सेइं इस बारे मां चिट्ठी भेज़ी, 26 कि, ‘यहोवा यहोयादा याजकेरी ठैरी पुड़ तू याजक ठहराव ताके तू यहोवारे भवने मां रखवालो भोइतां ज़ेत्रे तैड़ी पागलपन केरतन ते नबी बेनतां बिशोरेन तैन बेड़न मां छ़डस ते तैन केरे गले मां लोंहेरे पट्टे ला। 27 एल्हेरेलेइ यिर्मयाह अनातोत नगरेरो ज़ै तुश्शो नबी बेनतां बिशोरोए, तै तीं किजो न झ़िड़को? 28 तैनी त असन लोकन कां बाबेले मां ई समाद भेज़ोरोए कि गुलैमी त बड़े च़िरे तगर राली, एल्हेरेलेइ घर बनेइतां तैन मां राथ, ते बागां लेइतां तैन केरो फल खाथ।’"

29 ऐह चिट्ठी सपन्याह याजके यिर्मयाह नेबी पेढ़तां शुनाई। 30 तैखन यहोवा मीं सेइं ज़ोवं, "सब कैदी लोकन कां ई समाद भेज़, 31 यहोवा नेहेलाम नगरेरे रानेबाले शमायाहेरे बारे मां एन ज़ोते: ‘शमायाह मेरे भेज़ने बगैर ज़ै नबूवत कियोरीए ते तुसन झूठे पुड़ भरोसो दित्तोरोए, 32 एल्हेरेलेइ यहोवा एन ज़ोते: शुना, अवं तैस नेहेलामी शमायाह ते तैसेरे खानदाने सज़ाह देनी चाताईं; तैसेरे घरे मरां कोई एन लोकन मां न रेई गालो। ते ज़ै भलियाई अवं अपने लोकन सेइं केरनेबालो आईं, तैस तै लेही न बटेलो, किजोकि तैनी यहोवा करां दूर गानेरी गल्‍लां ज़ोईं, यहोवा एन ज़ोते।’"