1 हे यहोवा, अगर अवं तीं सेइं मुकदमो लेड़ी, त तू धर्मी आस। मीं अपने आपे सेइं एस पुड़ बेंस केरने दे। दुष्टां केरि चाल किजो कामयाब भोतीए? कुन वजाई आहे कि धोखेबाज़ बड़े सुखे सेइं रहतन? 2 तू तैन बेतस ते ज़ैना ज़ील भी छ़डतन; तैना बेडोतन ते तैन फल भी लगते; तू तैन केरे ज़बानी पुड़ आस, पन तैन केरे मने करां दूर आस। 3 हे यहोवा तू मीं ज़ानतस; तू मीं हेरतस, ते तीं मेरो मन अज़मेइतां हेरो कि अवं तेरे पासे केन्च़रे रहताईं। ज़ेन्च़रे गब्बां केन्नी मरां मारे गानेरे लेई निसतन, तेन्च़रे मेरे दुश्मन्न भी कढ ते मारे गानेरे दिहाड़ेरे लेई तियार केर।✝ 4 किताली तगर मुल्ख मातम केरतो रालो, ते सारे मैइदानेरो घास शुक्‍कोरो रालो? मुल्खे मां रानेबालां केरे बुरैइारे वजाई सेइं जानबर-च़ुड़ोलू नाश भेवरेन, किजोकि तैन लोकेईं ज़ोवं, "परमेशर इश्शो अन्त न हेरेलो।"

5 यहोवा ज़ोवं, "तू ज़ै पैदल सिपाही केरे साथी दौड़तां थेकी जेवरोस त घोड़न साथी केन्च़रे बराबरी केरि सकेलो? ते अगर तू शैन्तरे इस मुल्खे मां निडर आस, पन यरदन दरियारे आसे-पासेरे घने जंगले मां तू कुन केरेलो? 6 किजोकि तेरे ढ्ला ते तेरे घरानेरे लोकेईं भी तीं सेइं धोखो कियोरोए; तैना तीं पत्पती ललकारतन, अगर तैना तीं सेइं मिट्ठी गल्‍लां भी ज़ोन, फिरी भी तैन पुड़ विश्वास न केरां।"

7 यहोवा इन भी ज़ोवं, "मीं अपनु घर* छ़ेडी दित्तू, अपनो हिस्सो* मीं छ़ेडी दित्तोरोए; मीं अपने प्राणां केरि ज़ेरि ट्लारी दुश्मना केरे कब्ज़े मां कियोरीए। 8 किजोकि मेरो अपनो हिस्सो मेरे हेरने मां जंगलेरे शेरेरो ज़ेरो भोइ जेवरोए ते मेरे खलाफ गरज़ते, एल्हेरेलेइ मीं तैस सेइं बैर कियोरोए। 9 कुन मेरो अपनो हिस्सो मेरी नज़री मां रंगीन शिकारी च़ुड़ोलू केरो ज़ेरो नईं? कुन शिकारी च़ुड़ोलेईं तै च़ेवरे पासना घेरोरोए? गाथ सब जंगली जानबर अकोट्ठू केरा; तैन आनां कि खान। 10 बड़े पुहालेईं* मेरी दाछ़री बाग बिगाड़ी, तैनेईं मेरो हिस्सो बिगाड़ो, बल्के मेरो मन पसंद हिस्सेरे उडारे सुनसान ठार बनाई। 11 तैनेईं तै उज़ाड़ो; तैन उज़ैड़तां मेरे सामने मातम केरने लगोरे आन्न। सारो मुल्खे उज़ड़ी जेवरोए, फिरी भी कोई न सोचे। 12 सुनसान ठैरारे सब नेग्गी पहैड़न पुड़ नाश केरनेबाले च़ेढ़ी एवरेन; किजोकि यहोवारी तलवार मुल्खेरे एक्‍की पासेरां होरि पासे तगर निगलती गातीए; कोन्ची मैन्हु सुरक्षित नईं। 13 मेरे लोकेईं गेहुं त बे, पन कंटन बाले झ़ैल्‍लां कट्टा, तैनेईं दुख त झ़ैल्‍लो, पन तैस सेइं कोई फैइदो न भोव। यहोवारे सरकरे भड़कनेरे वजाई सेइं अपने ऊडारां केरि फसलरे बारे मां शरमिन्दा भोए।"

14 मेरे दुष्ट पड़ोसी तैस हिस्से पुड़ हथ लातन, ज़ेसेरो हिस्सेदार मीं अपने इस्राएली लोक बनाए। तैन केरे बारे मां यहोवा एन ज़ोते: "अवं तैन्न तैन केरे ज़मीनी मरां कढेलो, ते यहूदारे घराने भी तैन केरे मझ़ाटेरां कढेलो। 15 तैन कढनेरां बाद अवं फिरी तैन पुड़ महरबानी केरेलो, ते तैन मरां हर एक्‍की तैसेरे अपनो हिस्से ते ज़मीनी मां फिरी आनेलो।✝ 16 अगर तैना मेरी लोकां केरि चाल शिखतां मेरे ही नंव्वेरी कसम, ते यहोवारी कसम खाने लग्गन, ज़ेन्च़रे तैनेईं मेरे लोकन बाल देबतेरी कसम खानी शिखालोरी थी, तैखन मेरे लोकां केरे दरमियान तैन केरू भी खानदान बधेलू। 17 पन अगर तैना न मन्नेले, त अवं तैस कौमी एन्च़रे कढेलो कि तै फिरी कधी न उगी बटेली, यहोवा एन ज़ोते।"